1Leemi asu ri Leeme Silok. Luvukat ti mo laradi im taba asinorong Leeme Silok, la i lok momo aleng ting tonga res at levempapaase ali at ne Moroa.
2Laxamdak mi laxaalik teren dinaba ruuna levenasen silok go at lenep kangka ramtaba la Leeme Silok naba lox anarong livipisik li ren.
3Nedi loxoetemen dinaba ngasang kobot at laxampanga solo la dinap novos aleng. La at levenaleng axap i tu melamgo di noxok pakes bok ba ti tempanga.
4Do lamain na vot, laxasep mo ik lok ti laradi manmanton. La ik lox asuusu lebelen tuntun, loklox anare, la loklok ik mokso rin.
5Luvukat nabat pot ti mo lara im taba gamasa, la ik lok mo lugugu pilas teren mi lomokmokso.
6Lugugu ap mo laradi avukat noxo subu, la limixin bok di noxo domampe i.
7Neni noxo marat ba at tevelinga mumu tumumuat boro vetpes neni i ronga i, mila lununu ren i lolos la i nunu saga at Leeme Silok.
8Leveve ren ira xus pam, la neni kopmen na marat at tempanga. I nunu do ne Moroa naba sak tup mi limixin munepen min.
9Neni im taba leventamtaba solo mi lebelemulus ti limixin banbalo. La amisik ik lox asuusu labalamu ren ti limixin. La naba ruuna laasen silok la limixin dina lok ngangao aleng teren.
10La limixin kapmek dinaba ven i la dina musak, la dinabak milik angtungun tin. Ketla levenasen silok atdi ba si aleng tino la mo levendoxoma agagas atdi kopmen noxo soorun tinotno.
