Naokɛa 23:7-19

⁷ↄ̃ à yã́ pↄ́ á è ònɛ́ à mɛ̀: Mↄabuↄ kí Balaki ma sisi Sili bùsuu, ↄ̃ ma bↄ gukpɛ gbɛ̀sĩsĩↄ musu ma mↄ. À mɛ̀ mà bↄɛ Isailiↄ kpɛ, mà mↄ savãi'oɛ Yakↄbu buipiↄnɛ.

⁸Kpelewa má gbɛ̃́ pↄ́ Lua i ń kaoↄ kai? Kpelewa má bↄ gbɛ̃́ pↄ́ Dii i bↄ ń kpɛoↄ kpɛi?

⁹Za gbɛ̀ misonaa málɛ ń e, za gbɛ̀sĩsĩ musu málɛ wɛsińlɛ. Gbɛ̃́piↄ kua ńdoa, aa dodoa kↄ̃ɛ ń buipãleↄɛ.

¹⁰Yakↄbu buiↄ dasi lán ũfãawa, wa fↄ̃ Isailiↄ nao wà ń lɛ́ dↄ̃o. Lua to mà ga a gbɛ̃́ↄ gaawa, mà láa an láaawa.

¹¹Ɔ̃ Balaki òɛ̀: Ń kɛ̀mɛɛ kpelewan wei? Ma mↄnnↄ ǹ ma ibɛɛↄ kamɛɛ, ↄ̃ samaa ń ònɛ́a?

¹²A wèwà à mɛ̀: Yã́ pↄ́ Dii dàmɛɛ ma lɛ́u ↄ̃ má oo lò?

¹³Balaki òɛ̀: Mↄ wà gɛ́ gupãlei, gu pↄ́ ńyↄ̃ ń eu, ní ń kámɛɛ we, asa an kpɛdo ń è, ni ń e píio.

¹⁴Ɔ̃ à gɛ̀aànↄ gudↄ̃anaↄ bua Pisiga gbɛ musu. À gbagbakĩi bò mɛ̀n sopla, ↄ̃ à sa'òmá píi ń gáaeo ń sãsao.

¹⁵Ɔ̃ Balaaũ òɛ̀: Zɛ n sa'obↄi la, mí gɛ Dii le we mà gwa.

¹⁶Ɔ̃ Dii mↄ̀ à yãdàɛ̀, ↄ̃ a òɛ̀: Ɛa gɛ ǹ Balaki le, ní oɛ̀ màa.

¹⁷Ɔ̃ à ɛ̀a gɛ̀ à aà lè zɛa a sa'obↄi ń Mↄabu kíaↄ. Balaki aà là à mɛ̀: Dii mɛ̀ kpelewa ni?

¹⁸Ɔ̃ à yã́ pↄ́ á è ònɛ́ à mɛ̀: Zipoo nɛ́ Balaki, swã́kpa ǹ ma yãma!

¹⁹Luaá gbɛ̃nazĩnaɛ kɛ́ aà gbasa ɛɛtoo, ìli lɛlilɛ lán gbɛ̃nazĩnawao. Ìli yã́ pↄ́ á ò kɛo lé? Ìli zĩkɛ lɛ́ pↄ́ á gbɛ̃̀wao lé?