Nehemías 5

1

2

3

4

5

6

7

8

9

10

11

12

13

¹Degidgine, dulemar, degi, e-omegan binnasuli e-gwenadgan-Judíoʼmargi oimakarmalad.

²Gwenna-gwenna sogdemalad: “Anmar mimmigan bukidar nikamalad, degisoggu, anmar nabir mas-gunnega ibmar-gwag-gullemalad egisergebed, adi, mer burgwegar.”

³Baigan sogdemarmogad: “Anmar ukud-dummad-naidba, anmar-nainu, degine, anmar-uva-nainu manigi odogar nagusad, degi, anmar-nega dule-baidga manigi-odogar sigwisbalid, adi, anmar a-manigi mas bakegar.”

⁴Baigandi sogmarmogad: “Anmar rey-bennukegala, anmar-nainu, anmar-uva-nainu, manigi-odogar nasiksad.

⁵Ar anmar, we-dulemarbo emar-gumalad, anmar-mimmigan emar-mimmiganbo akarsulid, emalad. Degi-inigwele, anmardi anmar-masmala, degi, anmar-sisgan maiga-guegala anmar manigi-ukergebed. Bato anmar-sisgan gwenna-gwenna maiga-gudidimalad, amala geg anmar bar oakaloged. Ar ade anmar-nainu, anmar-uva-nainu bato dule-baigangadid.”

⁶Ani, Nehemías, we-dulemar isdar-itogedba oimakbukwa an itosgua, bela-bela sae-an-itoded.

⁷Nuekwaa an egi binsasgua, dule-nug-nikamaladga, degi, dule-dummaganga sabsuli ibmar an ega sogded: —Ar be-gwenadganga ibmar be uksale, egi mani-onogega, ¿mani-dummarba be gadamarde? Deginbali, bela we-igar-itogegala dulemar-onmakega an imaksad.

⁸Amarga an sogded: —Anmar, bela-bela alamaknanai gusad an-gwenadgan-Judíoʼmar, dulemar-Judíoʼsurmaladse manigi-uklesmalad-onogegar. ¿Ar emide bemar gannar be-gwenadgan-uknaibarde, adi, anmar a-gwenadgan gannar manigi onomarbaligar? Dule-nuga-nikamalad, degi, dummagan gwen anmar-abin-imaksasurmalad. Ar ade, ¿ibu anmarga sogosunna? Anmarga soged-satemala.

⁹Degidgine, an sogdebalid: —Bemar ibnued imaknanaisurmalad. Ar bemar anmar-Bab-Dummad dobee nanae-wilubmalanad, adi, anmar-isdarad-Judíoʼsurmalad melle anmargi dodomalagar.

¹⁰Ani, an-gwenadgan, degi, dule-anga-arbamalad, anmar dule-wileganaga mani gaar-uksad, orosgi-dakleged-trigoʼye-nugad gaale an uksamarbalid. Degisoggu, dule-anmargi-ibmar-ganikidbali anmarga gannar ibmar-ukoed, obichadi suli.

¹¹Degisoggu, dummagan gandikidgi an bemarga sogdo: Emisbinne, bemar ega e-nainumar, e-uva-nainumar, e-olivo-nainumar, degi, e-negmar gannar ukmala. Deginbali, mani-e-sangi-mani-onolesad mer be e-annik-suo, degi, ibmar-gwaggi, vinoʼgi, degi, olivo-gwallugi, e-gaka-obicha-ukleged, mer be egiso.

¹²Dummagande an-abin sogdemalad: —Nueddo, bela be anmarga ibmar-sogsadba an imakmaloed. Anmar gannar ega e-ibmarmala ukoed, bipisaale anmar ese ibmar-egisosulid. Geb degidgine, dule-irwa-Bab-Dummadse-gormaladse an gochad. Amar danar an oambikusad. Amar-wagab dule-nug-nikamalad, degi, dule-dummagan na e-ibmar-sogsad anga ise-sogar-imakega an imaksad.

¹³Agine, an-mor-dummad binnasur mor-mor an imaksad, geb an sogded: —We-ibmar-sognaidba dule-wargwen imaksasulile, Bab-Dummad a-dule-neg, degi, e-ibmarmar-nikad an-mor-dummad an mor-mor imaksayobi imakoed. Deyobi mor-mor guoed, na ibmar sate-guoed. Bela dulemar-bukwadi sogdemalad: —¡Ar deyob guodo! Geb bela dulemar Bab-Jehová-e-nug odummodmalad, bela dulemar ibmar-sogsadba imaksamalad.

¹⁴Rey-Artajerjes birga-dulagwengus (20), reyga maidgi, an Judá-yar-daked-dummadga nuggunonikid. A-gan an sesigusad, Rey-Artajerjes birga-dulagwen-gakambe-gakabo (32) megisadse. We-birgambe-gakabogwadgi (12), an-dummadga maigusan-inigwele, ani, degi, an-bendakmaladse-bakale, ibmarmar dule-dummadga-ukleged, anmar gwen ebussurmalad.

¹⁵Ar an-idu-dummaganga-megismaladdi, dulemargi mani-dummad gasmalad. Na e-mas gunnega, e-vino gobega, mani-nibir-dulabo (40) aidikued-wilub gasmalad. Deginbali, ega-arbamaladmoga dulemar-wiosmarmogad. Ar andi Bab-Dummad-dobed-ular, deyob an imaksasulid.

¹⁶Neggwebur-galu-matusulid gannar-nudakega an arbanai gusad, degine, anga dule-arbamalad arbanai gusmarmogad. Anmar bipisaale nainu baksasur gusmalad.

¹⁷A-ukinbali, Judíoʼmar, degi, dule-dummagan, dulagugle-gakambe (150) mese-naba anba mas-gunnonidamalad. Degine, dule-neggwebur-baiganginmalad anse ataknoni-gusmaladdi obarlesulid.

¹⁸Bane-bane, moli-bebe-nikad, wargwen, sibad-wawaad-nuegan, walanergwa (6) oburgwiledaed. Deginbali, nuumar-oburgwiledabalid. Ibambe-ibambegi (10-10), vino-ichesuli anga selenonidaed. Degi-inigwele, an dummadga-guedgi anga-ibmar-uklegoenad an ese egichissulid. Ar ade, an daked, ar weyobile, we-dulemarga mani-bipisuli nosaled.

¹⁹¡An-Bab-Dummadye, bela we-dulemarga an ibmar-imaksad, nue be ebinsao! ¡Angi nued be binsamogo!