ⳘⲀⲦⲐⲈⲞⲚ 3

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹ϨⲢⲀⲒ ⲆⲈ ϨⲚ ⲚⲈϨⲞⲞⲨ ⲈⲦⲘⲘⲀⲨ ⲀϤⲈⲒ ⲚϬⲒ ⲒⲰϨⲀⲚⲚⲎⲤ ⲠⲂⲀⲠⲦⲒⲤⲦⲎⲤ ⲈϤⲦⲀϢⲈⲞⲈⲒϢ ϨⲢⲀⲒ ϨⲘ ⲠϪⲀⲒⲈ ⲚϮⲞⲨⲆⲀⲒⲀ

²ⲈϤϪⲰ ⲘⲘⲞⲤ ϪⲈ ⲘⲈⲦⲀⲚⲞⲒ. ⲀⲤϨⲰⲚ ⲄⲀⲢ ⲈϨⲞⲨⲚ ⲚϬⲒ ⲦⲘⲚⲦⲢⲢⲞ ⲚⲘⲠⲎⲨⲈ.

³ⲠⲀⲒ ⲄⲀⲢ ⲠⲈⲚⲦⲀⲨϪⲞⲞϤ ϨⲒⲦⲚ ⲎⲤⲀⲒⲀⲤ ⲠⲈⲠⲢⲞⲪⲎⲦⲎⲤ ⲈϤϪⲰ ⲘⲘⲞⲤ ϪⲈ ⲦⲈⲤⲘⲎ ⲘⲠⲈⲦⲰϢ ⲈⲂⲞⲖ ϨⲒ ⲠϪⲀⲒⲈ ϪⲈ ⲤⲂⲦⲈⲦⲈϨⲒⲎ ⲘⲠϪⲞⲈⲒⲤ ⲚⲦⲈⲦⲚ ⲤⲞⲞⲨⲦⲚ ⲚⲚⲈϤⲘⲀ ⲚⲘⲞⲞϢⲈ.

⁴ⲚⲦⲞϤ ⲆⲈ ⲒⲰϨⲀⲚⲚⲎⲤ ⲚⲈⲢⲈⲦⲈϤϨⲂⲤⲰ ϢⲞⲞⲠ ⲈⲂⲞⲖ ϨⲚ ϨⲈⲚⲂⲰ ⲚϬⲀⲘⲞⲨⲖ. ⲈⲢⲈⲞⲨⲘⲞϪϨ ⲚϢⲀⲀⲢ ϬⲞⲞⲖⲈ ⲈⲦⲈϤϮⲠⲈ. ⲦⲈϤϨⲢⲈ ⲆⲈ ⲚⲈϨⲈⲚϢϪⲈ ⲚⲈ ⲘⲚⲞⲨⲈⲂⲒⲈ ϨⲞⲞⲨⲦ.

⁵ⲦⲞⲦⲈ ⲚⲈⲤⲚⲎⲨ ⲈⲂⲞⲖ ⲈⲢⲀⲦϤ ⲚϬⲒ ⲐⲒⲈⲢⲞⲤⲞⲖⲨⲘⲀ ⲦⲎⲢⲤ. ⲘⲚ ϮⲞⲨⲆⲀⲒⲀ ⲘⲚ ⲦⲠⲈⲢⲒⲬⲰⲢⲞⲤ ⲦⲎⲢⲤ ⲘⲠⲈⲒⲞⲢⲆⲀⲚⲎⲤ.

⁶ⲈⲨϪⲒ ⲂⲀⲠⲦⲒⲤⲘⲀ ⲈⲂⲞⲖ ϨⲒⲦⲞⲞⲦϤ ϨⲘ ⲠⲈⲒⲞⲢⲆⲀⲚⲎⲤ ⲠⲈⲒⲈⲢⲞ ⲈⲨⲈⲜⲞⲘⲞⲖⲞⲄⲈⲒ ⲚⲚⲈⲨⲚⲞⲂⲈ.

