Miti Mânec 119:87-166

⁸⁷Jaŋe mâreŋko juju‐nane hetâcnezo embieŋ, eme sifu mumutâc dâŋge mi behekopac.

⁸⁸Go aki anonocgere erâ juju‐nane akickec; eme no micgere mumutaniŋ dâŋ reŋkezepac.

⁸⁹O Wofuŋ, gore dâŋ i sambâŋko sanaŋne keteŋkekicne fokac.

⁹⁰Jauŋ fârige mimiŋzi ɋâric fosanaŋkekac; â mâreŋ ine hobeteŋne râemeŋte ŋesanaŋkekac.

⁹¹Gore micdâŋte miŋecgac ŋekac jaha â wiac sasawa jaŋe go kiŋaŋ qagareŋgopieŋ.

⁹²Sâcmutâc dâŋgezi bubiaŋ mi qanarezacko ine maŋʒâiczi sipiricnume omaezapo.

⁹³Mumutâc dâŋgere moc mi nikecnuzokac, izi hâcne bâgunucnutec juekopac.

⁹⁴Go runane jukomecte baficnuc, no mumutâc dâŋgere wiohuc juekopac.

⁹⁵Ŋic sindaŋne jaŋe nuniŋte somâ barâ foeŋgopieŋ, no ine mumutaniŋ dâŋge maŋkehuc juekopac.

⁹⁶Wiac qarâ biaŋ sasawa i sifu babahacne fuame honeekopac, gore sâcmutâc dâŋzi ine roma roma bakicne.

⁹⁷Sâcmutâc dâŋgere aŋacnuekac i fuŋmoc jâmbâŋ! Ʒoaŋ ʒora mana utuckehuc juekopac.

⁹⁸Sâcmutâc dâŋgezi maŋɋârâŋ bâfua‐narekume, râsifâc‐nane siric‐jopaekopac; no tofamâc maŋke juekopac hâcne.

⁹⁹Mamanahec ehuc qaqazufâc‐nane qâhuc‐jopaekopac, mumutaniŋ dâŋge mana utuckeekopac irec hâcne.

¹⁰⁰Wiac mana wosâehuc ŋicraŋɋa siric‐jopaekopac, mumutâc dâŋge hone jaŋgeŋkekopac irec hâcne.

¹⁰¹Kike‐nanezi hata sâqocne i me i âtezacte aka hecneekopac, i dâŋge reŋkepemurâ iŋuc eekopac.

¹⁰²Go mumutâc dâŋge qazu‐naremeŋte, no moc mi râpeckeekopac.

¹⁰³Dâŋge manape aŋac ʒizine eekac, izi baŋacte aŋac sirickekac i!

¹⁰⁴Gore mumutâc dâŋzi mamana tara bâfua‐nareekac; irec hata hehesicne geŋke‐fâreekopac.

¹⁰⁵Dâŋgezi kike‐nane lambe ecneekac, â hata‐naneo tatamac bâfuaekac.

¹⁰⁶No mumutâc dâŋge tiŋne i bâjâpepemurâ, Anutu gore maio mupaŋkehuc mujomirepo.

¹⁰⁷No ro waha âte enarekicne; o Wofuŋ, go dâŋgere sâcko bâgunucnuc.

¹⁰⁸O Wofuŋ, no afeckehuc miczi taha bagarepe manatec sâckezejec, eme mumutâc dâŋge qazu‐narezemec.

¹⁰⁹No dameŋ sâc hâmoczi maicnuekac, ehame sâcmutâc dâŋge mi nikecnuekac.

¹¹⁰Ŋic sindaŋne jaŋe bitiŋ râe‐narembieŋ, no ine mumutâc dâŋge mi râpeckekopac.

¹¹¹Mumutaniŋ dâŋgezi merâfâc fofo sanaŋ‐nane ekac; ŋicbureŋ, i buhândâŋ‐nane ekac.

¹¹²No dâŋsanaŋge reŋkepere maŋnane qafeŋkekopac, i dameŋ sâc eraku etarapemu.

¹¹³Ŋic maŋ sosohoc jaŋere takicnuekac, sâcmutâc dâŋgere ine aŋacnuekac.

¹¹⁴Go dapeŋ‐nane â maro‐nane, no dâŋge maŋzi worickekopac.

