1Mame ynara tykase roropa Jezu, —Ritonõpo enetuputyry oya xine oesẽkõme tyoro sã roropa mana. Tupito esẽ sã mana, uwa arykahpyry esẽ samo. Pakeimo mokyro toytose, erohketõ eahmase tutupi poko toto erohtohme.
2—“Oepehmatorỹko ase. Oerohtamitukõ ekarõko ase toiro tineru,” tykase ynororo eya xine. Mame taropose toto eya tutupi pona, aerohtohkõme.
3Mame toytose ropa ynororo pata rãnaka ropa osepekahtoh taka ropa xixi tõnuhsehxo ahtao. Mame imehnõ roropa tonese eya tehme rokẽ toto.
4“Erohtatoko utupi pona ynarykahpyry uwa pokona. Oepehmatorỹko ase,” tykase ynororo eya xine.
5—Morara exiryke toytose roropa toto tupito pona. Mame tãxiahtao toytose ropa ynororo imehnõ erohpyra exiketõ rohmanohpose ropa tutupi poko. Morara tyrise ropa eya xixi tywykahme ahtao.
6Mame xixi ituperyme exisasaka ahtao toytose ropa ynororo pata rãnaka ropa. Erohpyra exiketõ tonese ropa eya, “Oty katoh tehme rokẽ kohmãnõko matou?” tykase ynororo toto a, tõturupose.
7—“Ỹ, toerohtohke pyra yna exiryke,” tykase toto eya. “Tyrohmanohponeke pyra yna exiryke roropa,” tykase toto. Ynara tykase tupito esemy eya xine, “Morara ahtao ytotoko utupi pona. Erohtatoko,” tykase ynororo eya xine.
8—Morarame tykohmãse ahtao tupito esemy a typoetory tykohmase tyya, “Erohketõ ikohmako, toto epehmatohme oya,” tykase ynororo. “Ynara epehmako toto. Okomino aerohtyã epehmako osemazuhme. Mame osemazuhme aerohtyã okomino epehmako,” tykase tupito esemy typoetory a.
9—Morarame okomino aerohtyã tooehse ahtao topehmase toto eya xine toiro ẽmepyryae erohtamitu ke.
10Mame osemazuhme aerohtyã tooehse ahtao topehpyrykõ poko tõsenetupuhse toto. “Otarãme itamurumehxo yna epehmãko mana,” tykase toh repe tukurohtao xine. Yrome morararo topehmase toto, mokaro epehmatopõpyry saaro.
11Mame toerohtamitukõ tapoise tyya xine ahtao, tupito esẽ tykerekeremapitose toto a.
12“Oty katoh oxisã kuepehmatorỹko nae? Okomino aerohtyã toiro pitiko rokẽ toerohse toh repe. Yrome morararo topehmase toto,” tykase toto. “Kymarokõ toerohsehxo itamurume repe. Toiparo rokẽ xixi tyrohse kyya xine. Mokaro saaro topehmase kymarokomo,” tykase toto.
13—Toiro tykerekeremane a ynara tykase tupito esemy, “Etako pahne jepe, oenekunohpyra xine reh ahse. ‘Toiro ẽmepyry oerohtamitukõ ekarõko ase,’ ykã puh oya xine. Mame, ‘Ỹ, morara ahtao kure,’ mykatou ya.
14Morara exiryke oepehpyrykõ apoitatoko atapyĩkõ taka oytotohkõme ropa. Moxiã toahmase ya okomino, toto erohtohme roropa. Yrome toto epehpyry morararo oepehmatopõpyrykõ saaro.
15Morara jahtao zaero ase. Ytinerũ ekarory se jahtao ekarõko ase, ytinerũme exiryke. Imehnõ zumoxike hmatohu toto epehmaryke ya, eya xine ytinerũ ekaroryke ya?” tykase eya tupito esemy, tykase Jezu eya xine.
16Morarame ynara tykase ropa Jezu, —Moro saaro otuisarykõme Ritonõpo enetuputyryhtao oya xine. Tuhke etyhpyryme Ritonõpo enetupuhnanõ tuisamehxo exĩko mã toto. Tuhke tuisame aehtyã tuisame pyra exĩko roropa mã toto, tykase Jezu toto a.
17Mame Jezu toytoryhtao osemae Jerusarẽ pona, typoetory tõ maro tõturuse, toiroro tahtao, 12mãkõ maro rokẽ tahtao.
