1Dingla na rau lamur, e Jon a Tena Baptais i hanot, pa i warawai ana hanua bel ting na papar Judia,
2pa i atongi mang, “Mulor lingir a nuknukimulo, anasa a matanitu misaot na langit ka milau.”
3E Jon ot ne, ning a propet Aisaia ka warwara puasa nigo tar onoi mang, “A elngena mainla i arkabah ting na hanua bel mang, ‘Mulor sang a ngas anuna Leklek, mulor atostos anuna ngasla.’”
4E Jon i mermer ana kaen di toli ana hih a kamel, pa i dot ahati ana let di toli ana palaona bulumakau. I sira ien a mumla pa polona tatos.
5A tarai misaot e Jerusalem, pa miting na hananuala rop tumo na papar Judia, pa miting na hananuala ning la kes milau a malum Jodan, la han teteki.
6La patuai talapor ana nunla na toltol laulaula, pa i baptais la ting na malum Jodan.
7E Jon i oroi a galis a Parisaiola pa a Sadusila la han sur ir baptais la, pa i atongi tanla mang, “Ai, mulo na natnat a soila! Bel mulor tolsot pasi sur mulor liu kumna kusun a warkurai na arkeles ane God, ning ir hanot.
8Ning mulo ka lingir momol a nuknukimulo, mulor tol a ututnala ning ir apuasa i mang mulo ka lingir a nuknukimulo.
9Pa gong mulo nuki mang, e God bel ir warkurai mulo anasa mulo a mangis a tarai ane Abaram. A atai mulo mang, e God i tolsot pasi sur ir tol otnan a mangis a tarai ane Abaram tagun a hatatla ne.
10Di ka suah tar a hek ting na kama rakaila, pa rakaila rop ning bel la suah al wakak a wanala, dir ting sen la, pa dir minggen la uting na iah.
11A baptais mulo ana malum sur ir apuasa i mang mulo ka lingir a nuknukimulo. Ika esaning ir mur tak, a rakrakaina i itna tana rakrakaik. Bel a tostos sur ar los anuna su. A natarna kol tana. Ir baptais mulo ana Talngan Tabu pa iah.
12I tong pas anuna saol ana naur a kuna sur ir minggen a witla usaot sur a wuwu ir wus sen a palpalnala kusun a patnala. Ning ka timlan rop tari, ir suah taum anuna wit ting na rumai a wit, pa ir tun sen a palpalnala ting na iah ning bel i sira mat.”
13E Iesu i han mitumo na papar Galili uting na malum Jodan tetek e Jon sur ir baptaisi.
14E Jon i mang sur ir sairasi, pa i atongi tana mang, “I mangasa ning u han tetek iau sur ar baptais u? Ir wakak ning u ur baptais iau.”
15Pa e Iesu i kelesi mang, “Ur baptais iau ka. I wakak ning ur toli, sur dar tolsot pas asa rop ning i tostos namatana e God.” Pa e Jon i longor tana.
16Ning ka baptais tari, ono otning e Iesu i saur miting la malum, pa a langit i sapang, pa i oroi a Inguna e God i han purum arlar ana tabun pa i kes saot ono.
17Lamur a elngena mainla misaot na langit i atongi mang, “Ine a natuklik, a katnani, a gas kol onoi.”
