NARONA 23:7-19

⁷ben à yã kɛ̀ à è ò à bè: Mↄabunↄ kí Balaki ma sisi Siria bùsun, ben ma bↄ ↄfãntɛ̃bↄɛ kpa kpiiinↄ kiia ma mↄ. À bè mà bↄare Isarailinↄ kpɛɛ, mà mↄ́ mà sa zaaa oare Yakubu borii pìnↄnɛ.

⁸Mɛ́ kɛ dia mà gbɛ̃ kɛ̀ Luda e ń károonↄ káa? Mɛ́ kɛ dia mà bↄ gbɛ̃ kɛ̀ Dii e bↄ ń kpɛɛroonↄ kpɛɛɛ?

⁹Zaa kpii mìsↄ̃ntɛ̃an mɛ́ɛ ń ee, zaa gulezĩan mɛ́ɛ wɛ́ɛ siińlɛ. Gbɛ̃ pìnↄↄ kú ńdona, aↄ̃ ń zĩnda dìɛ ńdona kↄ̃n bori pãndenↄ.

¹⁰Yakubu boriinↄↄ pari lán bùsu'ãatɛ̃ bà, weé fↄ̃ wà Isarailinↄ naro wà ń lɛ́ dↄ̃ro. Luda tó ma gaa gↄ̃ dɛ lán a gbɛ̃nↄ pↄ́ bà, ma yãana gↄ̃ dɛ lán ń pↄ́ bà.

¹¹Ben Balaki bènɛ: Ń kɛ̀mɛ dian gwee? Ma mↄnyo lɛ ǹ ma ibɛɛnↄ kámɛ, ben sa maaan ń òńnɛↄ́?

¹²À wèàla à bè: Yã kɛ̀ Dii dàmɛ ma lɛ́nn mɛ́ oroo?

¹³Balaki bènɛ: Ǹ mↄ́ wà gá gu pãndea, guu kɛ̀ nɛ́ ń en. Ǹ ń kámɛ gwe, zaakɛ aↄ̃ kpadoon nɛ́ e, nɛ́ ń e ń píngiro.

¹⁴Ben à gàao gudãkparinↄ guun Pisiga kpii mìsↄ̃ntɛ̃a. À gbãgbãkii bò gwe mɛ̀n swɛɛplaa, ben à saa òḿma píngi kↄ̃n zùswareeo kↄ̃n sãkaroo.

¹⁵Ben Balamu bènɛ: Ǹ zɛ n sa'opↄzi kɛ̀, mɛ́ gá mà à le gwe.

¹⁶Ben Dii mↄ̀ à yã dànɛ à lɛ́n, ben à bènɛ: Ǹ ɛara ǹ gá ǹ Balaki le ǹ onɛ lán má dànnɛ nà.

¹⁷Ben à ɛ̀ara à gàa à à lè zɛna a sa'opↄzi kↄ̃n Mↄabu kínɛnↄo. Balaki à là à bè: Dii bè diamɛ?

¹⁸Ben à yã kɛ̀ à è ò à bè: Zipo nɛ́ Balaki, ǹ swã kpá ǹ ma yã ma!

¹⁹Luda nɛ́ gbɛ̃nteenlo gbasa à ɛgɛɛ to, è nↄ̀sɛ liɛ lán busãnsi bàro. Eé gí yã kɛ̀ à ò kɛziↄ́? Eé gí lɛ́ kɛ̀ à gbɛ̃̀ńnɛ papaziↄ́?