18Ynara tykase ynororo eya xine, —Etatoko pahne, Jerusarẽ pona ytõko sytatose. Moroto Kapu ae Ayhtohpyry ekarõko mã toto Ritonõpo maro oturuketõ tuisary tomo a, Moeze omihpyry poko imehnõ amorepananomo a, enara. Jetapapory se exĩko mã toto oximõme.
19Mame jekarõko mã toto imehnomo a, juteutõkara a. Mame tounohse jahtao eya xine, ypiypipohnõko mã toto. Mame wewe pokona jexixihmapõko mã toto. Orihnõko ase. Yrome oseruao tõmehse ahtao jẽsemãkapõko ropa Papa mana, tykase Jezu eya xine.
20Mame Zepeteu mũkuru ẽ toytose Jezu a tumũkuru tõ maro asakoro. Tupue toehse ynororo Jezu ẽpataka. Mame ynara tykase eya, —Ohpetu se hano ajohpãme samo, tykase.
21—Oty se hma? tykase Jezu eya. —Moxiã umũkuru tõ asakoro tuisame tyriko toto, amaro, tuisa konõtome toehse awahtao, toiro ãpotunuru wino, toiro opoozery wino, enara, tykase nohpo eya.
22Mame ynara tykase Jezu eya, —Onekaropohpyry waro pyra matose, jokuru ẽ sasaka ase. Jokuru enyry se roropa matohu? tykase Jezu eya xine. —Ỹ, tykase toto, —enyry se ynanase, tykase toto.
23Toorikyry poko morara tykase Jezu toto a repe. Yrome onenetupuhpyra toh kynexine. “Jokuru enyry se hmatou?” tykase eya xine repe. Yrome, “Oorikyrykõ se hmatou,” ãko kynexine toto a repe. Morarame ynara tykase ropa Jezu eya xine, —Jokuru ẽnõko matose repe. Yrome ymaro tuisame exiketõ onymenekara ase. Papa kapuaõ nymenekatyã rokẽ ymaro tuisame exĩko mã toto, tykase Jezu toto a.
24Mame mokaro omihpyry totase tyya xine ahtao, Zepeteu poenõ zehno toehse toto, Jezu poetory tõ 10mãkomo.
25Mame typoetory tykohmase tyya. Ynara tykase Jezu eya xine, —Etatoko pahne, seropõkõ tuisaryme tahtao xine, tõmipona imehnõ rĩko mã toto. Typoetoryme imehnõ rĩko roropa mã toto. Mame typoetory aropõko mã toto. Imehnõ enehpõko mã toto, enara.
26Yrome amarokõ tyoro exĩko matose. Tuisamehxo se awahtao xine imehnõ poetoryme sã ehtoko. Imehnõ akorehmatoko, tykase Jezu typoetory tomo a.
27—Imehnõ esẽme se awahtao xine, toto namotome sã ehtoko,
28Kapu ae Ayhtohpyry ehtoh saaro. Kapu ae tooehse ywy xiaro, sero nono pona. Typoetoke pyra sã ywy. Takorehmaneke pyra roropa. Yrome ãkorehmase xine oepyase. Orihse roropa oepyase oorypyrykõ epehmatohme. Ritonõpo poenõme oehtohkõme, tykase Jezu eya xine.
29Morarame Jeriko poe tutũtase toto ahtao, Jezu tokahmase imoihmãkomo a.
30Morarame osema ehpio tonurãkara kynexine asakoro. Typorohse rokẽ toto osema ehpio. Mame Jezu ytory totase tyya xine ahtao, tykohmase toto a, —Tamuxi! Tawi parỹpyry, yna pyno exiko, tykase toto.
31Yrome turuse toto imoihmãkomo a, —Mynyhme ehtoko, tykase toto eya xine. Yrome itamurumehxo tykohmase toto a, —Tamuxi! Tawi parỹpyry, yna pyno exiko, tykase toto.
32Morarame totypohse Jezu toto zurutohme. Ynara tykase ynororo eya xine, —Oty se hmatou ya, tykase tõturupose eya xine.
33—Tonure se ropa ynanase, tykase toto eya.
34Mame toto pyno Jezu kynexine. Toto enuru apone. Axĩ tõsenuhmase ropa toto, tonurãmõpotõkara. Mame Jezu tokahmase eya xine.
