Mathai 3

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Te vaeng tue ah tuinuem Johan ha pawk tih,

²Vaan ram a yoei coeng dongah yut uh laeh, “tila a thui tih Judea khosoek ah a hoe.

³Anih tah, khosoek kah pang ol loh, “Boeipa kah longpuei saelh uh lamtah a caehlong boeih te a dueng la saii uh, “tila tonghma Isaiah loh a thui a phong te ni.

⁴Johan loh kalauk kah a mul himbai te a bai tih, a pumpu ah maehpho cihin a naak. Tangboeng neh kohong khoitui te a buh la om.

⁵Te vaengah Jerusalem, Judah ram boeih neh Jordan pingpang boeih tah anih taengah cet.

⁶Amih kah tholhnah te a phong uh dongah Johan loh Jordan tuiva ah a nuem uh.

⁷Pharisee rhoek neh Sadducee rhoek khaw anih kah baptisma dang ham muep ha pawk uh te a hmuh. Te vaengah amih te, “Rhulthae cadil rhoek aka tawn uh kosi te rhaelrham tak ham unim nangmih aka tueng.

⁸Te dongah yutnah neh a tiing la a thaih te saii uh.

⁹A pa Abraham om tila nangmih khui thui ham poek uh boeh. Pathen loh hekah lungto rhoek lamloh Abraham kah ca rhoek a thoh sak thai te nangmih taengah kan thui.

¹⁰Thing kah a yung ah hai te a khueh oepsoeh coeng tih thaih then aka thaii mueh thingkung te boeih a vung vetih hmai khuila a voeih ni.

¹¹Yutnah ham ni kai loh nangmih tui dongah kan nuem. Tedae Kai hnuk ah aka pawk te tah kai lakah tlung. A khokhom dul ham pataeng ka koih pawh. Anih loh nangmih te Mueihla Cim neh hmai neh n'nuem ni.

¹²Anih loh a kut dongkah cangcopcung neh a cangtilhmuen te a coeh vetih, a cang te khai khuila a khoem ni. Canghi te tah aka duek pawh hmai neh a tih ni,” a ti nah.

¹³Te vaengah Jesuh tah Johan mah loh nuem sak ham te Galilee lamloh Jordan la ha pawk.

¹⁴Tedae Johan loh anih te a mah tih, “Nang loh nan nuem ham te ka ngoe, dae nang te kai taengah lat na pawk,” a ti nah.

¹⁵Tedae Jesuh loh a doo tih, “Ng'rhoi laeh, duengnah cungkuem loh mamih taengah a soep la a om ham tueng tangloeng coeng,” a ti nah daengah anih te a rhoi pueng.

¹⁶A nuem nen tah Jesuh khaw tui lamloh pahoi cet. Te vaengah anih hamla vaan te tarha ong uh tih Pathen kah Mueihla tah vahu bangla anih soah a thoeng pah te a hmuh.

¹⁷Te phoeiah vaan lamkah ol loh, “Hetah ka capa thintlo ni, anih dongah ka lungtlun, “pahoi a ti.