¹¹⁵Sâqocne bapa, ŋoŋe behecnu raniŋ, eme Anutu‐nanere sâcmutâc dâŋ reŋkepe.

¹¹⁶Mumupaŋgere sâcko dopecnutec juzepac, eme mamanac‐nanezi fârimâc eme mi qurutuazepac.

¹¹⁷Basanaŋnutec bâbâpiaŋ bâfuazepac, erâ dâŋsanaŋge ʒuʒuhuc jaha bajuzepac.

¹¹⁸Qâsoriehuc dâŋsanaŋge râpeckeeŋgopieŋ jaŋe behec‐jopaekic; jei, eeatuc gie‐jeŋic fârimâc eekac.

¹¹⁹Mâreŋko ŋic sindaŋne sasawa jaŋere manatec jawa eekac; irec mumutaniŋ dâŋgere aŋacnuekac.

¹²⁰Go araŋ bagarehuc sahac‐nane gâgâmârâekac, â mumutara dâŋgere mezacnuekac.

¹²¹Wiac tiŋne â biaŋne ewarehuc jupo; irec bawahacnueŋgopieŋ jaŋerao mi qikiŋnuc.

¹²²Kiŋaŋŋicge no sacfozic enarec, ehuc penaroŋhec jaŋe mana‐jaretec mi bawahacnunʒepieŋ.

¹²³Mumupaŋge tiŋne irec fârine fuaocte ʒâŋe‐nanezi fiipieku betaŋkekac.

¹²⁴Kiŋaŋŋicge no aki anonocgere sâcko wiac enarec, ehuc dâŋsanaŋge qazu‐narec.

¹²⁵No kiŋaŋŋicge jukopacte mamana tara tahacnuc, eme mumutaniŋ dâŋge mana jaŋgeŋkezepac.

¹²⁶Ŋic jaŋe sâcmutâc dâŋge huckembieŋ; irec Wofuŋ goki okacne bazu‐jarecmurâ dameŋne maickekac.

¹²⁷Irec no sâcmutâc dâŋgere fehuc aŋacnukac, gol â gol ematauckekicne irec aŋac‐nane wahakac.

¹²⁸Erâ no mumutâc dâŋgere sâcko hata tiŋne juekopac, burec hatane hatane irec takicnuekac.

¹²⁹Mumutaniŋ dâŋge i eri‐ticnehec; irec maŋnanezi ira qohotaekac.

¹³⁰Dâŋgere fuŋne ritupie tatamac fuaekac, eme ŋic maŋhumuc jaŋe wiac mana jaŋgeŋkeeŋgopieŋ.

¹³¹No sâcmutâc dâŋgere boc enareekacte maŋhâhâŋ ehuc micaaŋ jukopac.

¹³²Norao fotikierâ aki anonoc enarec; ʒâŋegere aŋac‐jopaekac jaŋe iŋuc hâcne ejareekic.

¹³³Dâŋgere sâcko hata âte ʒakierâ juzepac, eme wiac hehesicne moczi ŋicbomboŋ mi enarezejec.

¹³⁴Ŋic jaŋe bawahacnunʒipiŋte jaŋeraonec bataracnuzemec, eme no mumutâc dâŋge bâjâpezepac.

¹³⁵Ʒâŋe maigezi kiŋaŋŋicge no tamae‐narezejec, ehame dâŋsanaŋge qazu‐narezemec.

¹³⁶Ŋic jaŋe sâcmutâc dâŋge mi reŋkeeŋgopieŋte ʒâŋeuc‐nane fusinehec wahahuc foekac.

¹³⁷O Wofuŋ, go tiŋne rune, â okac babazuge sâckoa fuaekac.

¹³⁸Go mumutaniŋ dâŋge sâcticne manahuc basanaŋkemeŋ, jauŋ fârigere sâcko jâmbâŋ.

¹³⁹Kisâfâc‐nane jaŋe dâŋgere nikec‐jopakacte no bunane bâruŋkekac.

¹⁴⁰Mumupaŋ dâŋge i esâicke tarakicne, irec kiŋaŋŋicge noni maŋzi jauŋkekopac.

¹⁴¹No ŋic omane â qarâ suriŋne, erâ sifu mumutâc dâŋge irec mi nikecnuekac.

