Maki 7:5-35

⁵ꞌEnega gete Palisiyao be loina ꞌana toeꞌitao nidi Yesu ꞌena sienaida, sigwae, “Toꞌase manuna ꞌimu tononoyao tubudao ꞌidi loina nigeya siꞌamaꞌamayabedi, ta manima baibailidi siꞌeꞌai?”

⁶Ta Yesu ꞌieonedi, ꞌigwae, “ꞌOmi tokabokabo. Lowaenei Aisea palopita manumi ꞌiona upaupa ꞌaiꞌaila, tuta nina Yaubada ꞌina ona ꞌiꞌetoladina gete nadigega: ‘Tomota getedi ꞌawadiyega siꞌamaꞌamayabegu, ta ꞌatediyega nigeya.

⁷Ta wate ꞌeguya sitapwalolo besobeso, manuna ꞌidi eꞌitao ꞌaboꞌagu nigeya ꞌeguyega, ta esi tomota tuga ꞌidi nuwenuwega.’ ”

⁸Ta Yesu ꞌieonedi wate, ꞌigwae, “Onaꞌaiꞌaila ꞌimi bubuna toꞌumalina, ꞌenega Yaubada ꞌina loina wasaꞌu kwaiyena ta tubumiyao saꞌi ꞌidi bubuna wamulimuliyedi.”

⁹Ta wate ꞌigwae, “ꞌAene ꞌomi tomwalatoi ꞌaiꞌaila, ta nigeya! Manuna Yaubada ꞌina loinao waguiguitoyasedi ta esi tubumiyao ꞌidi bubuna wagiyaiꞌiꞌisidi.

¹⁰Lowa Mosese Yaubada ꞌina loina ꞌisimanena, ꞌigwae, ‘Tamayo be sinayo ꞌuda ꞌamayabedi.’ Ta wate ꞌigwae, ‘ꞌEguma yaita tamana nai sinana ꞌiꞌawa toꞌumaliyedi, ꞌilobwenena be waloemwawasi.’

¹¹Ta ꞌomi ꞌimi eꞌita kabokabo gete nadigega, ‘ꞌAbo ꞌebweu yaita tamana be sinana ꞌieonadi ꞌigwae, “ꞌIgu gwegweyao niꞌatu yatagwaledi Yaubada ꞌenaya ga etaetabuna, ꞌenega nigeya sawesawenaya be yalememi.” ’

¹²Gete ꞌimi loina ꞌenega tomota ꞌidi lema tamadiyao be sinadiyao ꞌediya waꞌetoꞌetobodedi.

¹³Tubumiyao ꞌidi loina gete ꞌenega, be ꞌimi eꞌita wate yauna ꞌediyega, Yaubada ꞌina loina waeyage besobesoena.”

¹⁴ꞌEnega pwalu ꞌibwau limedima ga ꞌieonedi, “ꞌIgu ona gete maiboꞌami wanonodi be nuwami ꞌida sabwalena:

¹⁵Nigeya ꞌebweu toꞌase tomota taꞌeꞌani be sigiegie bailida, ta esi yage nidi ꞌatedega siapweapwesa sawesawediya be sigiebailida.”

¹⁶(-)

¹⁷ꞌEnega Yesu ma ina tononoyao pwalu siebesinedi ga anuwaya silugu, ta ꞌenega ꞌina tononoyao sienaidena, sigwae, “Kapekapeyana ꞌimu onasemalimali nina tomota ꞌediya ꞌuda liꞌami ꞌemaya?”

¹⁸Ga Yesu ꞌieonedi, ꞌigwae, “Nai ꞌomi wate nuwami nigeya ꞌisabwasabwalena, aga? ꞌEnega nigeya wamwalamwalatoni ꞌaene toꞌase taꞌaꞌani be ꞌilulugu soladaya nigeya saꞌi ꞌida giebailida,

¹⁹manuna nigeya ꞌatedaya ꞌitauya ta esiya gamwada namo ꞌena ꞌilugu be muliyega ꞌitatauya sumwana ꞌenaya.” (Yesu ꞌina eꞌita gete ꞌana mwalatoi ꞌaene nigeya ꞌebweu wate masula etaetabuna, ta esi maiboꞌana tada ꞌani.)

