Miti Mânec 119:56-136

⁵⁶Mumutâc dâŋge bajukuhape, wiac fâri biaŋ i fua‐narewec.

⁵⁷Wofuŋ, go kâdoc biaŋ‐nane; irec no dâŋge bajuzo mupaŋkekopac.

⁵⁸No maŋ hâcbuc jaha numu‐garekopac: “Mumupaŋgere sâcko aki anonoc enarec.”

⁵⁹Go wiac eekic no irec manasurâ, mumutaniŋ dâŋge mana maŋ ezo enarekac.

⁶⁰No ŋeŋec ʒeʒepec mi ehuc fâro barâ sâcmutâc dâŋge reŋkeekopac.

⁶¹Ŋic sindaŋne jaŋere uficzi orâŋnume, sifu sâcmutâc dâŋgere mi nikecnuekac.

⁶²No ŋafe ʒâʒâŋiŋko faharerâ, mumutâc dâŋge tiŋne irec mumbiaŋguekopac.

⁶³Araŋ bagarehuc mumutâc dâŋge reŋkeeŋgopieŋ jaŋe âgo ejare‐fâreekopac.

⁶⁴O Wofuŋ, aki anonocgezi mâreŋ fusucmawec; irec go dâŋsanaŋge qazu‐narezemec.

⁶⁵O Wofuŋ, go mumupaŋ dâŋgere sâcko kiŋaŋŋicge no ehâmo‐naremeŋ.

⁶⁶No sâcmutâc dâŋge mana ʒakiekopacte maŋɋârâŋ â mamana tara qazu‐narezemec.

⁶⁷Go mi bawahacnuhaŋ qac qâsoric ehuc jupo; ʒiŋuczia ine dâŋge bâjâpekopac.

⁶⁸Go uruc jauŋgeheczi eehâmo gie baekic, irec dâŋsanaŋge qazu‐narezemec.

⁶⁹Pepec‐jeŋicheczi micko âkec enarembiŋ, no ine mumutâc dâŋge maŋ hâcbuc jaha honehuc juekopac.

⁷⁰Maŋjeŋic râŋgeŋkerâ mumuŋ jâc sahac iŋucne ewec; no ine sâcmutâc dâŋgere bubiaŋ fonarekac.

⁷¹Goki sowine bawahacnumeŋ; iŋuc etecne dâŋsanaŋgere fuŋne manapo.

⁷²Gol â siliwa guru sâkore manape wahaha micgere sâcmutâc dâŋte manape fekac.

⁷³Megezi sahac‐nane bâfuarâ ba akic emeŋ; ʒi ine mamana tahacnutec sâcmutâc dâŋge manazepac.

⁷⁴Araŋ bagareeŋgopieŋzi honecnurâ aŋac‐jopaocmu, noni dâŋge worickehuc jupo hâcne.

⁷⁵O Wofuŋ, no manakopac, okac babazuge tiŋne, go jauŋ fârigere erâ bawahacnumeŋ.

⁷⁶Aki anonocgezi bâmiriŋnuzejec, kiŋaŋŋicge no mupaŋke‐naremeŋ irec sâcko.

⁷⁷Buurucgezi fisi iqicnume juzepac; sâcmutâc dâŋge mana ʒiziweekopac i.

⁷⁸Pepecnehec jaŋe maŋgâŋ ro waha âte enarembiŋte, goki mimi qaqa ejarezemec; no ine mumutâc dâŋge manasuhuc jupemu.

⁷⁹Araŋ bagareeŋgopieŋ â mumutaniŋ dâŋge maŋkeeŋgopieŋ, jaŋe ejaretec norao ʒuhuckenʒepieŋ.

⁸⁰Maŋnanezi dâŋsanaŋgao paŋʒâic qohotazejec, eme moc mi qurutuazepac.

⁸¹Maŋ qâqâtâc‐nanezi bâbâpiaŋgere hâmohuc jukac, dâŋgezi fâri fideteŋ eocte woŋec juekopac.

⁸²Ʒâŋe‐nanezi mumupaŋgere fârine honeocte fiipieku betaŋkekac, ehuc wiokac: “Mo dameŋko bâmiriŋnuocmu?”

