Mise 3

1

2

3

4

5

6

7

¹Dama ne: «Ngalla dégluleen yeen njiiti Yanqóoba, yeen kilifay kër Israyil! Xanaa du yeena wara xam yoon?

²Te yeenay bañ-kati lu baax, di bëgg-kati lu bon. Yeenay fees sama ñoñ te ñuy dund, yeenay rocci suux wi sàng seeni yax.

³Yeenay yàpp samay bokk, fulli seen der, damm seeni yax, dogat, def ko ni toggug kawdir, mbete ndawal ci cin.»

⁴Lee tax noggatukat yii di woo Aji Sax ji wall, te du leen wuyu, kanamam la leen di làq, bésub keroog, nde ñoo bonal seeni jëf.

⁵Lii la Aji Sax ji wax ci yonent yiy lajjal samay bokk: «Bu ñu sàqamee ab lanc, yéene jàmm; ku leen leelul, ñu biral waxyub xare.

⁶Moo tax yeen, guddi moo leen di ñeel, ba peeñu réer, lëndëm a leen di dikkal, ba ngis tukkil leen, jant mooy sowal yonent yi, bëccëg lëndëmal leen.

⁷Seetkat yi dañuy rus, boroom ngis yi torox, ñoom ñépp jàpp seen gémmiñ; ndax Yàllaa leen dul faale.»

⁸Teewul man, may feese doole, feese Noowug Aji Sax ji, ak dëgg ak njàmbaarte, ngir biralal askanu Yanqóoba, bàkkaaram, ngir tuddal bànni Israyil googu moyam.

⁹Ngalla dégluleen lii, yeen njiiti kër Yanqóoba; yeen kilifay kër Israyil. Yeen ñi seexlu dëgg, lunkal wépp yoonu njub.

¹⁰Deret ngeen tabaxe Siyoŋ, njubadi ngeen tabaxe Yerusalem googu.

¹¹Seeni njiit, alalu ger lañuy àttee, seeni sarxalkat di feyeekuy jàngle, seeni yonent di weccikoo xaalis seenum ngisaane, te Aji Sax ji lañuy dëgërloo, naan: «Xanaa du Aji Sax jaa ngi ci sunu biir? Musiba du nu dab!»

¹²Kon nag dees na gàbb Siyoŋ nib tool, Yerusalem googu diy tojit, jale, tundu kërug jaamookaay baay doon gajj bu kawe.