Numero 20:1-10

¹Hein nehuna he vulan nekeuma is tivuuk he keet-etawan te Israel ziyà te sibsivayan he Zin, ne migkampu zan diyà te Kadesh. Dutun mebpatey si Miriam wey zutun daan ileveng.

²Wazà wahig dutun he lugar, umbe midsevehe en maan is menge etew te kebpekigkuntada ki Moises wey ki Aaron.

³Mibasul zan si Moises; ne ke sikandan te, “Deyzey pa ke minatey key en duma te menge zuma zey zengan he nemematey ziyà te etuvangan te Nengazen.

⁴Maan is miduma key kenikew is menge etew te Nengazen kayi te sibsivayan su wey key mebpatey zuma te menge uyaǥen dey.

⁵Maan is impeǥawas key pa kenikew ziyà te Ehipto ne kayi key kenikew dumaha te wazè din pulus he lugar he wazà duen minsan trigu, higus, paras, etawa pumigranata? Ne wazè pa wahig he egkeinum!”

⁶Umbe, mid-awà si Moises wey si Aaron diyà te menge etew, ne midhendiyè dan te gemawan te Tulda he Edtelevukaayan, ne midluhud dan is ebpengemuyù. Ne mibpaahà kandan is mekeǥeǥehem he kebpekiduma te Nengazen.

⁷Migkaǥi is Nengazen diyà te ki Moises te,

⁸“Kuwaa nu sikan is tuked nu ne tiǥuma niw zuen te suled nu he si Aaron is langun he menge etew. Ne zutun te edtengteng dan, ne keǥiyi nu is batu he mebeǥey te wahig, ne edtudà is wahig su wey niw meveǥayi te wahig is menge etew su wey zan mekeinum duma te menge uyaǥen dan.”

⁹Umbe, migkuwa ni Moises sikan is tuked puun te etuvangan te Nengazen, diyà te Kavan te Kebpekid-uyun kandan he ziyà te seled te tulda sumalà te insuǥù te Nengazen kandin.

¹⁰Ne hein nekuwa zin en, midtiǥum dan ki Aaron is langun he menge etew ziyà te egkesineruwan te vatu, ne migkeǥiyan sikandan ni Moises te, “Pemineg kew is menge mesinukulen, kinahanglan be he ebeǥayan dey sikiyu te wahig puun kayi te vatu?”