Ngën-gi-woy 8

1

2

3

4

5

6

7

8

¹Éy su meloon ni sama càmmiñ nga, mel ni ku ma bokkal wenn ween, ba ma dajeek yaw biti, sañ laa dar, te du tax ñu sikk ma!

²Ma jàpp la, yóbbu sama néeg yaay, moom mi ma yar, ma may la biiñ bu saf, ak sama ndoxum gërënaat, nga naan.

³Sama càmmoñu waay, ma gegenoo, ndijooram, ma laxasoo.

⁴Yeen janqi Yerusalem, waatal-leen ma ne dungeen dakkal te dungeen sooke tëraayu mbëggeel te jotul.

⁵Ana ndaw suy jóge màndiŋ ma nii, wéeroo nijaayam? Ndaw si Ci ron pom gi laa la yee, fa la sa yaay jàppe ëmb, jur la fa.

⁶Teg ma ci sa xol ni torlukaay, mbaa ci sa përëg ni lamu màndarga. Mbëggeel a bare doole ni ndee, fiiraange xér ni bàmmeel. Day jàpp jippét, di jum bu Aji Sax ji taal.

⁷Ndox mu ne xéew du fey mbëggeel, ay dex du ko mëdd. Ku koy weccee sa alalu kër gépp it, ñu jéppi laa jéppi rekk.

⁸Sunub jigéen lu ndaw la, ween sax amu ko. Lu nuy defal sunub jigéen bés bu ñu koy bëggsi?

⁹Su doon am tata, nu tabaxal ko soorooru xaalis. Su doon bunt, nu aare ko xànqi seedar.

¹⁰Maa dim tata, sama ween di sooroor ya; moo tax waa ji xam ne maa di jàmmam.

¹¹Suleymaan am na reseñ ca Baal Amon. Da koo dénk ay beykat. Ku nekk di ko fey meññeef ma junniy dogi xaalis.

¹²Junniy dogi xaalis yi, Suleymaan, yaa ko moom; ñaar téeméer yi, beykat yi. Waaye sama toolub reseñ, maa ko moom.

¹³Yaw mi tooge digg tool bi, samay xarit a ngi teewlu sa baat, waxal boog, ma dégg.

¹⁴Nijaay, dawsil, melal ni kéwél, mbaa kooba gu ndaw ci kaw tund wi ci gàncax gu xeeñ gi.