¹⁴²Tiŋnege i tiŋne fofo sanaŋ, â sâcmutâc dâŋge i dâŋ fâri qizecne.

¹⁴³Ʒâic â ʒârâ hâriŋ bâfuacnuekacko sâcmutâc dâŋgezi bubiaŋ bâfua‐nareekac.

¹⁴⁴Gore mumutaniŋ dâŋ i tiŋne fohuc juzokac, irec mamana tara bâfua‐narec, eme sâcne jupemu.

¹⁴⁵No maŋ hâcbuc jaha wira‐garekopac: Wofuŋ, go mana‐narec. No dâŋsanaŋge reŋkehuc jupemu.

¹⁴⁶No wâsicgukopac: Go baficnuc; eme no mumutaniŋ dâŋge soŋaŋkepe.

¹⁴⁷No hae mi fureha fahare wira‐gareekopac; erâ dâŋgere woŋec juekopac.

¹⁴⁸Ŋafe ʒora ɋâricne fohuc juekopac, ehuc mumupaŋ dâŋgere manatâc qâtâc eekopac.

¹⁴⁹Aki anonocgere erâ marac fânâŋ‐nane manac; o Wofuŋ, mumutiŋgere sâcko juju‐nane hone maiŋ ezemec.

¹⁵⁰Dâŋ qanareeŋgopieŋ ŋic i jaŋe bâjâpecnuŋgopieŋ; sâcmutâc dâŋge ine râpeckerâ jueŋgopieŋ.

¹⁵¹Wofuŋ, go ine bâqiŋnurâ jukomec. â sâcmutâc dâŋge i fârinehec sasawa.

¹⁵²Mumutaniŋ dâŋgezi mârâc jaha mufuame manapo; Gore dâŋ i fofo sanaŋ foocte râemeŋ.

¹⁵³Ʒârâ hâriŋ‐nane honerâ bataracnuc, no sâcmutâc dâŋgere mi nikecnuekac.

¹⁵⁴Dâŋnane muku firuecnuzemec, erâ mumupaŋgere sâcko juju ɋâricne tahacnuzemec.

¹⁵⁵Ŋic sindaŋne jaŋe bâbâpiaŋzi mi bâqiŋ‐jopaekac, jaŋe dâŋsanaŋge qâoma ecneeŋgopieŋ.

¹⁵⁶O Wofuŋ, go buurucge ɋârâŋne, irec mumutiŋgere sâcko juju tahacnuzemec.

¹⁵⁷Bocjahazi fific guguriŋ â râsi enareeŋgopieŋ, eme no ine mumutaniŋ dâŋge mi beheekopac.

¹⁵⁸No nâme nikecne honec‐joparâ mamakâcnuekac, jaŋe sâcmutâc dâŋge mi reŋkeeŋgopieŋte.

¹⁵⁹Fitec wareme honec, no mumutâc dâŋge âgo ecnekopac. Wofuŋ, go aki anonocgere sâcko juju ɋâri bâfua‐narezemec.

¹⁶⁰Dâŋge sasawa qâhâckerâ ʒâŋene dâŋfâri muzo, â mumutâc dâŋge tiŋne i fofo sanaŋ fofâreocmu.

¹⁶¹Ŋic fekicne jaŋe maŋgâŋ fific guguriŋ enareeŋgopieŋ, nore maŋzi ine dâŋgere maname bipinehec eekac.

¹⁶²No mumupaŋ dâŋgere bubiaŋ manaekopac, i mafa sâko bâfuahuc bubiaŋ manaeŋgopieŋ irec sâc.

¹⁶³No burecdâŋte takicnuekac â mamakâcnuekac, sâcmutâc dâŋgere ine aŋac manaekopac.

¹⁶⁴Gore mumutâc dâŋ tiŋne irec erâ ʒoaŋ sâc arec 7 mumbiaŋguekopac.

¹⁶⁵Sâcmutâcgere aŋac‐jopaekac jaŋe juju biaŋ bâfuaeŋgopieŋ, hata jupie wiac moczi mi fâfâc‐jopaekac.

¹⁶⁶No Wofuŋ gore bâbâpiaŋte mamanac jukopac, ehuc sâcmutâc dâŋge reŋkehuc juekopac.