⁷ⲚⲦⲈⲢⲈϤⲚⲀⲨ ⲆⲈ ⲈϨⲀϨ ϨⲚ ⲚⲈⲪⲀⲢⲒⲤⲤⲀⲒⲞⲤ ⲘⲚ ⲚⲤⲀⲆⲆⲞⲨⲔⲀⲒⲞⲤ ⲈⲨⲚⲎⲨ ⲈϪⲘ ⲠⲂⲀⲠⲦⲒⲤⲘⲀ ⲠⲈϪⲀϤ ⲚⲀⲨ. ϪⲈ ⲚⲈϪⲠⲞ ⲚⲚⲈϨⲂⲞⲨⲒ. ⲚⲒⲘ ⲠⲈⲚⲦⲀϤⲦⲤⲀⲂⲈ ⲦⲎⲨⲦⲚ ⲈⲠⲰⲦ ⲈⲂⲞⲖ ϨⲎⲦⲤ ⲚⲦⲞⲢⲄⲎ ⲈⲦⲚⲎⲨ.

⁸ⲀⲢⲒⲢⲈ ϬⲈ ⲚⲞⲨⲔⲀⲢⲠⲞⲤ ⲈϤⲘⲠϢⲀ ⲚⲦⲘⲈⲦⲀⲚⲞⲒⲀ.

⁹ⲚⲦⲈⲦⲚ ⲦⲘⲘⲈⲈⲨⲈ ⲈϪⲞⲞⲤ ⲚϨⲎⲦⲦⲎⲨⲦⲚ. ϪⲈ ⲞⲨⲚⲦⲀⲚ ⲘⲘⲀⲨ ⲘⲠⲈⲚⲈⲒⲰⲦ ⲀⲂⲢⲀϨⲀⲘ. ϮϪⲰ ⲄⲀⲢ ⲘⲘⲞⲤ ⲚⲎⲦⲚ ϪⲈ ⲞⲨⲚϬⲞⲘ ⲘⲠⲚⲞⲨⲦⲈ ⲈⲦⲞⲨⲚⲈⲤ ϨⲈⲚϢⲎⲢⲈ ⲚⲀⲂⲢⲀϨⲀⲘ ⲈⲂⲞⲖ ϨⲚ ⲚⲈⲒⲰⲚⲈ.

¹⁰ϪⲒⲚⲦⲈⲚⲞⲨ ⲆⲈ ⲠⲔⲈⲖⲈⲂⲒⲚ ⲔⲎ ϨⲀ ⲦⲚⲞⲨⲚⲈ ⲚⲚϢⲎⲚ. ϢⲎⲚ ϬⲈ ⲚⲒⲘ ⲈⲦⲈⲚϤⲚⲀⲈⲒⲢⲈ ⲀⲚ ⲚⲞⲨⲔⲀⲢⲠⲞⲤ ⲈⲚⲀⲚⲞⲨϤ ⲤⲈⲚⲀⲔⲞⲞⲢⲈϤ ⲚⲤⲈⲚⲞϪϤ ⲈⲦⲤⲀⲦⲈ.

¹¹ⲀⲚⲞⲔ ⲘⲈⲚ ⲈⲒⲂⲀⲠⲦⲒⲌⲈ ⲘⲘⲰⲦⲚ ϨⲚ ⲞⲨⲘⲞⲞⲨ ⲈⲨⲘⲈⲦⲀⲚⲞⲒⲀ. ⲠⲈⲦⲚⲎⲨ ⲆⲈ ϤϪⲞⲞⲢ ⲈⲢⲞⲒ ⲠⲀⲒ ⲚϮⲘⲠϢⲀ ⲀⲚ ⲚϤⲒ ϨⲀ ⲠⲈϤⲦⲞⲞⲨⲈ. ⲚⲦⲞϤ ⲠⲈⲦⲚⲀⲂⲀⲠⲦⲒⲌⲈ ⲘⲘⲰⲦⲚ ϨⲚ ⲞⲨⲠⲚⲀ ⲈϤⲞⲨⲀⲀⲂ ⲘⲚⲞⲨⲤⲀⲦⲈ.

¹²ⲠⲀⲒ ⲈⲦⲈⲢⲈ ⲠⲈϤϨⲀ ϨⲚ ⲦⲈϤϬⲒϪ ⲈϤⲚⲀⲦⲂⲂⲞ ⲘⲠⲈϤϪⲚⲞⲞⲨ. ⲚϤⲤⲰⲞⲨϨ ⲈϨⲞⲨⲚ ⲘⲠⲈϤⲤⲞⲨⲞ ⲈⲦⲀⲠⲞⲐⲎⲔⲎ. ⲠⲦⲰϨ ⲆⲈ ⲚϤⲢⲞⲔϨϤ ϨⲚ ⲞⲨⲤⲀⲦⲈ ⲈⲘⲈⲤⲰϢⲘ.

