Hechos 6:3-13

³Nyebe Jesús quiato siete chõ jẽirabo. Mbia mbuquiaru sacuã. Mbia chɨɨcua siete chõ jẽirabo. Hombres aracua chõ jẽirabo. Espíritu Turã ndesenda tuchɨ chõ jẽirabo. Sã ũquɨ̃ ño mbia mbuquiaru quiaru quia.

⁴Ure quiatu ra urecheẽ mbeɨ quia Dios je. Ure quiatu ra Dios cheẽ uresenei senei mbeɨ quia mbia je, ɨ que Jesús quiato rerecua ra.

⁵—Coche ñene, ɨ jat e que Jesús quiato ra. Nyebe que siete irabo ra. Esteban irabo. Ae rei Jesús quiato tuchɨ. Ae rei Espíritu Turã ndesenda tuchɨ. Felipe. Prócoro. Nicanor. Timón. Parmenas. Nocolás. Ũquɨ̃ ja que eirabo ra. Nicolás ndei Antioquía jenda. Judío eã ngue ae ra.

⁶Curuchoɨ ja que Jesús quiato rerecua je ra. Jesús quiato rerecua que o chono ñono ja ũquɨ̃ ãquĩ arõ nda. Ũquɨ̃ siete ãquĩ arõ. Ñee ngue Dios je cote ra.

⁷Mbia tubɨrɨã ngue Dios cheẽ isi isi quia ra. Jesús quiato tubɨrɨã tuchɨ que mbia Jerusalén jenda cote ra. Sacerdote tubɨrɨãte abe que Jesús quiato cote ra.

⁸Dios que siqui tuchɨ Esteban ndese ra. Dios quirãcuã ngue siqui tuchɨ erese ra. Nyebe eriqui nguiã mbia mae sayã naa naa tuchɨ mbia je.

⁹Mbia emo emo ngue paama ɨ Esteban je cote ra. Esclavos Libertados, ɨ que mbia chumunuasa mo je ra. Hue jenda que paama ɨ ee ra. Cirene jenda abe no. Alejandría jenda abe no. Cilicia jenda abe no. Asia jenda abe no. Ũquɨ̃ jate que paama ɨ Esteban je ra.

¹⁰Ũquɨ̃ ngue Esteban ñee sobeɨshɨ̃ aroneate quia ra. Espíritu Turã nguia Esteban mbaaracuate nguiã. Espíritu Turã nguia Esteban mbuch eẽ aquiatute nguiã. Nyebe ũquɨ̃ ndiqui Esteban ñee ndɨbɨshorõ aroneate.

¹¹Paama ɨsa que mbae isiquia mee mbia mo je ra. Ñee ñooño nonde Esteban nɨɨ. —Esteban ngue ñee ɨcuãte Moisés rɨɨ̃ nda. Esteban ngue ñee ɨcuãte Dios rɨɨ̃ no nda, ɨchõɨño nonde Esteban nɨɨ.

¹²Ñee ñooño je que mbia mbɨɨcuãte Esteban je ra. Ameɨ abe mbɨɨcuãte Esteban je no. Embesasa abe mbɨɨcuãte Esteban je no. Nyebe mbia Esteban isi suruchoɨ nguiã ererecua je.

¹³Ñee ñooño je que ñee ɨcuã sɨ Esteban nɨɨ huee no nda. —¡Esteban ngue ñee ɨcuã ɨcuãte quia Dios chuchua rɨɨ̃ nda jẽ! ¡Dios cheẽ nɨɨ abe que Esteban ndiqui ñee ɨcuã ɨcuãte ra jẽ! ɨchõɨño Esteban nɨɨ.