Nehemías 2

1

2

3

4

5

6

7

8

9

10

11

12

13

¹Rey-Artajerjes birga-dulagwengus (20), negdakmaidgi, a-ibagwengi, Nisán-nii-gwichidgi, an ega vino uknaigua, rey bukib-itoge an-daksad. Ar rey gwen bukib-binsa an-dakdisursoggu, anse egisalid:

²—¿Ar ibiga be bukib-itoge? Ar gwen-nailikgu an be-daksurbalid, degisoggu, ibmar-baidba be bukib-binsadiirgebed. Agine, an bela-bela dobe-itonaded.

³Geb agi, reyga an sogded: —¡Dummad, bitigi be suibasaar dulamai-gusana yeerban! ¿Igi an bukib-itosuli an daklegosunna? Ar ade, neggwebur bia an-dadgan-napa-mamai bela bibisgar-siid, degine, e-yawagakmar sooba bela gummaksabalid. Aga, an bukib-binsadiid.

⁴Geb rey anse egichialid: —¿Ibu bega imakbi be an-abesunna? Geb agi, Bab-Dummad-nibneg-ibedse an goted.

⁵Geb agi, rey-abin an sogded: —Dummad, ar be nabir itogele, nabir angi be binsaele, Judá-yarse be an-barmiddo, neggwebur bia an-babgan-napa-mamaidse, adi, a-neggwebur gannar an sobbaligar.

⁶Deunni, rey, e-omeyalaba siid. Agi, rey anse egichialid: —Be nadele, ¿bule-melu be yogguoe? ¿Sana gannar be danibaloe? Geb an reyga sogsagu sana an gannar danikoe, agi, rey nuedgi an-barmisad.

⁷Geb degi, reyga an sogsabalid: —Dummad, be nabir itogele, an bese wilesakwaa egissundo, dummagan Éufrates-diwar-dad-argwanedsik-negdakmamaidga be anga gardamar narmake, adi, Judá-yargi an bonisuli dogegar.

⁸Geb reyga-sapur-daked-Asafʼse garda be narmakbalina yeerban. We-gardagi Asafʼga be sogodo: ‘Sapi-warmar Nehemíasʼga be ukoye, adi, urgomar-mamarega. We-urgomar, Bab-Dummadse-goled-neg-dikarba neg-gandikid-siid-e-yawagakmarga ebulegoed. Degine, neggwebur-e-galumargi yawagakmar-siid sobega we-urgomar ebulebaloed. Deginbali, Nehemías e-meged-neg sobega urgomar ega be ukbaloye.’ Ar Bab-Dummad angi nued-binsasoggu, rey we-gardamar anga uksasunnad.

⁹Geb an Éufrates-diwar-dad-argwanedsik dummagan-negdakmamaidse an nadsunnad. Geb agi, rey-garda-narmaksad, a-dummaganga an uksad. A-ukinbali, rey, suar-ibed-dummagan, degi, dule-bila-onomalad-moli-birgi-simalad anba barmisad.

¹⁰Degi-inigwele, Sanbalat Horón-neggweburgined, geb Tobías Amón-dulemarga-arbaed, Israel-dulemar-bendakega dule-gwensak noniye, itosmargua, bela-bela sae-itodmalad.

¹¹Geb an Jerusalén-neggweburse modapid. Geb agine, ibapaagus an gudiidgine,

¹²mutikidbali an naded, anbali dulemar-ichesaar an sesad. Amargala bipisaale Bab-Dummad Jerusalén-neggweburga ibmar-imakbie-abeged an sogsasulid. Unnila anbi moli-birgi-sii nadapgusad, baigandi nagab nadapgusmalad.

¹³A-mutiki, Neba-Yawagak-Noedsik an nosad. Bia dii-e-saila-Dragónʼye-nugad-siidsik, degi, bia Ibmar-Isgana-Mied-e-Yawagak-Noed-siidsik an naded. Agine, an Jerusalén-neggwebur e-galumar-ganna-ganna-bukwad an daksad. Degine, e-yawagakmar bela soo-abin gummakar an daksabalid.

¹⁴Degidgine, Dii-e-saila-Yawagak-Dogedsik, degi, Rey-Dii-Wila-naidsik an naded. Degi-inigwele, geg an dogegusad, ar ade, moli-birgi-an-siidgi geg doged.

¹⁵Degisoggu, amba mutiksoggu, dian-maidba an nakwid gusad. Agi, neggwebur-e-galu-matusulid an nue argasad. Geb degine, gannar an bilisad, Neba-Yawagak-Noedsik an dognonikid.

¹⁶Ar deunni, dummagan-negdakmamaid wissurmalad, bia an arbi, degi, ibu an imakapi. Ar ade deunni, amba yoo an Judíoʼmarga ibmar-soged: Dule-irwa-Bab-Dummadse-gormaladga, dule-dummaganga, dummagan-negdakmamaidga, degi, dule-arbananaimaladga amba yoo an ibmar soged.

¹⁷Geb amarga an sogded: —Ar bemar nue wismalad, anmargala nue-neg-gagales-naid: Jerusalén-e-galumar-matusulid bela nue bibisgar-siid, degine, e-yawagakmar bela soose gummaksad. Degisoggu, anmar Jerusalén-e-galu-matusulid gannar sobnamarsun, adi, melle bar dulemar anmargi dodomalagar.

¹⁸Geb degine, amarga an sogdebalid, igi Bab-Dummad angi nued-binsasa, degine, igi anga rey sogsabali. Deyob-itosmargua, anga sokarmalad: —Anmar guakwado. Anmar neggwebur-e-galu-matusulid sobnamardo. Deyobi ibmar-nued saegala, yeer-itogedba arbadmarsunnad.

¹⁹Geb Sanbalat Horón-neggweburgined, Amón-dulemar-e-dummad-wargwen Tobíasʼye nugad, degi, Árabe-dule-Gesem, deyob itosgu, anmargi dodoarmalad, gegegwaye anmargi sokarmalad. Amar anmarga sokarmalad: —¿Ar bemar ibu imaknanai? ¿Ar bemarde reygi-gwisguoye sogmarde?

²⁰Ar andi a-dulemar-abin sogded: —Bab-Dummad-Nibneg-Ibed, a anmar-ibmar-imaknaidgi nasguega anmar-imakoed. Anmardi e-maigan-gumalad. Anmar Jerusalén-neggwebur e-galu-matusulid obinosokalid. We-neggwebur bemargadsulid. Degisoggu, bemar ibmar-soged sate, ar be-dadgande weginmaladsurbalid. A-ulale, bemar anmarba arbaed sate.