Aposole 6:3-13

³Dopana, kaimia paluma, nyakamame nyakamanya akali kalange kenge epe singi masingi epe palenge Oli Sipitisame tumbatae mendatupa kutalapape. Kutao nyepataminopa naimame akali dutupame kalai dake isoo kandao katena latama.

⁴Dopa petala naimame loma singi dokopa Gotenya pii lamaingi dokopa dolapo yakinala nayao pyoaka katatamana,” leami-pyaa.

⁵Dopa leamino doko masoo miningi dupa pitakame sepala auu kayami-pyaa. Auu kayapala akali Sitipena lenge doko yapao nyiami-pyaa. Baa masoo miningipi Oli Sipitisapimi tumbatae katenge-pyaa. Dee dupame Pilipa lenge dokopi, Potokotasa lenge dokopi, Naikena lenge dokopi, Taimone lenge dokopi, Pamenasa lenge dokopi, Nikolasa lenge yuu taono Andioko tange Juta joo kateamo dokopi akali dutupa yapao nyiamiaka-pyaa.

⁶Yapao nyiamino akali dutupa aposele dupanya enomba dokonya laminao epeaminopa aposele dupame loma setala aiyomba minani piami-pyaa.

⁷Dokopa Gotenya pii doko tayama-tayama pyoo taya-pyaa. Jetusaleme dokonya masoo miningi endakali dupa etete longo jema-jema pia-pyaa. Pitisa longo mendapuame Kataisa lao masoo miniamiaka-pyaa.

⁸Gotenya kalai pingi pupu lapae doko Sitipena-kisa tumbatae katao baame endakali kaina dupanya kongali andakepi kalai paka pipaepi dupa pyoo katea-pyaa.

⁹Dokopa Jutamanya losuu anda kenge Mokao Nyepae Akali Limbingina lengema dokonya Saitini tangepi, Alekesandia tangepi, dee akali waka Silisia tangepi, Esia tangepi mendapuame sakatao Sitipena-pipa pii yanda pyoloo piami-pyaa.

¹⁰Dopa piaminoaka doko, Sipitisa Goteme Sitipena baa masingi epe maiyamoli pyoo pii leamopa dupame kapa pao ita minapenge nanjia-pyaa.

¹¹Dopa piamosa akali dupame waa katao akali mendatupame sambo pii lena leami-pyaa. Dopa piaminopa akali dupame ipao dapa leami-pyaa: “Naimame sipumanopa akali dakeme Mosesepa Gotepa lapota kilya kandao pii lapyana,” leami-pyaa.

¹²Dopa leaminopa dupame endakali dupapi, isingi akali dupapi, mana setapae masingi akali dupapi dupanya mona minao sakatasakamaiyami-pyaa. Dopa petakamaiyaminopa dupame ipao Sitipena doko anjetala pyalya lao minao kanjole dupa-kisa peami-pyaa.

¹³Pupala mokao nyepae limbingi dupame akali mendatupame sambo pii lena lao katena leami-pyaa. Akali dupame Sitipena kandao dapa leami-pyaa: “Akali dakeme losuu anda andake dakepi naimanya mana setapae dupapi dupa kandao koteaka lao kilya kandenge.