Miti Mânec 44:12-21

¹²Go ŋicfâcge wiac afecnere qikiŋ‐jopameŋ, furine ŋemâcne bazu‐gareniŋte mi mumeŋ.

¹³Goki manahaŋ mendâŋ‐nâŋecko juŋgopieŋzi âke sisic enâreeŋgopieŋ, ŋicguru rârec rârec mu ruruc enârehuc gâwie‐nâreeŋgopieŋ.

¹⁴Goki enâretec qâpuc ŋicne ŋicne jaŋere mu qâqiŋ embeŋ, â ŋicne ŋicne jaŋe mana wahac‐nâpohuc gâwie‐nâreeŋgopieŋ.

¹⁵Ŋafe ʒoaŋ sâc mimizi ŋecnukume, ʒâŋe mai‐nane bâsoŋkehuc dunduŋ dadape juekopac,

¹⁶i âke sisic â mumusoriŋ ŋic dâŋjeŋic manahuc juekopacte, â râsi â qaqaisoc ŋic honec‐jopahuc juekopacte iŋuc eekopac.

¹⁷Nâŋe gore mi nikec‐nâpoha, â ʒâʒâficge mi hetâcnehuc eatucguhapene, wiac sasawa i sifu fai‐nâŋecko fewec.

¹⁸Maŋnâŋeczi go mi râpecguhame, â kike‐nâŋeczi hatage mi kizuhame,

¹⁹go sifu kâte qâto jaŋere hae mâreŋko qanʒaŋ‐nâpohuc duŋdapâc maŋnao râec‐nâpomeŋ.

²⁰Anutu ʒâŋegere nikec‐nâpozacko, me nemuɋâŋ jabane numu hefârec ejarenʒapeŋko,

²¹Anutu goki mi hone tarac‐nâponʒaŋ me? Go ŋicmaŋko dâŋ soŋne mana jaŋgeŋkeekic i!