Mise 5

1

2

3

4

5

6

7

¹«Yaw Betleyem Efrata, lu tuut ci làngi Yuda, ci yaw la ku may yilifal Israyil di génne, cosaanam di jant yu yàgga yàgg, bu jëkkoon.»

²Moo tax Aji Sax ji di leen wacc ba keroog jant, ba kiy matu mucc. Ca la bokkam ya dese bakkan di dellu, fekki seen bokki bànni Israyil.

³Kilifa gaay taxaw, sàmme ci dooley Aji Sax ji, ci màggug turu Yàllaam Aji Sax ji, ba ñu dëkke jàmm, nde léegi lay doon ku màgg ba turam dajal cati àddina.

⁴Kookooy doon buntu jàmm, ba bu waa Asiri songee sunum réew, ba daagoo sunu kawi tata, juróom ñaari njiit lanu koy yékkatil, ba juróom ñetti garmi.

⁵Ab saamar la ñooñuy yilife Asiri, réewum Nimróot mooma ca biiri buntam. Kilifa gi ñu dige moo nuy xettleek Asiri, bu ñu nu songee, ba joggati sunu suuf.

⁶Ci biir askan yu bare la ndesu Yanqóoba di nekk, mel nib lay bu bawoo fa Aji Sax ji, nirook waame wu wàccal gàncax, xaarul lenni nit, lenni doom aadama la séentuwul.

⁷Ci biir askan yu bare la ndesu Yanqóoba di nekk, ci biir xeeti àddina, mbete gaynde ci biir rabi àll yi, nirook gaynde gu ndaw ci biiri gàtt; fu mu jaare, joggati, xotat, te kenn du wallu.

⁸Aji Sax ji, sa loxo ca kaw, tiim say bañ, mboolem say noon lees di dagge ci kaw suuf.

⁹«Bésub keroog,» kàddug Aji Sax jee, «maay dagge fi sa biir, sa fasi xare, te maay sànk sa watiiri xare.

¹⁰Maa fiy dagge sa dëkki réew mi, màbb sa tata yépp.

¹¹Maay foqatee ay xërëm ci sa loxo, te ay gisaanekat, dootuloo ko am.

¹²Maay dagge fi sa biir say tuur, ak sa xeri jaamookaay, te dootoo sujjóotal loo sàkke say loxo.

¹³Maay buddee fi sa biir xeri jaamookaayi Asera tuur mi, te maay tas say jaamookaay.

¹⁴Mer akum sànj laay feye xeeti yéefar, yi déggul ndigal.»