Oseas 7

1

2

3

4

5

6

7

8

9

10

11

12

13

14

¹acrashä runacunata jampiptë, Efrainpawan Samariapa juchancunaga alayrimi ricacan. Paycunaga llullacuyllapämi yachacasha carcaycan. Llapanpis suwallami. Wasicunamanpis suwacoj yagacaycärin. Runacunata imantapis cällicunacho guechun.

²Paycunaga manami tantiyacunchu llapan mana allita rurashancunata noga yarpaycashäta. Quiquincunapa juchallanmi intërunpa tumaparaycan. Imano juchan cashallantapis nogaga musyaycämi.

³«Acrashä runacuna mana allita ruraptinmi rayga cushisha mandan. Acrashä runacuna llullacuptinmi mandajcunapis cushisha mandan.

⁴Paycunaga llapanpis pasaypa shanaripacushami carcaycan. Wayllasha jurnu mana gasashannömi carcaycan. Tanta ruraj runa wayllasha jurnuta junta waycupaycur manana waycapashannömi carcaycan.

⁵Ray fistata ruraptin mandajcunaga fiyupa machänancama upyan. Chaura raypis asipajcunatana gayan upyäshinanpaj.

⁶Mandajcunaga mana alliman chayachinan-cashallami rayman aywan. Warayllatami yarpachacuycar wararcun warannin tuta raypa contran imano rurananpäpis.

⁷Paycunaga jurnu rataycajno cashpanmi autoridänincunatapis wañuchisha. Raynincunatapis rucachisha. Ichanga ni jucnayllapis manami canchu nogata mañacamäga.

⁸«Efraín runacunaga jäpa runacunawanmi tallucasha. Efraín runacunaga caycan gashpayllapa chayasha tantanömi.

⁹Israeltaga jäpa runacuna masta-mastana ushaycan. Ichanga paycuna manami cuentata gocunchu. Ajchancunapis soguyacäcushana. Ichanga paycuna manami cuentata gocunchu.

¹⁰Imano carpis paycunaga manami yäracamashachu, ni yarpämashapischu. Israelcuna alli-tucushanga quiquincuna mana alli canallanpämi caycan.

¹¹Efraín runacunaga caycan upayasha caycaj palumanömi. Egipto runacunata ruwacun yanapänanpaj. Nircorga Asiriamanna aywan.

¹²Aywaptinmi ichanga redäta jitashaj paycunapa jananman. Janajpita äbicuna shicwajnömi shicwanga. Mana allita rurashancunapitami castigashaj.

¹³«Ay, nogata gongaycamajcunaga imanöräshi canga. Paycunaga illganga nogapa conträ ricacushanpitami. Paycunaga nogapa conträmi llullacurcaycan. Man'chäga noga salbämanmi.

¹⁴Cämancho gaparpashpanpis, manami llapan shongunpa mañacamanchu. Rïgun, bïnun achca cananpaj mañacur janancunatami yawar-yawar ruracun. Chayno rurarmi nogapa conträ ricacusha.

¹⁵Nogami yachachirä. Nogami callpayojyächirä. Chayno yanapaycaptëmi paycunaga nogapa conträ parlacusha.

¹⁶Ïdulucunata adurayman churacasha. Paycunaga carcaycan wicsu lëchano, lëcha jitaj apuntashanman mana chayajnömi. Ollgur parlashanpitami mandajnincunaga cuchuypa wañuchicanga. Egiptuchöpis paycunataga manacajman churashpanmi asipanga.