Matthew 3

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Di madagoaa deelaa, John Babdais gu hanimoi gi lodo di anggowaa i Judea, ga daamada ga agoago,

²“Goodou huli gi daha mo godou huaidu, idimaa, Teenua King o God di Langi la gu hoohoo mai!”

³John la go taane dela nogo helekai ai soukohp Isaiah: “Tangada e wolowolo i lodo di anggowaa boloo: ‘Haga adee ina di ala o Dimaadua gi togomaalia gi Mee. Haga huudonu ina di ala e hana iei Mee!’”

⁴Nia gahu o maa ne hai gi nia ngaahulu ‘camel’, dono tuu ne hai gi di gili kau, ana meegai la nia manu ‘locust’ mo nia mee maangala lodo henua.

⁵Digau Jerusalem, digau mai nia madagowaa e logo i Judea, mo nia guongo ala i di gili di monowai Jordan ne lloomoi gi baahi o mee.

⁶Digaula ga haagi nadau huaidu, gei mee ga babdais digaula i lodo di monowai Jordan.

⁷Di madagoaa John ne gidee nia Pharisee mono Sadduccee dogologo ne lloomoi bolo e babdais, gei mee ga helekai gi digaula, “Goodou e hai be nia gihaa. Ma koai ne hagi adu bolo goodou e mee di tanga gi daha mo di hagaduadua a God dela ga dau mai?

⁸Goodou haga kila aga ina godou hangaahai gi modongoohia bolo goodou guu huli gi daha mo godou ihala.

⁹Hudee hagamaanadu, bolo goodou e mee hua di tanga gi daha mo di hagaduadua a God, i goodou e helekai bolo goodou nia dama ni Abraham. Au e hagi adu gi goodou bolo God le e mee hua di huli nia hadu aanei gii hai nia dama ni Abraham!

¹⁰Talai la gu togomaalia i tono nia laagau. Malaa, nia laagau ala hagalee huwa humalia, le e hele gi daha, e kili gi lodo di ahi.

¹¹Au e babdais goodou gi nia wai, e haga modongoohia bolo goodou guu huli godou lodo, gei Tangada dela e gila aga i ogu muli, go Mee dela e babdais goodou gi di Hagataalunga Dabu, mo di ahi. Mee koia e aamua i di au, gei au e dee tau loo bolo e dagidagi nia suudi o Maa.

¹²Dana daawolo hili mee gu i dono lima, e hili ana palaawaa ‘wheat’, ga hagabudu mai nia lii ala e hai nia palaawaa gi lodo dono hale benebene mee, gei nia geinga le e dudu i lodo di ahi ga dee ngudu.”

¹³I di madagoaa deelaa, gei Jesus ne hanimoi i Galilee gi Jordan, belee babdais go John.

¹⁴Gei John belee hai a Jesus gii huli ana maanadu, ga helekai gi Mee, “Ma ko au dela belee babdais Kooe, gei Goe e hanimoi bolo au gi babdais ina Goe!”

¹⁵Jesus ga helekai, “Heia hua gii hai beelaa dolomeenei, idimaa, deenei di hai gaa mee gidaua di haga gila aga di manawa o God.” Gei John guu baba ginai.

¹⁶Jesus ne lawa di babdais, geia ga manawa aga gi daha mo nia wai, di langi gu mahuge, gei Jesus ga gidee Ia di Hagataalunga o God e haneia be di mwuroi, gaa dogo gi hongo o Mee.

¹⁷Gei di lee ga helekai ieia i di langi, “Deenei dagu Dama dela e aloho ge e tene ginai Au.”