Marcos 7:5-35

⁵Kwaanzee lee re fariseo nu re maestr, xaa nlu xtizh Dios, mnabdizh lo Jesús, nu nzhé: —¿Chozhiin nangozhawt re xaa kaseed lo lu kwaan mle re xey be? ¿Chozhiin nayanagt xaa gorna gaw xaa, kwentaxa nzhé re xey be?

⁶Zee Jesús nzhé: —¡Gu nak xaa nkade nu nanlet gu kwaan wen! Wen, wen mzaa Chay kwent cheen gu yilo, nen xomod nak gu, leezha né xaa: Né Dios: “Né gu nkela gu na, per nanreket gu tich xnaz na.

⁷Kanxlee nzholl re xaa lo na, nel rese kwaan seed re xaa nak kwaan mroo yek re myet.” Is. 29:13

⁸Lee re gu nle rese kwaan mle xey gu, nu mlaa gu xcheen Dios stub lad.

⁹Nu noka nzhé Jesús: —Tub lad nted gu re wdizh kwaan mxaal Dios le gu, leel re kwaan mlu xey gu lo gu nle gu.

¹⁰Ches nzhé lo ley: “Kela lu xuz lu nu xnaa lu”. Ex. 20:12 Noka nzhé ley: “Xaa nge lo xuz o lo xnaa, bit gu xaa”. Ex. 21:17

¹¹Per gu mbezh nzho mod nii gu lo xuz gu nu lo xnaa gu: “Nagarlot le na yudar rop gu nel rese kwaan mlake lo na nak korban”. (Wdizh ne nii: “Leeya mzala na lo Dios”.)

¹²Nu nzhak re gu kwenta re xaa sbaa mbezh, nanzhaaltra le xaa yudar xuz xaa nu xnaa xaa.

¹³Sbaa nle nanont gu xtizh Dios gorna nlu gu re kwaan mlu re xey gu lo gu. Nu zyen kwaan kwenta kwaane nlu gu.

¹⁴Zee mrezh Jesús rese xaa nu nzhé xaa: —Kenzha gu kwaane nu bin guya.

¹⁵Nik tub kwaan nzeeb leen lextoo xaa le nawent nzo xaa lo Dios, nel re xgab nawent kwaan nroo lextoo xaa, kwaanzee nle nawent nzo xaa lo Dios.

¹⁶¡Re gu nzob nzha, nzhaal gon kwaane!

¹⁷Leezha ngulo mlaa Jesús re xaa zee, zee mzeeb Jesús leen tub yoo kwaan re xaa mseed lo xaa. Nu lee re xaa mseed lo xaa mnabdizh lo xaa: —¿Xomod nak kwent kwaan nguné lu zee?

¹⁸Zee nzhé xaa lo re xaa: —¿Che noka gu, namlata yek? ¿Che nangwiit gu rese kwaan nzhaw xaa nya leen xpaans xaa, nyent mod leya zee nawent nzo xaa lo Dios?

¹⁹Nel namzeebta mer leen lextoo xaa, nel nebse leen xpaans xaa nzeeba, nu nrooya stuba. Wdizh ne mlu Jesús zee nzho mod gaw xaa rese kwaan.

²⁰Nu nzhé xaa: —Kwaan nroo lextoo myet, kwaanzee nak kwaan nle nawent nzo xaa lo Dios.

²¹Nel naz leen lextoo xaa nzhal re xgab nawent: nzoblazh xaa chaal xaa stub ngwnaa, nlewann xaa, nzhut xaa sa myet xaa,

²²nzoblazh xaa kwaan nkano wechxinn xaa, nle xaa rese kwaan nawent, nkade xaa, nzhib bis nachan yek xaa, nzhak xaa enbidyos cheen stub xaa, nzhawyix xaa sa myet xaa, nto xaa yalxwa, nle xaa rese kwaan nachan.

²³Rese kwaan nawent ne nzhal lextoo myet, nu kwaane nle nawent nzo xaa lo Dios.

²⁴Leezha mroo Jesús yizhyo Galilea, zee nzha Jesús yizhyo cheen chop yezh le Tiro nu Sidón. Mzeeb xaa leen tub yoo, nel nanzheklat xaa ne re xaa lo xaa, per nyent mod nkaxlaan xaa lo re xaa.

²⁵Lijer mbin tub ngwnaa lee Jesús nzho leen tub yoo. Me ne nkano tub xchap, mad nzho mbi mal lextoo. Zee ngwa xnaa mad lo Jesús, nu mkichxub me lo Jesús.

²⁶Me ne nanakt tub ngwnaa me sawlazh nu, lee me nak tub me yizhyo Sirofenicia. Ngunaab me jabor lo Jesús zee koo Jesús mbi mal lextoo xchap me.

²⁷Per lee Jesús nzhé lo me: —Yanertlaka nzhaal gaw re xinn xaa, nu nanzhaalt kiib xaa pan lo re xinn xaa, nu zaa xaaya lo re mbak.

²⁸Lee me mkeb nzhé: —Li lu kwaan ba; per noka mbak nzhaw re kwaan ngobi re madwin xan mes.

²⁹Zee nzhé xaa: —Li kwaan né lu baa, nzho mod nya lu. Mroola mbi mal lextoo xchap lu.

³⁰Leezha mbare me garli me, lee xchap me naxna lo loon. Ngulola mroo mbi mal lextoo mad.

³¹Zee mroo Jesús yezh Tiro nu mded xaa yezh Sidón, nu mded xaa yizhyo cheen chii yezh kwaan le Decápolis. Nu mbare xaa roo nistoo Galilea.

³²Zee mbidno re xaa tub xaa nkwee lo xaa, nu nyent mod wdizh wen xaa, zee nzhé re xaa lo Jesús: —Zhib yaa lu cho xaa ne, zee gakwen xaa.

³³Zee mbe Jesús xaa zit lo re xaa, nu kwaan kwen yaa Jesús mgal Jesús leen nzha xaa. Nu mted Jesús nzhuk yaa Jesús nu mgal xaa lo luzh xaa.

³⁴Nu mwii Jesús naz yiba, nu mzilextoo xaa, nu nzhé xaa: —¡Efata! (Wdizh ne nii: “¡Xal!”)

³⁵Gorzee lee nzha xaa mxal, nu mzelo xaa nzhedizh wen xaa.