1Iwe, lon ewe maram Nisan, lon rüen ierin mwün ewe king Artaksasta, lupwen ünüman wain a molotä, üa angei ewe wain o ngeni ewe king fän ai wololilen. Nge me lom üsap mwo wololilen me fän mesan.
2Iwe, ewe king a üreniei, “Pwota ka wololilen, nge kosap samau? Ei lolilen a chök fis seni lon lelukom.” Mürin üa fokun niuokus
3o üreni ewe king, “Amwo ewe king epwe manau tori feilfeilachök. Pwota üsap wololilen are ewe telinimw lenien peiasen ai kewe lewo a tatakis, nge asamalapan kewe ra karala ren ekkei?”
4Iwe, ewe king a aisiniei, “Met ka mochen tüngor seniei?” Mürin üa iotek ngeni ewe Koten läng.
5Nge üa üreni ewe king, “Ika a öch me reöm, en ai king, nge ngang noum ei chon angang üa küna ümöümöch me reöm, kopwe mwüt ngeniei pwe üpwe feila Juta ren ewe telinimw ia peiasen ai kewe lewo ra nom ie, pwe üpwe aüsefälietä.”
6Mürin, ewe king a aisiniei, nge ewe kiwiin a mot ünükün, “Ifa ükükün fansoun om kopwe nonom ikenan, nge inet kopwe liwinsefälito?” Iwe, üa üreni ükükün fansoun ai üpwe nonom ikenan. Mürin ewe king a tipeeu ngeni ai tüngor o mwüt ngeniei pwe üpwe feila.
7Iwe, üa üreni ewe king, “Ika a öch me reöm en ai king, kopwe makei echö toropwe pwe üpwe uwala ren ekewe kepina lon ewe fanü lotoun ewe chanpupu Oifrat, pwe ir repwe mwüt ngeniei pwe üpwe sai tori ai üpwe tori Juta.
8Kopwe pwal ngeniei echö toropwe pwe üpwe uwala ren Asaf, ewe mi tümwünü än ewe king lenien wöllap, pwe epwe ngeniei irä pwe üpwe föri pamping seni fän iten asamalapen ewe imw pöchökül mi nom mwen ewe imwenfel, fän iten tittin ewe telinimw, pwal fän iten ewe imw üpwe nonom lon.” Iwe, ewe king a mwüt ngeniei mine üa tüngor, pun ai we Kot a etiei.
9Ewe king a pwal tinala ekoch meilapen mwichen sounfiu me eu mwichen chon wawa oris pwe repwe etiei. Iwe, lupwen üa tori ekewe kepina lon ewe fanü lotoun ewe chanpupu Oifrat, üa ngeniir nöün ewe king kewe toropwe.
10Nge lupwen Sanpalat ewe re Horon me Topia ewe nöüwisen Amon ra rong ei pworaus, ra fokun oput pwe eman a feito pwe epwe kütta feiöchün chon Israel.
11Iwe, üa tori Jerusalem o nonom ikenan lon ükükün ülüngat rän.
12Nge üsap üreni eman mine Kot a atolonga lon lelukei, pwe üpwe föri fän iten Jerusalem. Mürin üa pwätä lepwin o towu seni imwei, nge ekoch chök mwän ra etiei. Iwe, esap wor eman man a nom rei, chilon chök ewe man üa wawa.
13Iwe, üa towu seni ewe telinimw ren ewe Asamalapen Lemol lepwin o feila ren ewe Chönüttu Foks, pwal ren ewe Asamalapen Ioien Pipi. Üa ouwasacha tittin ewe telinimw Jerusalem mi tatiu me asamalapan kewe mi karala ren ekkei.
14Mürin üa pwerela ren ewe Asamalapen Chönüttu, pwal ren ewe Nomun Koluk än ewe king. Nge esap wor ia nei man üa wawa epwe chüen fetal ie.
15Iei mine üa feila lon ewe lemolun Kitron o ouwasacha tittin ewe telinimw. Mürin üa kul o liwiniti ewe telinimw o tolong lon ewe Asamalapen Lemol.
16Nge nöüwisen ewe telinimw resap silei ia üa feila ie, ika met üa föri. Pun tori ei otun üsamwo asile och ngeni ekewe chon Juta me ekewe souasor, ekewe aramas tekia me ekewe nöüwis, pwal ngeni ekewe lusun aramas mi tongeni föri ewe angang.
17Mürin üa üreniir, “Oua küna ewe weires sa nonom lon, pun Jerusalem a tala, nge asamalapan kewe ra karala. Ou etto, ousipwe senisefälietä tittin ei telinimw Jerusalem, pwe sisap chüen itengau.”
18Iwe, üa apworausa ngeniir usun än Kot etiei o alisiei, üa pwal apworausa ngeniir ekewe kapas ewe king a üreniei. Iwe, ra üra, “Ousipwe popuetä le senisefälietä ewe tit.” Iei usun ra popuetä le föri ewe angang mi mürina.
19Nge lupwen Sanpalat ewe re Horon me Topia ewe nöüwisen Amon pwal Kesem ewe re Arapia ra rong usun, ra esitakem o turunufaseekem. Iwe, ra üra, “Met popun oua föri ei? Ifa usun, oua mochen ü ngeni ewe king?”
20Mürin üa üreniir, “Ewe Koten läng epwe atufichikem lon ei angang. Äm nöün chon angang, aipwe popuetä le senisefälietä ewe tit. Nge ämi, esap wor wisemi, esap wor ämi pwüng ika ämi uruwo lon Jerusalem.”
