1Lon ewe fansoun Johannes Soupapatais a feila ngeni ewe fanüapön Jutea o popuetä le afalafal.
2Iwe, a apasa, “Oupwe aier seni ämi tipis, pun a arap Mwün Läng.”
3Johannes ätewe ewe soufos Aisea a kapas usun lupwen a apasa, “Eman a kökkö fän leüömong lon ewe fanüapö: ‘Oupwe amolätä alen ewe Samol. Oupwe awenecharala ewe al epwe fetal won.’”
4Johannes a üföüf üf mi för seni ülen kamel, ririn lukalapan a för seni silin man, nge anan mongö lifichimas me chönün chunen seni lein pötöwöl.
5Iwe, aramas ra feito ren seni Jerusalem me unusen ewe fanü Jutea, pwal seni ekewe fanü meinisin ünükün ewe chanpupu Jortan.
6Ra pwärätä ar tipis, nge Johannes a papataisiir lon ewe chanpupu Jortan.
7Nge lupwen Johannes a küna chomongun ekewe Farisi me Satusi mi feito ren pwe repwe papatais, a üreniir, “Ämi serepenit! Iö a ürenikemi pwe oupwe sü seni än Kot song epwe awarato womi?
8Oupwe föri sokun föför epwe pwärätä pwe oua aier seni ämi tipis.
9Ousap ekieki pwe oua tongeni sü seni än Kot song ren ämi apasa, ‘Äm mwirimwirin Apraham’. Pun ngang üpwe ürenikemi, pwe Kot a tongeni angei ekei fau o föri mwirimwirin Apraham seniir!
10Ewe kouk a fen molotä pwe epwe pöküela ekewe irä tori warer. Irä meinisin resap uani ua mi mürina repwe pöküpök o koturulong lon ekkei.
11Ngang üa papataisikemi ren koluk pwe asisilen ämi aier. Nge ewe eman epwe war me müri epwe papataisikemi ren Ngünmifel me ekkei. I a lap seniei, pwe ngang üsap fich ngeni ai üpwe mwo nge uwou ipwan sus.
12A kamwöch an söföl usun fook pwe epwe aimwüfeseni ekewe föün wiich seni pöön me won ewe lenien wichiwich umwun wiich. Iwe, epwe ionifengeni ekewe föün wiich o uwalong lon an lenien iseis, nge ekewe pöön epwe keniirela lon ekkei esap kunula.”
13Lon ena fansoun Jesus a feito seni Kalilea o a feila ren Johannes arun ewe chanpupu Jortan, pwe Johannes epwe papataisi.
14Nge Johannes a sotuni pwe epwe siwili an we ekiek. Iwe, a üreni, “Ürürün pwe üpwe fen papatais reöm, nge iei en ka feito rei?”
15Iwe, Jesus a pölüeni, “Kopwe chök föri met wisom. Pun ren ei sipwe föri meinisin mine letipen Kot.” Iei mine Johannes a tipeeu ngeni.
16Iwe, lupwen Jesus a wes me papatais, a müttir ütä me lon ewe koluk. Nge nengeni, läng a sukula ngeni o a küna ewe Ngünün Kot a feitiu won usun lapalapen eman lisom.
17Mürin eu möngüngü a möngüngüwu seni läng a apasa, “Iei i nei mi achengicheng, üa unusen pwapwa ren.”
