Miti Mânec 49:1-17

¹Ŋicne ŋicne ŋoŋe dâŋ ʒi mananiŋ, mâreŋte ŋecjucfâc sasawa, hazec râeniŋ!

²Ŋic omane mecne, ŋicbomboŋ mecne, mafahec â hapetac mâmâc sasawa.

³Micbipic‐nanezi maŋɋârâŋ dâŋ mufuaocmu, maŋzi mana wosâehuc dâŋ hukicne bâwirickepemu.

⁴Mu qâqiŋ dâŋte hazec râepemu, musi fânâŋ manahuc kesaic dâŋnane mutaniŋkepemu.

⁵Ʒârâ hâriŋ dameŋko râsifâc‐nane jaŋe qaisocnuhuc jâpe orâŋ enarepie wemocko hâwicnuocmu?

⁶Ŋic i jaŋe mâriri‐jeŋicte mamanac jueŋgopieŋ, â mafa sâko‐jeŋicte penaroŋ eeŋgopieŋ.

⁷Ŋic moczi e jahacne kiwiric sâcne mi roocmu i! Â juju‐ticnere furi Anutu wâc mi bazucneocmu.

⁸Jujure furi i fekicne sâko, roipiehuc juha dameŋ omaeocmu.

⁹Irec juju sanaŋ sâcne mi juocmu, â nombâŋ geŋkeocte eipieocmu.

¹⁰Mamanahec jaŋe wâc hâmopie honeocmu, mutucne â kâpâne jaŋe mâmâc siroweniŋmu, ehuc moneŋ mafa‐jeŋic gâcne behe‐jareniŋmu.

¹¹Jaŋacne ʒâŋezi mâreŋ sâko gâcne wase bambiŋ ŋic iŋucne jaŋe wâc ʒâŋeruŋzi ŋeŋe hae sanaŋ‐jeŋic eocmu, eme ira dameŋne dameŋne fohuc juniŋmu.

¹²Ŋiczi juju saricko mi jurahuc juocmu, e qowi siroweeŋgopieŋ jaŋere sâc.

¹³Ine mutuc erâ jaŋacne mamanac jueŋgopieŋ, jaŋere hata i hâcne; â wiac fojarekac irec mana biaŋkeeŋgopieŋ, jaŋe iŋucko tara‐jarezokac.

¹⁴Jaŋe lama iŋucne hâmoc haeo râec‐jopazo, eme hâmoczi soŋaŋ‐jeŋic eocmu. Ʒâŋeruŋko hupie sahac hawari‐jeŋic ʒaŋkeocmu, hâmoc haezi ŋeŋe juju‐jeŋic eocmu.

¹⁵Anutuzi ine maŋ qâqâtâc‐nanere kiwiric roocmu, ehuc hâmoc haere tâpirionec bataracnuocmu, eki hâcne no rocnuocmu.

¹⁶Irec ŋic moc e mafa sâkohec eocmuo, â gorewac‐ticnere ʒâŋe biŋe feocmuo, go irec mi mezacguzejec.

¹⁷E hâmohuc wiac moc mi amecke raocmu, â ʒâŋe biŋe‐ticnezi mi bâjâpeocmu.