²⁰Ta Yesu wate ꞌigwae, “Toꞌase tomota ꞌatediyega siapweapwesa sawesawediya be sigiebailidi,

²¹nadigega nuwanuwa toꞌumalidi be loyawe, ꞌipwala, loemwawasa,

²²loelata, yalakwaiya, gamwasowala, kabo, sogala, eꞌipiꞌipi, sinala, gagasa be bubuna besobeso.

²³Gete yage nidi toꞌumalidi tomota soladiyega siapweapwesa ga sigiegie bailidi.”

²⁴Ga gote ꞌenega Yesu ꞌitoolo ga ꞌitauya Taiya be Saidoni senadiyao ꞌediya ga ꞌebweu anuwa ꞌena ꞌilugu, manuna geya nuwana be tomota sida mwalatoni ꞌina mai manuna, ta saꞌi nigeya kapekapeyana be ꞌimiya kwaiya

²⁵manuna ꞌebweu waine Yesu ꞌina mai tetelina ꞌinonona. Ta waine nina nigeya waine Yudia ta esi tauna goma Pinisia sena Silia solanega, ga natuna mewainena niꞌatu yaluyaluwa biꞌi ꞌigie toꞌumaliyena, ꞌenega sinanana ꞌimai ga Yesu ꞌaenaya ꞌibwago sanamwaꞌuta, ga ꞌisidena be ꞌaene yaluyaluwa biꞌi nina natuna ꞌenega ꞌida ula apwese.

²⁷Ga Yesu ꞌigwae, “ꞌIlobwenena be gogama ꞌadi masula yada ꞌebwaꞌedi bemi, ta nigeya sawesawenaya be gogama ꞌadi masula yaꞌebwaya kedewa ꞌediya.”

²⁸Ta waine ꞌigwae, “Onaꞌaiꞌaila ꞌInapwana, ta saꞌi kedewa tuta yauna ꞌebe ꞌeꞌai ꞌagalaunega gogama ꞌadi masula mugumuguna ꞌenega siꞌeꞌa.”

²⁹Ga Yesu ꞌigwae, “Kagutoki! Nate ona ꞌaiꞌaila. ꞌEnega ꞌutoolo be ꞌuila ꞌimu anuwaya. Yaluyaluwa biꞌi natuyo ꞌenega niꞌatu ꞌiapwesa, ga ꞌiboboꞌana.”

³⁰ꞌEnega ꞌitoolo ga ꞌitauya ꞌina anuwaya ga natunana ꞌilobena ꞌina ꞌebeꞌeno ꞌena, niꞌatu ꞌiboboꞌana.

³¹ꞌEnega Yesu Taiya ꞌipilisinena ga ꞌitauya Saidoni, ta wate ꞌiataona Dekapoli senanao ꞌediyega ga ꞌiapwesa Galili olana ꞌenaya.

³²Ga ꞌebweu tai simeꞌena Yesu ꞌenaya tauna totenatui ta wate meya lidolidona ga Yesu sisidena be ꞌaene ꞌida gitoo be ꞌida boboꞌana.

³³Ga Yesu tai nina ꞌiꞌauꞌewena ga boda ꞌediyega siadumaduma taudimo, ga Yesu nima matagigina tai tenanaya ꞌisaꞌu luguyedi ga muliyega tauna nimana ꞌigiwalina ga tai meyana ꞌigitoona,

³⁴ꞌenega Yesu ꞌiꞌitatuꞌe galewaya ga ꞌatenuwa ꞌoleꞌoleyega ꞌionaona, ꞌigwae, “Epapata”, nate ꞌana gibui “ꞌUebwale.”

³⁵ꞌEnega tai nina tenana ꞌiebwalebwaledi ta wate meyana niꞌatu ꞌipalupalu be kapekapeyana ꞌiona ta ꞌinono palupalu.