1Israel bama hamauria nato negana ai, Efraim ena kara havara e hedinaraiva, bona Samaria ena kara dika danu; badina be idia na e kara koikoimu; henao tauna ese ruma habana e dareamu bona dadidadi taudia na murimuri ai e dadidadimu.
2To asie haeroamu lau ese edia kara dikadia iboudiai na lalodia taomu. Harihari edia kara ese e koudia heḡeḡemu; idia na lau vairagu ai.
3Edia kara dika amo idia ese hanua pavapavana e hamoaleamu bona edia kara hedibaḡani amo hanua lohiadia danu e hamoalediamu.
4Idia iboudiai na heuda-hanai taudia; idia na amu siahuna na heto; flaoa igabuna tauna ese lahi irakuna e hadokoamu, flaoa e kuiamu negana ela bona e tubumu negana.
5Eda pavapava ena dina ai, hanua lohiadia na e kekero, vine ranuna siahuna dainai; ia ese ḡonaḡona taudia ida imana e toi roro.
6Badina be amu na heto lalodia na edia lalo-hadai koikoidia amo e siahumu; hanuaboi idoinai edia badu na gida na heto, daba ai e hururumu, lahi hururu-hururuna na heto.
7Iboudiai na e siahumu, amu na heto; idia ese edia lohia e ha-orediamu. Edia pavapava iboudiai vada e moru; idia ta ese se hahane henigumu.
8Efraim na bese idau-idau taudia ida e heturamu, Efraim na se hurea hegiro atagana na heto.
9Idau taudia ese ena goada e ha-oreamu, to asi dibana; huina vada e buruka, to asi dibana.
10Israel ena heaḡi ese e habadelaiamu; ḡau tamona idia ese Iehova, edia Dirava, asie lou heniamu, ina idoinai vada e vara, to asie tahua.
11Efraim na pune na heto, kavakava, bona asi darana; Aigupto e boi heniamu, Asuria e lao heniamu.
12Laodia ai egu huo amo baina koudia, atai manudia na heheto baina hamorudia; matadia baina hakanidia, edia kara dika daidiai.
13Idia madi! Badina be egu amo vada e raka oho, Madi ihabaidia! Badina be vada e daḡedaḡe henigu. Bama hamauridia, to idia ese koikoi herevadia na latagu ai e gwauraimu.
14Idia ese lalodia amo asie tai henigumu, a edia mahuta ḡaudia latadiai e ḡanaḡanamu; uit bona vine-ranuna daidiai sibodia e heḡasimu, e daḡedaḡe henigumu.
15Ena be lau ese na hadibadibadia bona imadia na ha-aukadia, to lau ihadikalaigu e lalo hatamu.
16Idia ese Baal e haḡereamu; idia na koikoi pevana na heto. Edia lohia na dare ai bae mase, edia ere-daḡedaḡe dainai. Una dainai bae kirikirilaidia, Aigupto tanona ai.
