Namba 23:7-19

⁷Go Bileam gêôc awa sa ma kêsôm gebe “Lau Moab nêŋ kiŋ Balak kêkôc aê aŋga lôc oc kêpiŋa Aram gamêŋ ma kêsôm gebe ‘Ômôêŋ ôpuc boa Jakob êtu aêŋa. Ômôêŋ ônac jatu Israel.’

⁸Mago aê japuc boa ŋac, taŋ Anôtô kêpuc boa eŋ atom naŋ, amboac ondocgeŋ.

⁹Gebe aê kakô lôc ŋatêpôê ma galic eŋ, kakô gamêŋ ŋabau ma matoc gê eŋ. Lau-m teŋ, tê sêŋgôŋ nêŋ ŋasawa teŋ tauŋŋa nê, sedec gebe sêŋgôŋ sêwiŋ lau samuc.

¹⁰Asa kêtôm gebe êsa Jakobnê kekop sa. Asa kêtôm gebe êsa Israelnê lau ŋatoŋ sa. Aê jamac êndu jatôm lau gêdêŋ ma janac dabiŋ ŋoc lêŋ êtôm êsêac sêjac dabiŋ nêŋmaŋ.”

¹¹Go Balak kêsôm gêdêŋ Bileam gebe “Aôm gôgôm aê amboac ondoc. Ôlic acgom, aê kakêŋ biŋ aôm gebe ôpuc boa ŋoc ŋacjo, mago galoc aôm gôjam mec êsêac.”

¹²Bileam gêjô eŋ awa gebe “Amboac ondoc, aê taŋoc wamu ma jasôm biŋ, taŋ Apômtau kêkêŋ kêsêp aê aocsuŋ naŋ, atom me.”

¹³Balak kêsôm gêdêŋ eŋ gebe “Mêŋôwiŋ aê ma aêagêc tana gamêŋ teŋ. Aŋga ônê aôm oc ôlic Israel, mago ôlic samucgeŋ atom, ôlic ŋagêdô, taŋ mêŋkêsi aêacŋa naŋgeŋ. Ma aŋga tônê ôpuc boa êsêac êtu aêŋa.”

¹⁴Ma eŋ gêwê Bileam kêpi dibwaganêŋ kôm, taŋ gêc lôc Pisga ŋatêpôê naŋ, gêja. Go eŋ gêboa altar 7 sa ma kêkêŋ bulimakao kapoac teŋ ma domba kapoac teŋ kêtu daja gêsac altar 7 tau ŋaô kêtômgeŋ.

¹⁵Go Bileam kêsôm gêdêŋ Balak gebe “Ôkô ôwiŋ nêm daja, ma aê najalic Apômtau aŋga lôc ŋamakeŋ ônêŋa.”

¹⁶Ma Apômtau mêŋgêlic Bileam ma kêkêŋ biŋ kêsêp eŋ awasuŋ ma kêsôm gebe “Ômu ôndêŋ Balak ôna ma ôsôm biŋ tonec.”

¹⁷Go Bileam gêmu gêdêŋ Balak gêja ma Balak to lau Moab nêŋ kasêga samob sêkô sêwiŋ ênê daja. Ma Balak kêsôm gêdêŋ eŋ gebe “Apômtau kêsôm biŋ amboac ondoc.”

¹⁸Go Bileam gêôc awa sa ma kêsôm nê biŋ tau gebe “O Balak, ôndi ma ôŋô biŋ. O Sipor latu, ôkêŋ taŋam aê.

¹⁹Anôtô eŋ ŋamalac atom, gebe ênsau biŋdansaŋ. Eŋ ŋamalac teŋ latu atom, gebe ênam nê biŋ ôkwi. Biŋ, taŋ eŋ kêsôm naŋ, gêgôm kêtu anô atom me. Biŋ, taŋ eŋ gêjac mata naŋ, gêgôm ŋanô kêsa atom me.