Mak 7:5-35

⁵A Parisaiola pa tena asaerla tagun a warkurai la deken e Iesu mang, “Sur asa ning anuma kakak a asaerla bel la mur a asaerla ana nundala a tarai tagun nating? La hangan ka ana dur a kunla.”

⁶Pa e Iesu i keles la mange, “A warwara ane Aisaia i momol ot, ning i warwara na propet nigo tar o mulo a tena asasongola mang, ‘A tarai ne la hanrawai iau ka ana pahanla, ika a balanla i bakbak kol kusun iau.

⁷La lotu oros ka tetek iau, anasa la asaer a taraila ana warkuraila anuna taraila ka.’

⁸Mulo ka han kusun tar a Warkuraila ane God, pa mulo mur kama asasaer anuna taraila.”

⁹Pa e Iesu i atai la mange, “A momolna ot, mulo longor orsan a warkurai ane God, sur mulor mur a asaerla ana numulo a tarai tagun nating.

¹⁰E Moses i atongi mange, ‘Ur hanrawai e tamam pa e tnam.’ Pa i atongi otleng mang, ‘Esining ir warwara laulau o e tamana pa e tana dir umkoli.’

¹¹Ika mulo, mulo asaer a taraila mang, i wakak ka ning tik ir atai e tamana pa e tana mang, ‘Asaning ar nangan mu ono, ia ka saran tari tetek e God.’

¹²Ana asaer ning, mulo sairasi sur gong i nangan e tamana pa e tana.

¹³Ning mulo toli larning, mulo anatarna pas a warwara ane God, pa mulo mur ot a asaerla ning mulo kibasi tana numulo na tarai tagun nating. Pa a galis a ututna otleng larne ning bel i tostos mulo toli.”

¹⁴E Iesu i kabah ulak a kunum a tarai teteki, pa i atongi mang, “Mulo rop mulor longor iau, pa mulor talapor ana nuka warwara.

¹⁵Asaning tik ir ien pasi pa i kas ting na balana, bel ir aduri namatana e God. Ika asaning i purum kusun a nuknukna, i ning ir aduri namatana e God”.

¹⁷Ning e Iesu i han kusun a kunum a taraila, pa i kas uting ui na rumai, anuna kakak a asaer la dekeni ana warwara larlar ne.

¹⁸Pa i atai la mange, “I mangasa bel mulo talapor? I mangasa bel mulo tasmani mang a ututnala rop ning i kas ting na balan tik, bel ir aduri namatana e God?

¹⁹Anasa bel i kas uting na nuknukna, i kas ka uting na balana pa ir kepseni.” Ning i atong a warwara ne, i atong talapori mang a utna na hangan rop i wakak.

²⁰I atongi otleng mange, “A utna ning i purum pas miting na nuknukin tik, i ning ir aduri.

²¹Ine a ututnala ning i sira purum miting na nuknuk a taraila: A nuknuk laulau, na toltol a pamuk, a kinkinau, umkol a mainla, a toltol laulau ana ta hane anuna tik o ta barsan anuna tik,

²²a toltol a muk, a laulau a ginina, a asasongo, toltol na tintaulai pa bel ta meme ono, ram sur a ututnala, di anan saksakan tik, a toltol na aitna pa dat abarah a pukulundi pa a longlong a toltol.

²³A ututna laulaula rop ne la purum miting na nuknuk a taraila, pa ir adur la namatana e God.”

²⁴E Iesu i han mitingia, pa i hanot milau a hanua Tair. I kas uting na ning a rumai. Bel i mang sur tik ir tasmani, ika bel i tolsot sur ir mumun.

²⁵Ning a hane, a natna hane a mot kaning ono. Ning i longor a warwara o e Iesu, aiapka i han pa i punga tuntudu salanigo ta e Iesu.

²⁶A hane ning, i a hane Ponisia miting na papar Siria, belsur a hane Juda. I nunung e Iesu sur ir kepsen a mot kusun e natnalik.

²⁷Pa e Iesu i atai i mang, “Dir tabar masur nigon a kakakla. Bel i tostos sur dir los pas a utna na hangan ana kakakla pa dir minggeni tana papla.”

²⁸Pa a hane i kelesi mang, “Leklek, a momolna ot ning. Ika a papla otleng ting nahai logo, la sira ien a mumut a utna na hangan ana kakakla.”

²⁹Pa e Iesu i atai i mange, “Ana num a wakak a arkeles, ur han ka, a mot ka purum tar kusun e natumlik.”

³⁰Ning a hane i ulak, i oroi e natnalik, kaning i borbor tar ting na logo ngasna. A mot ka purum kusuni.

³¹E Iesu i han kusun a hanua Tair pa i han potor e Saidon sur a puka tasi Galili, pa i hanot ting na papar Dekapolis.

³²A tarai la ben pas ning a barsan a talnganakutkut tetek e Iesu, pa la nunungi sur ir suah a kuna ono.

³³E Iesu i ben masik pasi kusun a kunum a tarai, pa i suah naur a pitlai kuna ting na naur a talngana barsan ning. Lamur i namis pas, pa i tong a laigerem a barsan ning.

³⁴I tadai usaot na langit, i los wuwu pas, pa i atai i mang, “Epata!” A kamkamna mange: “Ur Sapang!”

³⁵Pa a talngana i talapor, a laigeremna i tapalas pa i warwara talapor kakat.