Masatarangana 23:7-19

⁷Ashiri Balamsha tárangiya. Nuw tsapunshish, yap zar yaku amb, Aramush taaranguri, kurak Balak Mowabshuch tputs nuwaa kuruzurangiya. Ning nuwash kusangcha. Kuseerush, nee tputs Israelchichee zutayaru kasachpa, tárangu, Akoparinchichee tputs mantsir tsiyatamaam zandarangiya, tárangiya.

⁸Itaru, nuwsha ¿Tamari amb sheeruri, tputssee zutambeeruri kasachee? ¿Antaati nuwaa Apanll; Tputssee zutambeerush ksangi, ateeja? nuw amb ashtapi. ¿Antaati Apanll nuwaa mantsirimash chinamaam kamachtakeeja? Apanll nuwaa wanasirimshireetsima kamachtarangiya. ¿Tamari nuw Apanllee kuk kapeetchee?

⁹Nuw machimand káreeruri, naparanguri parangtana. Tputs wazapansincha. Nuw ashpa tputs patareezi. Waanapa Apanll tiptsiriya. Napa, ashpisin taarana minpicheewtampasinaya tsapuranas tputsiya.

¹⁰Izuuru ashpiri tsap puyumboo, ¿tamari ashpa tputs taachchich? Ashirucha, nuwsha anungaz támarakuri, tamangsinda tsipapi nuwsha ambitam ashtapi túri támarakshina, Balam Balakaa tárangiya.

¹¹Kuraksha Balak Balamaa tárangiya; Nuw shiyaa kundarareemi tuztamaam kuruzurangina. Shiyshat nish ¿tamakshasha? ¿mangutaritashuwa pakatush kusarangshawa? Napa; anoow tputs shiy kis chinampatari tsiyataksha. Nuw anoomaja shiyaa kuruzurangi, tárangiya.

¹²Tárangu, Balamsha; Zuraksha. Nuw tárangina shiyaatsi; Yuwamaritam Apanll nuwaa kamachtaku anootsiritam nuw tsiyatkina, tárangiya.

¹³Itaru, Balaksha anoo nda kis mazinamaam zandarangu; Ashiri pzaya. Yusur nuwapasha ipuneeruni, piyamsha mach naayani. Iturpiyaruni pakeeni. Amb naayaruch, pamaam waritartamparee. Itaru, nda ashparta tputsi nda pangachchee. Chawpimaritaa zutayarush ksangi atina, tárangiya.

¹⁴Táyaranllu, kurak Balak Balamaa piyamsha mach machirangiya mach sur Pisgapshita. Ambiri machimun káriranganaya. Anumun káreersin, ambirisha yusur, maacheetsi muchpani, atusin, patumbchee yáyarusin, arangich tsimbun matayaru xanatarangana. Sheersin, wakar wip, opeejaatstam karupan Apanlleem muchiranganaya.

¹⁵Ashiramchusin, yusur Balam kurakaa Balaka tárangiya; Ashiri shiy musá neetsiritamapa nishuri patumbchirishish xanatamash kutapandama. Nuwma nuwaanitarisha naayaruni, pangatama, yapeeja Apanll nuwaa yusur chamayangachinda, tárangiya.

¹⁶Táyaranllu, waanitarisha naatarangiya. Anushsha apus Apanll Balamaa chamayangayaru tsiyatarangiya. Natu wapitam kanapeerush, kamanishini kurakaa Balakaatsi yuwaa shiyaa tsiyatarangi anootsi. Ashpari tatsamooru kamaningcha. Yaptam shiyaa tárangi anooritam kamaningcha, Apanll Balamaa tárangiya.

¹⁷Balamsha wapitam kanapeeranllu, yusur Balakaa chamayangarangiya. Balaksha anshuritam tiptsirpa Mowabshuchpa tputs Balamaam kutaksin, shanee ashiranganaya. Balak kutaku, xixeew ashirangiya. Balak anush yusur masharangiya; ¿Natuwa, Apanll shiyaa amkimta? tárangiya.

¹⁸Balamsha ashparitam yuwaa Apanll tárangu anoo kamanirangiya. Shiy Balakaa, Siporarini wipaa, nuwaa kuki kaapa mazinangandama;

¹⁹¿Nitaati Apanll chiy tputssich tamapari ashireeja? Apanll nllitari chinamaam nda yasariya. Nduntam ngichimaam yasariya. Yuwaatsimari tsiyataku anootsimari payukiya. Urutamari kukoo tumineernand kasatariya.