⁸³No ʒopo ʒuo foku hahaŋkeekac iŋucne epo, erâ sifu dâŋsanaŋgere mi nikecnuwec.

⁸⁴Kiŋaŋŋicge nore ŋafe ʒoaŋ wezimuc fokac? Fific guguriŋ enareeŋgopieŋ jaŋere dâŋ mo dameŋko mutaracmu?

⁸⁵Ŋic pepecne jaŋe wiwitic râe‐narembieŋ, sâcmutâcgere sâcko mi jueŋgopieŋ jaŋe hâcne.

⁸⁶Sâcmutâc dâŋge i dâŋ fârine sasawa; jaŋe ine bureczi nu jâpec eeŋgopieŋte baficnuc!

⁸⁷Jaŋe mâreŋko juju‐nane hetâcnezo embieŋ, eme sifu mumutâc dâŋge mi behekopac.

⁸⁸Go aki anonocgere erâ juju‐nane akickec; eme no micgere mumutaniŋ dâŋ reŋkezepac.

⁸⁹O Wofuŋ, gore dâŋ i sambâŋko sanaŋne keteŋkekicne fokac.

⁹⁰Jauŋ fârige mimiŋzi ɋâric fosanaŋkekac; â mâreŋ ine hobeteŋne râemeŋte ŋesanaŋkekac.

⁹¹Gore micdâŋte miŋecgac ŋekac jaha â wiac sasawa jaŋe go kiŋaŋ qagareŋgopieŋ.

⁹²Sâcmutâc dâŋgezi bubiaŋ mi qanarezacko ine maŋʒâiczi sipiricnume omaezapo.

⁹³Mumutâc dâŋgere moc mi nikecnuzokac, izi hâcne bâgunucnutec juekopac.

⁹⁴Go runane jukomecte baficnuc, no mumutâc dâŋgere wiohuc juekopac.

⁹⁵Ŋic sindaŋne jaŋe nuniŋte somâ barâ foeŋgopieŋ, no ine mumutaniŋ dâŋge maŋkehuc juekopac.

⁹⁶Wiac qarâ biaŋ sasawa i sifu babahacne fuame honeekopac, gore sâcmutâc dâŋzi ine roma roma bakicne.

⁹⁷Sâcmutâc dâŋgere aŋacnuekac i fuŋmoc jâmbâŋ! Ʒoaŋ ʒora mana utuckehuc juekopac.

⁹⁸Sâcmutâc dâŋgezi maŋɋârâŋ bâfua‐narekume, râsifâc‐nane siric‐jopaekopac; no tofamâc maŋke juekopac hâcne.

⁹⁹Mamanahec ehuc qaqazufâc‐nane qâhuc‐jopaekopac, mumutaniŋ dâŋge mana utuckeekopac irec hâcne.

¹⁰⁰Wiac mana wosâehuc ŋicraŋɋa siric‐jopaekopac, mumutâc dâŋge hone jaŋgeŋkekopac irec hâcne.

¹⁰¹Kike‐nanezi hata sâqocne i me i âtezacte aka hecneekopac, i dâŋge reŋkepemurâ iŋuc eekopac.

¹⁰²Go mumutâc dâŋge qazu‐naremeŋte, no moc mi râpeckeekopac.

¹⁰³Dâŋge manape aŋac ʒizine eekac, izi baŋacte aŋac sirickekac i!

¹⁰⁴Gore mumutâc dâŋzi mamana tara bâfua‐nareekac; irec hata hehesicne geŋke‐fâreekopac.

¹⁰⁵Dâŋgezi kike‐nane lambe ecneekac, â hata‐naneo tatamac bâfuaekac.

¹⁰⁶No mumutâc dâŋge tiŋne i bâjâpepemurâ, Anutu gore maio mupaŋkehuc mujomirepo.

¹⁰⁷No ro waha âte enarekicne; o Wofuŋ, go dâŋgere sâcko bâgunucnuc.

¹⁰⁸O Wofuŋ, no afeckehuc miczi taha bagarepe manatec sâckezejec, eme mumutâc dâŋge qazu‐narezemec.

¹⁰⁹No dameŋ sâc hâmoczi maicnuekac, ehame sâcmutâc dâŋge mi nikecnuekac.

