Markus 7:5-35

⁵Iei mine ekewe Farisi me ekewe Sensen Allük ra aisini Jesus, “Pwota noumw kewe chon kaiö resap apwönüetä pwüngün ekewe allük seni ach kewe lewo, nge ra mongö aner won pöür mi limengau?”

⁶Iwe, Jesus a pölüeniir, “A fokun pwüng mine Aisea a fen osuni usumi. Ämi oua chon likatuputup usun a fen mak: ‘Kot a apasa: Ekei aramas ra asamoluei ren kapas chök, nge leluker a fokun toau seniei.

⁷A lomotongau ar fel ngeniei, pun ra aiti ngeni aramas förien aramas allük, usun itä nge ai kewe allük.’

⁸Ämi oua likitala an Kot kewe allük, nge oua aleasochis ngeni aitien aramas.”

⁹Iwe, Jesus a pwal üreniir, “Oua fokun tipachem le öüöngaua än Kot allük fän iten ämi oupwe öüöchü aitien ämi kewe lewo.

¹⁰Pun Moses a allük, ‘Kopwe asamolu semom me inom,’ a pwal apasa, ‘Iö a oteki saman are inan epwe fokun ninnila.’

¹¹Nge ämi oua aiti ngeni aramas pwe are eman aramas a wor ren och mettoch epwe aea le alisi ngeni saman are inan, nge a apasa, ‘Iei Korpan,’ (wewen: Ei metoch an Kot)

¹²ei aramas esap chüen wisen alisi saman are inan.

¹³Ren ei sokun kait oua aiti ngeni aramas oua aücheangauei än Kot kapas. A pwal wor chomong mettoch oua föri usun ei.”

¹⁴Mürin Jesus a körsefäli eu mwichen aramas o a üreniir, “Oupwe aüselingaei ämi meinisin, pwe oupwe wewela.

¹⁵Esap wor och mine a tolong lon awen eman aramas seni me lükün a tongeni alimengaua. Nge met mi towu seni lon awen eman aramas, ina mine a alimengaua.

¹⁶Iö a wor selingan epwe rongorong.”

¹⁷Iwe, lupwen Jesus a feila seni ewe mwichen aramas, a tolong lon ewe imw, iwe, nöün kewe chon kaiö ra tüngor ngeni, pwe epwe awewe ngeniir wewen ewe pworausen awewe.

¹⁸Iwe, Jesus a üreniir, “Ifa usun, oua pwal wewemang usun ekewe lusun? Ousap weweiti, pwe meinisin mine a tolong lon awen eman aramas seni lükün esap alimengaua,

¹⁹pun esap tolong lon lelukan, pwe lon chükükanan, mürin a towu seni lon inisin.” (Ren ei pworausen awewe Jesus a pwärätä pwe mongö meinisin a öch an aramas repwe mongö.)

²⁰Iwe, Jesus a pwal apasa, “Met a towu seni lon awen eman aramas, ina mine a alimengaua.

²¹Pun seni me lon leluken eman aramas a towu ekiek mi ngau: ekiekin mocheisou, solä, ninni, lisowu,

²²maicha, föföringau, atuputup, mochenia, lolowo, kapasingau, lamalamtekia me miritingau.

²³Ekei mettoch meinisin ra towu seni lon leluken eman aramas o ra alimengaua i.”

²⁴Mürin Jesus a feila seni ikenan o feila lon eu fanü arap ngeni ewe telinimw Tirus. Iwe, a tolong lon eu imw, nge esap mochen an eman epwe silei pwe a nom lon. Nge esap tufich an epwe opola.

²⁵Iwe, eman fefin a wor eman nöün nengin a wor eman ngününgau won, a rong usun pworausen Jesus. A müttir feito ren o fotopwäsuk arun pechen.

²⁶Ei fefin eman fin lükün Israel, a uputiu lon ewe fanü Fonisia lon Siria. Neminei a tüngormau ngeni Jesus pwe epwe atowu ewe ngününgau seni nöün we nengin.

²⁷Nge Jesus a pölüeni, “Sipwe akomwen amongöü ekewe semirit, pun esap pwüng ach sipwe angei anen ekewe semirit o mone ngeni ekewe kolak.”

²⁸Nge ewe fefin a pölüeni, “Ewer, ai samol. Inamwo, nge ekewe kolak fän chepel ra pwal mongö ekewe mworomworen mongö mi mworotiu seni än ekewe semirit chepel.”

²⁹Iwe, Jesus a üreni ewe fefin, “Pokiten ka pölüeni lon ei ititin fos, kopwe liwinla le imwom. Ikenan kopwe küna pwe ewe ngününgau a towu seni noumw we nengin.”

³⁰Iwe, lupwen ewe fefin a tori imwan, a küna nöün we pwe a kon won peet, nge ewe ngününgau a towu seni.

³¹Mürin, Jesus a feila seni ewe fanü Tirus o feila ngeni Siton tori ewe nomun Kalilea, nge a pwerelong lon ewe fanü itan Engol Telinimw.

³²Iwe, ekoch aramas ra uwato ren Jesus eman mwän mi selingepüng o awemwöch. Ra tüngormau ngeni Jesus, pwe epwe iseis pöün won.

³³Iei mine Jesus a emwenala ewe mwän seni ewe mwichen aramas, pwe epwe emanüla. A tikilong lon selingen ewe mwän, a atuf o atapa chönawan.

³⁴Mürin Jesus a sachetä läng, a ngasalap o üreni ewe mwän, “Effata!” wewen “Sukula!”

³⁵Iwe, lon ewe chök otun selingen ewe mwän a sukula, a newenewöchüla le kapas.