Markus 5:17-29

¹⁷Iei mine chon ewe fanü ra tüngor ngeni Jesus epwe towu seni fanüer.

¹⁸Iwe, lupwen Jesus a tötä won ewe wa, ewe mwän mi wor ngününgau won me lom, a fokun tüngor ngeni Jesus pwe epwe eti.

¹⁹Nge Jesus esap mwüt ngeni, pwe a üreni, “Kopwe feila lon leniom ren om famili o apworausa ngeniir meinisin mine ewe Samol a föri ngonuk, pwal usun an eäni ümöümöch ngonuk.”

²⁰Iei mine ewe mwän a feila seni, a tori ewe fanü itan Engol Telinimw o apworausafeili mine Jesus a föri fän itan. Iwe, ekewe aramas meinisin mi rongorong ei pworaus ra mairü ren.

²¹Iwe, Jesus a liwinsefäliti epek ewe noom. Ikenan eu mwichen aramas mi chomong ra mwicheto ren.

²²Mürin Jairus eman meilapen imwen felikis a feito. Iwe, lupwen a küna Jesus, a chapetiu arun pechen

²³o a fokun tüngormau ngeni, “Nei nengin a arap ngeni mäla. Kose mochen kopwe feito o iseis poumw won, pwe epwe pöchökülela o chikarsefäl.”

²⁴Mürin Jesus a etala Jairus. Nge chomong aramas ra tapwela mürin o etiepach ngeni.

²⁵Iwe, a wor eman fefin a eäni samaun fefin mi fokun watte lon ükükün engol me ruu ier.

²⁶A fokun riaföü ren chomong sousafei ra säfeeni. A pwal fangala meinisin mine a wor ren fän iten an epwe küna pöchökül, nge an samau a chök wattela.

²⁷Lupwen ei fefin a rong usun pworausen Jesus, a feito me lükisökürün lein ewe mwichen aramas o atapa üfan,

²⁸pun a ekieki lon lelukan, “Are üpwe chök atapa üfan, üpwe pöchökülsefäl.”

²⁹Lon ewe chök otun a atapa üfen Jesus we, an we samau a köüla. Iwe, a mefi lon inisin pwe a chikar seni an we samau.