Mark 7:5-35

⁵Ma taui, Iesu i vitara-virevirei i pa, “Aiwai aubaina am Tauvotaḡotaḡo magumagura ai giu, eḡa ita votaḡotaḡoi ma ana ura miramirai e amam?”

⁶Ma Iesu i paribelei i pa, “Taumi morumorumi ma o vikaua-aiaina-melemi. God ana peroveta Isaiah i riwa kaua maranai i riwa, i pa:

⁷Taui rava ai giu e viviararamani.

⁸Taumi, God ana Tarawatu o teretere-tawanei ma ami giu o votaḡotaḡoi.”

⁹Ma i riwana-melei i pa, “Taumi o aramana kaua da God ana Tarawatu o gedugeduaiei ma amamami ai giu o vovotaḡotaḡoi.

¹⁰God ana Tarawatu, Moses i girugirumia nanare: Amam ma alom ma vivirei ma Aiai amana ma alona e enaena-boai, tauna ona viraḡeni.

¹¹Wate taumi o viararamana da aiai awarina mane bo purapura, amana bo alona ita voagui ma ita riwei, ‘Awariu e mamae da ata voaguim; wate lamna Corban - a tereriei pulo, God aubaina.’

¹²Wei viararamanana, taui e viviḡaei da amana ma alona ina voagui.

¹³Ma wei taunei viararamana, rava awari o vividamani; ma God riwana o vivikwakwavi. Ma kaua maḡamaḡaui ḡelaui maiteni o kaukauei.”

¹⁴Iesu, patara i kwatuana-melei ma i riwei i pa, “Anatapumi ona rautaniḡaneu ma aiwai a ririwemi ona aramanei.

¹⁵Aiwai au tanoei au orami e ruirui, lamna eḡa ita vivimiraimi ma aiwai da oramiei e opuopu, lamna e vivimiraimi God au matana.”

¹⁷Anina Iesu, patara i voterei ma i rui au numa. Ma ana tauvotaḡotaḡo, i vitara-virevirei da wei awanainana anona aiwai.

¹⁸Iesu i paribelei i pa, “Taumi maiteni eḡa ota aramanei bo? Kaua aiwai au tano, rava au orai e ruirui amapo eḡa ina vimirai. Anona lamna wei kauai, eḡa ita ruirui rava au nuapouna, wate au manawana da e opuopu.” (Wei riwanei Iesu, lam anatapui i viaiaini).

²⁰Anina ma i riwa i pa, “Aiwai, rava oranei e opuopu; lamna, rava e vivimirai God au matana.

²¹Anina rava nuanuanei vinuanotanota apoapoei e opuopu me: viawawana labalababa, danene, viraḡena, awadanene,

²²ambo, rau-iviapoapoe, moru, erawa, unura, terevaideḡa, mae-ḡaeḡae ma opa.

²³Wei kauai apoapoei anatapui oranei e opuopu ma rava e vimiramirai.”

²⁴Ma dobuna i voterei ma i nae Taia ana au parata. Ma i rui govaḡa au numa ma eḡa ita ḡoei da rava ita aramanei da tauna kampa, wate eḡa tagotagogina da ita raugovaḡa.

²⁵Wavine tagogi, Iesu nolana i nonori ma i nei awarina. Tauna eḡa Jew ma Jentail au Phonisia i tupua, Siria ana au parata. Arua-apoapoena, tauna natuna wavinena aburuna i ruini; ma alona i nae Iesu au naona i mae-peu ma ma i vibaḡai da arua-apoapoena ita viopuni.

²⁷Iesu i aramanei da tauna Jentail; lamna aubaina i riwei i pa, “Eḡa ita ai da roaroa ai lam ata vaia da auou ata verei da au naona roaroa ina am-iaua.”

²⁸Ma wavine i paribelei i pa, “Bada, aiwai u riwei; lamna riwa kaua. Wate auou, roaroa ai lam momoḡina, kepakepa au gabaurina e rauraua e aniani.”

²⁹Ma Iesu wei i riwei i pa, “U paribelana kaua, aubaina ma nae au numa. Arua-apoapoena natum i opu-tawanei.”

³⁰Ma wavine i naeme au numa. Natuna wavinena i ʼnanai i matamatave, arua-apoapoena boiboḡi tevera i opu-tawanei.

³¹Iesu Taia ma Sidon ana parata i netawanei ma au babaḡela Dekapolis i verautuini ma i nae au Galili topana.

³²Oroto taniḡana potapotana ma menana birebirena i neiai Iesu awarina ma i vibaḡai da urana au inina ita terei da ita vilawani.

³³Iesu, oroto i taravaina-opunei da taui ava ma ura-gigina, oroto au taniḡana i terei ma ura-gigina ḡelauna i ovai ma menana i vodadani.

³⁴Nuanuana i bolai ma i ḡoutata au mara; i lavutu tawanana ma oroto i riwei i pa, “Ephatha!” Wei anona, “Ma wanatawanei!”

³⁵Maratagogi taniḡana i wanatawanei ma menana i vidagudagu ma i babani kaua.