Annabi Hose 7

1

2

3

4

5

6

7

8

9

10

11

12

13

14

¹«N to wa Isirayila rayalanfe, Efirami xa yunubi man naxa makɛnɛn. Samari xa fe ɲaaxi naxa mini kɛnɛ ma. Na yanfantee muɲɛ tima, e yensen yɛ yire birin.

²E e maɲɔxun n mu ratuxi e xa kobiɲa ma, kɔnɔ n e xa wali birin toma nɛ.

³Yi mixi kobie rafan mangɛ ma, kuntigie tinma e xa wali ra.

⁴E xa langoeɲa gbo alɔ tɛ xungbe, taami ganyi naxan nadɛxɛma, a fa wolen han a gɛ farin nafalade.

⁵Kuntigie siisima nɛ mangɛ xa xulunyi, mangɛ fan tinxi na fe mɔɔli ra.

⁶E bɔɲɛ bara te alɔ tɛ xungbe, e e maso mangɛ ra, e xa a yanfa. E na fe birin xirima kɔɛ nan na alako gɛɛsɛgɛ e xa wali ɲaaxi xa kamali.

⁷E bɔɲɛ naxa te han e kiitisae birin nabira, e e xa mangɛe birin faxa. Na mixi mɔɔli mu n ma kiiti mamɛma fefe ma.

⁸Efirami wama lufe nɛ alɔ si gbɛtɛe, kɔnɔ a luxi nɛ alɔ taami naxan ganxi a ɲaaxi ra.

⁹Si gbɛtɛe a sɛnbɛ kanama, kɔnɔ a mu a kolon. A forixi, kɔnɔ a mu na rakɔrɔsi.

¹⁰Isirayila a yɛtɛ igboma, a mu gbilen a Marigi Alatala ma, a mu bira a xa sɛriyɛ fɔxɔ ra.

¹¹Efirami luxi nɛ alɔ ganbɛ xaxilitare. A Misirakae xilima, a saatɛ tongoma Asiriyakae bɛ.

¹²E na siga naa, n fama nɛ n ma yɛlɛ wolide e ma, e xa bira alɔ xɔni. N e ɲaxankatama nɛ, alɔ a masenxi e bɛ e xa malanyi kui ki naxɛ.

¹³Ɲaxankatɛ na e bɛ, barima e bara e gi n xun ma. Gbaloe na e bɛ, barima e bara n matandi. N nu waxi nɛ e xun sarafe, kɔnɔ e wulee sama n xun ma.

¹⁴E yaye raminima e xa sade ma, kɔnɔ e mu sunnunxi e bɔɲɛ ma. E e malanma alako e xa donse nun wɛni fen, kɔnɔ e e makuyama n tan na.

¹⁵N tan nan e xuru, n tan nan sɛnbɛ fi e ma, kɔnɔ e finsiriwaliya rabama n na.

¹⁶E mu e ya tima koore ra, e yanfɛ tima alɔ yanfɛ yili. Na nan a ra, e kuntigie faxama santidɛgɛma ra, e yaagi Misira bɔxi ma e xa wɔyɛnyi xa fe ra.»