MII GUN MIINU MO 6:3-13

³A’di mina um, iwaḵ pem, ilaḵ ’peni bwam um ’kwaniŋ gwas pesu/ kun maŋu mo dhali kun ’tu’du/ mo ki Shi/in mo dhali ki yuḵ si’da/ mo uni kun mina ana mish dhu uni ap̱owa ṯu’c yan mo.

⁴Hili am mina roc̱ sho’k mo mmo’tho ki sule/ mo dhali mmomii gwo mo.

⁵Dhali gwo yan jin onu mo tani a’di ’borki’da waambuhany ’kwani ’baar mo bwa mo dhali uni kwanykina Isṯip̱anuus mo, a’di jin ta wathi/ jin ’tu’du/ ki moŋgam gwo is mo dhali ki Shi/in mo, dhala P̱ilibbus mo dhala Puruḵuurus mo dhala Nikanuur mo dhala Ṯimuun mo dhala Parminaas mo dhala Nikula/uus jin ta Wathi/ gi Pan Anthaakiya jin bu’th gwoŋ ’Kwani Yahuuda/ mo.

⁶Uni gwahan idhuna uni ibwambori imandhunu ki she/ dhali ki uni ’thokin mo tani uni dhuki me’d buni ap̱o/ uni mo be.

⁷Dhali gwo ma Arumgimis caki’d mo dhali mondeŋ gi imanciḵ gwo markunu is mo e Pa Urushaliim kagahara mo dhala waambuhany igasiis caaca haki gwo yansan e jin gamu is mo.

⁸Dhala Isṯip̱anuus ’tu’du/ ka ’the mo dhali ki mom’bi’th mo tani a’di miiki dhan mii kun caaca mo dhali momer si’da/ ibwaŋ ’kwani mo.

⁹Hili ’kwanin tiya doshkin ’peni uni kun ta uni gi gu’b gi montul is jin yuḵu ki gu’b gi montul is gi ’Kwani Libarṯiin mo, dhali ’Kwani gi Paŋ Kerawaan mo dhali ’Kwani gi Pa Iskandariyya mo dhali ’peni uni gi Paŋ Kilikiyya mo dhali Pa Asiyya mo uni sugkin ki gwo mo uni ka Isṯip̱anuus mo.

¹⁰Dhali uni moli roc̱ yuḵ yan mo dhali Shi/in jin ona a’di gwo mo be.

¹¹Dhali uni wanki ’kwani is ka ’di/ mo dhali uni gun wanu is mo tani o gwo mo ki: Am ciḵkina a’di mmowal gwo sor ap̱owa Musa dhali ap̱owa Arumgimis si’da/ mo.

¹²Dhali uni ḵa/ ’kwani is mo dhali ’kwaniŋ gwanyjaḵa/ si’da/ mo dhali iman’kwar to si’da/ mo dhali uni iiyina p̱o/ a’di mo dhali bu’th a’di mo dhali sus a’di e montul is yan mo.

¹³Dhali uni dhuki iman/aḵ a’di gwo i is mo uni kun o gwo mo ki: Wathi/ yan diki daḵ gwo mo mmo/o ap̱o/ mo yan jin ḵogu mo dhali gwoŋḵan jin c̱inu si’da/ mo.