Miti Mânec 139:3-23

³Hata juju‐nane â fofomana‐nane ba esâic ecneekic, â wiac eenanere kâuc moc mi baekic.

⁴Â dâŋ moc nameŋ‐naneo mi fua tâcneha, Wofuŋ, goki biac paŋʒâic jaha mana jaŋgeŋkeekic.

⁵Go râpe‐naneo â mai‐naneo somâcnuekic, â mege nore faio râeekic.

⁶Wiac irec fuŋne qame hukicne ehuc siricnukac, â fekicne jâmbâŋ ekacte manapemurâ qatataŋnekopac.

⁷No Mâroge beherâ wena moc razapo? Me ʒâŋe maige wisecnehuc wena moc soŋkezapo?

⁸Sambâŋko fezapoo go ira maicnunʒaŋ; hâmoc haeo hu fozapoo go bâfuacnunʒaŋ wâc.

⁹Furic qânikiŋte fakec faio raku, hâwec qaŋeŋnao fisi ŋezapoo,

¹⁰ine ira wâc gore mezia jowa qataŋ enarezac, â mefâregezi bâwâzâŋnuzac jaha.

¹¹No ʒiŋuc muzapo: “Duŋdapâczi bârârâŋnuoc, â tatamac forakac i ŋafe‐fâreoc,”

¹²eme sifu dapâczi gore maio dapâc mi ezac, â ŋafe i honetec ʒoaŋ jaha ezac; dapâczi gorao tatamac hawari eekac hâcne.

¹³Goki hâcne râpe hândâŋ‐nane ba akic emeŋ, neŋgoc bumaŋko go gahac fuŋkerâ qâhâcnumeŋ.

¹⁴Go mâsi qâreŋge qeŋ bipinehecte daŋge gazakopac, wiac bapage qame hukicne! Maŋ qâqâtâc‐nane wâc hone jaŋgeŋkeekic.

¹⁵Me kike‐nanere fuŋnere kâuc mi baekic; no soŋsoŋko bâfuacnukicne, neŋgocte bumaŋko basaricnukicne.

¹⁶Ʒâŋegezi juju‐nanere bâpâŋ honemeŋ, â gore papiao mâreŋko juju‐nanere ʒoaŋ gie bapa dameŋ i qanaŋ birickekicne fowec.

¹⁷O Anutu, mamanasugere manape furi sâko ekac! Ʒare‐ticne i qeŋ bipinehec!

¹⁸Wemocko wosezapo, moŋgeŋ sirickekac! No mana ɋâɋârerâ gohec jaha jupemu.

¹⁹O Anutu, go ŋic sindaŋne jopanʒaŋ me, â socnânâ jaŋe behecnu ranʒapiŋ me!

²⁰Jaŋe hâcne ʒaubac egareeŋgopieŋ, jaŋe sâqocne maŋkehuc pepec egareeŋgopieŋ.

²¹O Wofuŋ, gore takic‐jopaekic i jaŋere mi takicnukac me? Â go musuacgueŋgopieŋ jaŋere mi mamakâcnukac me?

²²Jaŋere mamana sâqoc fârine bajukopac, mana‐jarepe râsifâc‐nane eŋgopieŋ.

²³O Anutu, ba esâic enarerâ maŋnanere fuŋne manac, esâicnurâ mamanasu‐nane mana jaŋgeŋkec.