¹¹⁰Ŋic sindaŋne jaŋe bitiŋ râe‐narembieŋ, no ine mumutâc dâŋge mi râpeckekopac.

¹¹¹Mumutaniŋ dâŋgezi merâfâc fofo sanaŋ‐nane ekac; ŋicbureŋ, i buhândâŋ‐nane ekac.

¹¹²No dâŋsanaŋge reŋkepere maŋnane qafeŋkekopac, i dameŋ sâc eraku etarapemu.

¹¹³Ŋic maŋ sosohoc jaŋere takicnuekac, sâcmutâc dâŋgere ine aŋacnuekac.

¹¹⁴Go dapeŋ‐nane â maro‐nane, no dâŋge maŋzi worickekopac.

¹¹⁵Sâqocne bapa, ŋoŋe behecnu raniŋ, eme Anutu‐nanere sâcmutâc dâŋ reŋkepe.

¹¹⁶Mumupaŋgere sâcko dopecnutec juzepac, eme mamanac‐nanezi fârimâc eme mi qurutuazepac.

¹¹⁷Basanaŋnutec bâbâpiaŋ bâfuazepac, erâ dâŋsanaŋge ʒuʒuhuc jaha bajuzepac.

¹¹⁸Qâsoriehuc dâŋsanaŋge râpeckeeŋgopieŋ jaŋe behec‐jopaekic; jei, eeatuc gie‐jeŋic fârimâc eekac.

¹¹⁹Mâreŋko ŋic sindaŋne sasawa jaŋere manatec jawa eekac; irec mumutaniŋ dâŋgere aŋacnuekac.

¹²⁰Go araŋ bagarehuc sahac‐nane gâgâmârâekac, â mumutara dâŋgere mezacnuekac.

¹²¹Wiac tiŋne â biaŋne ewarehuc jupo; irec bawahacnueŋgopieŋ jaŋerao mi qikiŋnuc.

¹²²Kiŋaŋŋicge no sacfozic enarec, ehuc penaroŋhec jaŋe mana‐jaretec mi bawahacnunʒepieŋ.

¹²³Mumupaŋge tiŋne irec fârine fuaocte ʒâŋe‐nanezi fiipieku betaŋkekac.

¹²⁴Kiŋaŋŋicge no aki anonocgere sâcko wiac enarec, ehuc dâŋsanaŋge qazu‐narec.

¹²⁵No kiŋaŋŋicge jukopacte mamana tara tahacnuc, eme mumutaniŋ dâŋge mana jaŋgeŋkezepac.

¹²⁶Ŋic jaŋe sâcmutâc dâŋge huckembieŋ; irec Wofuŋ goki okacne bazu‐jarecmurâ dameŋne maickekac.

¹²⁷Irec no sâcmutâc dâŋgere fehuc aŋacnukac, gol â gol ematauckekicne irec aŋac‐nane wahakac.

¹²⁸Erâ no mumutâc dâŋgere sâcko hata tiŋne juekopac, burec hatane hatane irec takicnuekac.

¹²⁹Mumutaniŋ dâŋge i eri‐ticnehec; irec maŋnanezi ira qohotaekac.

¹³⁰Dâŋgere fuŋne ritupie tatamac fuaekac, eme ŋic maŋhumuc jaŋe wiac mana jaŋgeŋkeeŋgopieŋ.

¹³¹No sâcmutâc dâŋgere boc enareekacte maŋhâhâŋ ehuc micaaŋ jukopac.

¹³²Norao fotikierâ aki anonoc enarec; ʒâŋegere aŋac‐jopaekac jaŋe iŋuc hâcne ejareekic.

¹³³Dâŋgere sâcko hata âte ʒakierâ juzepac, eme wiac hehesicne moczi ŋicbomboŋ mi enarezejec.

¹³⁴Ŋic jaŋe bawahacnunʒipiŋte jaŋeraonec bataracnuzemec, eme no mumutâc dâŋge bâjâpezepac.

¹³⁵Ʒâŋe maigezi kiŋaŋŋicge no tamae‐narezejec, ehame dâŋsanaŋge qazu‐narezemec.

¹³⁶Ŋic jaŋe sâcmutâc dâŋge mi reŋkeeŋgopieŋte ʒâŋeuc‐nane fusinehec wahahuc foekac.