ሃዋሬታ ኦሱዋ 6:3-13

³ሂዛ፥ ኢሻቶ፥ ሎዖ ኣሳታ፥ ጌሻ ኣያናኒኔ ጪንጫቴꬃን ኩሚዳ ላፑን ኣሳታ ሂንቴ ጊዶፌ ዶሪቴ፤ ኑኒ ኤንታ ሃ ኦሱዋስ ሹማና።

⁴ሺን ኑኒ፥ ኑ ኩሜꬃ ዎዲያ ፆሳ ዎሳኒኔ ቃላ ታማርሶን ፔሻና» ያጊዶሶና።

⁵ሃዋሬቲ ኦዲዳ ኦዳይ ኣሳ ኡባ ኡፋይሲስ። ሄሳ ጊሾ፥ ኣማኖይኔ ጌሻ ኣያኒ ኩሚዳ ኢስፂፋኖሴ፥ ፊልጶሳ፥ ጲሮኮሮሳ፥ ኒቃሮኔ፥ ፂሞና፥ ጳርሜናኔ ኣይሁዴ ኣማኖ ጌሊ ሲሚዳ ኣንፆኪያ ኒቆላዎሳ ዶሪዶሶና።

⁶ኤንታ ሃዋሬታ ሲንꬃን ኤሲን፥ ሃዋሬቲ ኤንታ ቦላ ኩሼ ዎꬂዲ ፆሳ ዎሲዶሶና።

⁷ፆሳ ቃላይ ዳልጊ ዳልጊ ቢስ። ዬሩሳላሜን ዴዒያ ኣማኔይሳታ ታይቦይ ዳሪ ዳሪ ቢስ፤ ዳሮ ካሂኔቲካ ኣማኒዶሶና።

⁸ኢስፂፋኖሴይ ኣꬎ ኬሃቴꬃኒኔ ዎልቃን ኩሚዲ ኣሳ ጊዶን ኦራꬃባታኔ ማላታታ ኦꬄስ።

⁹ኣይሌቴꬃፌ ኬዪዳ ኣይሁዴ ዎሳ ኬꬃ ኣሳይ ቄሬናፔኔ ኢስኪንዲሪያፔ ኪልቂያፌኔ ኢሲያፔ ዪዳ ኢሲ ኢሲ ኣሳቲ ዴንዲዲ ኢስፂፋኖሴራ ፓላሚዶሶና።

¹⁰ሺን ኢስፂፋኖሴይ ኣያና ዎልቃን ኦዴቲያ ጪንጫቴꬃ ኤንቲ ኤቄታናው ዳንዳዒቦኮና።

¹¹ሄ ዎዴ ኤንቲ፥ «ሙሴኔ ፆሳ ኢ ጫዪሺን ሲዒዳ» ጊያ ዎርዶ ኣሳታ ሻሚዶሶና።

¹²ሄሳዳ ኦꬂዲ ቢታ ጪማታኔ ሂጌ ኣስታማሬታ ኢያ ቦላ ዴንꬂዶሶና። ኢስፂፋኖሴ ኦይኪዲ ሻንጉዋ ሲንꬄ ኤፊዶሶና።

¹³ኢያ ቦላ ፓይዲዳ ዎርዶ ማርካቲ፥ «ሃ ኡራይ ሃ ፆሳ ኬꬃኔ ሙሴ ሂጊያ ዛሪ ዛሪ ጫዬስ።