Miti Mânec 73:5-17

⁵Wiac babasa me ʒârâ ʒâpâ, ŋic gâcne fua‐jareekac, izi ŋic keci jaŋe moc mi rocjopaekac.

⁶Irec maŋfefezi qoqonaŋ‐jeŋic ekac, â pepeczi ŋaqi‐jeŋic eme rojueŋgopieŋ.

⁷Wokemaŋzi ʒâŋe mai‐jeŋic âke fusucmame wefurâ ŋeekac, â bujeŋickonec wiac repicne huhuckeme wefuekac.

⁸Jaŋe âke sisic dâŋ hâtâne mueŋgopieŋ, â pepec ehuc ŋic fejareniŋte ejareekac.

⁹Masu‐jeŋic bâfeŋnerâ sambâŋkopec dâŋ mupie feekac, erâ nameŋ‐jeŋiczi mâreŋko wiac fokac i kosa mu surec eeŋgopieŋ.

¹⁰Eme ŋic jaŋe ine mana‐jarepie sâckeekac, eme mumbiaŋ‐jopaeŋgopieŋ.

¹¹Ʒiŋuc mueŋgopieŋ: “Anutuzi wemocko manaocmu? Femicne sâko erao mamana fokac me?”

¹²Kec, manaŋgopieŋ, sindaŋŋic fuŋne‐jeŋic iŋuc fokac. Erâ wiac mocte mana mezac mi ehuc, moneŋ‐jeŋic basaweeŋgopieŋ.

¹³Jei, no maŋnane maŋgâŋ soŋaŋkepe ɋaɋacne fowec, â menane ʒure ɋaɋackepe wânâŋ mi bohotawec.

¹⁴Anutu, goki manahaŋtec ʒoaŋ ʒora ʒâic fua‐nare jujec, â hae fureme sâc kâcbiŋ kihuc jupo.

¹⁵No ʒiŋuc muzapo: “Dâŋ muŋgopieŋ ijaha mupe,” ine fuŋfuŋfâcge maŋzi behec‐jopazapo hâcne.

¹⁶Irec wiac i mana tarapemurâ mamanasu gie bapo; erâ manape quŋkeme emâmâŋkepo.

¹⁷Izi Anuture dâŋbiri soŋnere maŋnao raʒirâ, miŋecne ŋic sindaŋne jaŋere hata tofane hone tarapo.