¹³ⲦⲞⲦⲈ ⲀϤⲈⲒ ⲚϬⲒ ⲒⲎⲤⲞⲨⲤ ⲈⲂⲞⲖ ϨⲚ ⲦⲄⲀⲖⲒⲖⲀⲒⲀ ⲈϨⲢⲀⲒ ⲈϪⲘ ⲠⲒⲞⲢⲆⲀⲚⲎⲤ ϢⲀⲒⲰϨⲀⲚⲚⲎⲤ ⲈⲦⲢⲈϤⲂⲀⲠⲦⲒⲌⲈ ⲈⲂⲞⲖ ϨⲒⲦⲞⲞⲦϤ.

¹⁴ⲚⲦⲞϤ ⲆⲈ ⲀϤⲔⲰⲖⲨ ⲘⲘⲞϤ ⲈϤϪⲰ ⲘⲘⲞⲤ ϪⲈ ⲀⲚⲞⲔ ⲈⲦⲢⲬⲢⲒⲀ ⲚⲂⲀⲠⲦⲒⲌⲈ ⲈⲂⲞⲖ ϨⲒ ⲦⲞⲞⲦⲔ ⲀⲨⲰ ⲚⲦⲞⲔ ⲈⲦⲚⲎⲨ ϢⲀⲢⲞⲒ.

¹⁵ⲀⲨⲞⲨⲰϢⲂ ⲆⲈ ⲚϬⲒ ⲒⲎⲤⲞⲨⲤ ⲈϤϪⲰ ⲘⲘⲞⲤ ⲚⲀϤ ϪⲈ ϬⲰ ⲦⲈⲚⲞⲨ ⲦⲀⲒ ⲄⲀⲢ ⲦⲈ ⲐⲈ ⲈⲦⲈϢϢⲈ ⲈⲢⲞⲚ ⲈϪⲰⲔ ⲈⲂⲞⲖ ⲚⲆⲒⲔⲀⲒⲞⲤⲨⲚⲎ ⲚⲒⲘ ⲦⲞⲦⲈ ⲀϤⲔⲀⲀϤ.

¹⁶ⲚⲦⲈⲢⲈϤⲂⲀⲠⲦⲒⲌⲈ ϬⲈ ⲚϬⲒ ⲒⲎⲤⲞⲨⲤ ⲚⲦⲈⲨⲚⲞⲨ ⲀϤⲈⲒ ⲈϨⲢⲀⲒ ϨⲘ ⲠⲘⲞⲞⲨ. ⲀⲨⲰ ⲈⲒⲤ ϨⲎⲎⲦⲈ ⲀⲨⲞⲨⲰⲚ ⲚϬⲒ ⲘⲠⲎⲨⲈ. ⲀϤⲚⲀⲨ ⲈⲠⲈⲠⲚⲈⲨⲘⲀ ⲘⲠⲚⲞⲨⲦⲈ ⲈϤⲚⲎⲨ ⲈⲠⲈⲤⲎⲦ ⲚⲐⲈ ⲚⲞⲨϬⲢⲞⲞⲘⲠⲈ ⲈϨⲢⲀⲒ ⲈϪⲰϤ.

¹⁷ⲀⲨⲰ ⲈⲒⲤ ϨⲎⲎⲦⲈ ⲈⲒⲤⲞⲨⲤⲘⲎ ⲈⲂⲞⲖ ϨⲚ ⲘⲠⲎⲨⲈ ⲈⲤϪⲰ ⲘⲘⲞⲤ ϪⲈ ⲠⲀⲒ ⲠⲈ ⲠⲀϢⲎⲢⲈ ⲠⲀⲘⲈⲢⲒⲦ ⲠⲈⲚⲦⲀⲠⲀⲞⲨⲰϢ ϢⲰⲠⲈ ϨⲢⲀⲒ ⲚϨⲎⲦϤ.