Marqoosa 5:17-29

¹⁷Hessafe guye he dere asay Yesusi ista dere yeddidi baana mala woossides.

¹⁸Yesusi wogolon gelishin daydanthati izappe kezida addezi Yesusara daanas woossides.

¹⁹Yesusi qasse izi oychidayssa akay giidinne “Neni gede ne so ba, Goday nees ay mala gita miish ooththidakkonne izi nees ooththida maarotetha ne so asas yoota” gides.

²⁰Addezikka baso biidi Yesusi izas ooththida gita miish wursi tammu katama geetettiza deren yootin siyiday wurikka malalettides.

²¹Qasseka Yesusi wogolon gelidi gede pinth pinnidi abba achchan dishin daro asay iza achchi shiiqidinne iza giddoththides.

²²Ayhudata Woosa Keeththa halaqatappe issoy Iya7iroosa geetettizayssi izi dizaso biidi Yesusa demmida mala iza toho bolla kundidi

²³“Taas guutha naa dizaara hayqqana gawus. Iza hayqqonta paxa daana mala ne ha yaada ne kushe izi bolla wotharkii?” giidi keehi woossides.

²⁴Yesusikka izara issife bides. Daro asay iza un7ethana gakkanaas kaallides.

²⁵Tammanne nam7u layth kumeth suuthi izi bollafe gukkiza macas dizaara heen asaara dawus.

²⁶Iza baassi diza miish wursa ongana gakkanaas akimeppe akime laamon daro daburadus. Gido attin sakoy izis gede darides attin aykkokka lo7ibenna.

²⁷Iza Yesusa gish siyida mala asa giddora Yesusa guyera kaallada iza may7o bochchadus.

²⁸Gaasoyka “Ta ay hanadakka iza may7o kushera bocho bochidakkoka ta paxana” gaada qoppida gishassa.

²⁹Gukkiza suuthay heerakka eqi aggides; izakka paxidayssa ba asatethan eradus.