Menge Ininang 6:3-13

³Menge kedowa day, mèpiya aw pemellien niyo se pito meama, sìyan mèpiya otaw egbeyà-beyaan te Espiritu Santo aw ontò biyasa. Penga niyan, sikandan se meneped te togpò,

⁴amon megtawal-tawal kay se kenami diyà te Timanem aw megtoladà kay heman.”

⁵Pegdineg te kedita te otaw egpemenal kenyan, aneng-aneng dan, mèpiya iyan inangen. Yan pinemallì dan si Esteban, so egpemenal sikandin diyà te Timanem te kedakel te pedowan din, aw egbeyà-beyaan heman te Espiritu Santo. Se doma otaw pinemallì dan, yan si Felipe, aw si Procoro, aw si Nicanor, aw si Timon, aw si Parmenas, aw si Nicolas tege Antyokya timolò te ketanem te menge Judiyo pengkey kenà sikandin Judiyo.

⁶Impeasdang dan diyà te menge sogounun i Cristo. Migtawal-tawal se menge sogounun i Cristo aw pinemàdan dan se pito otaw sìyan.

⁷Penga niyan, gayed in-indan se kagi te Timanem doton te menge doma ogpeanan. Migkedita se otaw nemenal doton te Jerusalem, aw medita heman se pengolo te simbahan te Judiyo nemenal.

⁸Ontò tinebangan te Timanem si Esteban, aw ininang din se inang metolos, aw impekità din se kepelahan diyà te doma otaw.

⁹Doen menge otaw migdindil kandin. Sikandan se menge tege Sirene aw tege Alejandriya egsimba doton te simbahan iningedanan “Tengke Otaw Nekelowà,” aw menge doma dan tege Silisya, aw tege Asya.

¹⁰Meneng wedà dan pekedaeg kandin, so biyasa pa sikandin mikagi kandan aw tinebangan te Espiritu Santo.

¹¹Penga niyan, binoyo dan se menge doma otaw amon mikagi dan te dinineg dan si Esteban migtompuyus te Timanem aw si Moises.

¹²Pineokit kenyan, migsamok dan te menge doma otaw, aw menge obanen te simbahan, aw menenoladà te punù ingkeliwat i Moises. Penga niyan, ayas dan inewidan si Esteban. Inibing dan sikandin doton te menge obanen te simbahan amon okomen dan.

¹³Timindeg se menge doma otaw migkebolalaw, kagi dan, “Sikandin se eglindò te simbahan seini egpenimeneman. Egtompuyusen din heman se punù egtoloen tadon ingkeliwat te kemonaan tadon si Moises.