Oweziwa wa Yinsa 6:3-13

³Attwiizetthu, mwiwaathawule vakatthi venu atthu sapa ooshitahiwa, awiitaala Rooho Ttakatthiifu na oofuwa yoori niwenkhe khaazi eto,

⁴na-fweyo nisala nilompa na olaleya nttakhuzi la Nnyizinku.

⁵Mattakhuzi apale khuwaatuvela ooshi aya, khunthawula Shiteefanu, nlume wa wiitaala amini na Rooho Ttakatthiifu, anlikha Filipi, Porokoro, Nikanore, Timomu, Parimenashi na Nikolawu, otule aari owaalattelelaaye mayaahuuti wa nti wa Antiyookiya.

⁶Khuwaathoonyeza atthu apale vakatthi wa maaswihaapa, atthaapo khuwaalampela awaattheliye a makhono.

⁷Etthiipile nttakhuzi la Nnyizinku khusala limwazeya. Khusala avira awulaka anakhiyooni wa waakhuvavo Yeruzaleemu. Theenya khuntti khuluyeene ya mahaakhimu a tiini khusala ashutulele amini.

⁸Stefanu ntthu wa wiitaala mahala na owahi wa Nnyizinku aari oretta vitthu zootikinisa na alama vakatthi wa atthu.

⁹Attaaphale khupuwa atthu a nnyupa enthukumaniwaamo apale ‘Ooleviwa’, mayaahuuti a Sireene na Alishanteriya na apale a nti ya Silisiya na Aasiya. Atthu aya apo khwaaza onyakulisanana Shiteefanu,

¹⁰ila khuhisala awahi oshintta opuwa na Rooho etile aari ottakhulanaaye.

¹¹Aphano khupankiwa atthu akinoko alupe yoori: “Nansiila Shiteefanu attakhulaka mattakhuzi onkufurwela napiyu Munsa na Nnyizinku.”

¹²Mwaasa wa mattakhuzi atthaapo, khuwaatapanya atthu, anamalokozela a tiini na anamanozela kano khunkhola Shiteefanu khunthuula khulawana onyuupa woophuteyiwawo milattu.

¹³N'oofiya khusala anlokoveza mattakhuzi oovanyeya aari oraaye: “Mwinyi otu okhitiri ottakhulawo pure opuuro okhuno woottakatthifuwo na nkatthi wa kano.