Markus 7:5-35

⁵A yen ta nebar da te Hesus ta “Anu awena dumagdag na ituldum kiden ta netuldu na dadagkal tam kiden? Te mangan kid hala maski aweda bit magbaggaw,” kunda tentu.

⁶A ya tabbag hapa ni Hesus tekid a “Kuga magimmamappya kam, kustu hala ya nebar na Namaratu ta aglavunen Isayas gafu tekamuy, te ya nebar na a ‘Dayawan nak na tolay kidin ta simuk da, ammi adayu garay ya nonot da teyak.

⁷Awan mantu ta kapkappyan na pangdayaw da teyak, te igitta da haman ya ituldu da ta itulduk,’ kunna,

⁸“On, te baybay-an muy hapa ya lintig na Namaratu, a intu idulot muy ya gagangay na tolay.

⁹Malalaki mantu ya sistema muy, te takwan ya ipagsil muy ta lintig na Namaratu petta idulot muy la ya agangwa muy.

¹⁰Te ya lintig na Namaratu nga netuldu ni mina Moses a ‘Nonotan muy ig dama muy ikid na hina muy,’ kunna. ‘A mappya ta mapapasi ya maguhohug ta dulay tekid,’ kunna ha.

¹¹Ammi tekamuy a ugtulān muy haman ya uhohug na en, te ya ituldu muy tekid a ‘Dana mangatad kam bit ta simbaan na Namaratu, a am awan na sangaw ta iuffun muy ta dadagkal muy kiden a ibar muy tekid ta dana neatad muy na ta Namaratu,’ kummuy.

¹²A gafu ta kumanen a awemuy ipalubus ta kurugan da ya nebar na Namaratu gafu ta dadagkal da kiden.

¹³A liblibangan muy mantu ya uhohug na Namaratu petta idulot da ya ituldu muy, yaga addu para ya ituldu muy ta gagangay muy,” kunna tekid.

¹⁴A sangaw pinaabikan ni Hesus ya tolay kiden tentu, a nebar tekid ta “Pake dangagan muy ya uhohug ku tekamuy petta maawatan muy:

¹⁵Bakkan ta intu ikazigman na Namaratu ya awan magbaggaw kapye na mangan, baka ikazigman na hud ya itun muy ta simuk muy? Intu hud la ikazigman na ya dulay nga nagafu ta simuk muy.

¹⁶“A am kakurugan ta itta ya bangbang muy a mappya ta dangagan muy ya bidan kin tekamuy,” kunna tekid, kapye na kid nagtugutan.

¹⁷A ta datang nig Hesus ikid na ituldu na kiden ta bali a pinohutan da tentu am anu ya ikayat na uhohugan ta ikazigman na Namaratu. A ya nebar na tekid a

¹⁸“Anu awemuy hapa metug ya inuhohug ken? Awemuy hud manonot ta maski am anu ya mehulun ta kanan na tolay a bakkan haman ta yen ya mangatad ta pagzigmanan na,

¹⁹te awena haman ange ta nonot na awa ange hala ta sirat na kapye na sangaw mewarad,” kunna tekid. A gafu ta uhohug na en a nepasikkal na ta mepalubus makan ya kompormi na kanan.

²⁰A ya uhohug na para tekid a “Ya imuhet ta simuk na tolay ya mangatad ta pagzigmanan na, te magafu hala ta nonot na.

²¹Te ya dulay na nonot, ikid na magtakaw, ikid na mangpapasi, ikid na mangadallaw,

²²ikid na maginggum, ikid na mangikatupag, ikid na magladdud, ikid na awan mangiguwad ta dulay na nonot, ikid na pumassil ikid na mamadpadulay, ikid na magparayag, ikid na manguyoyung,

²³a yen kid na tarabaku ya magafu ta nonot na tolay a mangatad kid ta pagzigmanan na,” kunna.

²⁴A tekiden nagtatugut ta iten na lugar a umange kid ta tagad ta lugar na Tiro ikid na Sidon. A nagyan kid ta takday bali ten petta awan ta makkamu ta pagyanan da. Ammi maski kunna ten a aweda haman nakatagu,

²⁵te magananwan la a itta ya takday babbay nga nakadangag ta itta la ten i Hesus, a umange nagtakab ta atubang na en gafu ta balatang na en nga pagzigātan na anitu.

²⁶Bakkan ta Hudyo ya babbayen, te Giregu nga taga Funisya, a ya uhohug na te Hesus a “Ikallak nak, Afu, te patugutam mina ya anitu na anak ken nga babbay,” kunna.

²⁷Ammi ya tabbag ni Hesus tentu a “Mappya ta apolu mangan ya anak kiden, te dulay am meatad ta atu ya kanan na anak kidin,” kunna.

²⁸“A kakurugan, Afu, ya kinamina, ammi awena hud mangan na atu kiden ta hugta na anak kiden nga nahunnak ta lutak?” kunna hapa na babbayen.

²⁹“A kustu hapa ya inuhohug mu, Aboy, dumatang kan mantu ta balim, te nagtugut na ya anitu na anak men,” kun ni Hesus tentu.

³⁰A nagtugut mantu ya babbayen, a dinatangan na hala ya anak na en nga imaidda, a awan na ya anitu na en.

³¹A ta nekabalin da ta iten a nagtatugut kid ha, a inange da ya ili na Sidon ikid na lugar na Dikapolis addet ta Alug na Galileya.

³²A sangaw neange da tentu ya takday lalaki nga bangngag ikid na umal, a nakimemallak kid tentu ta isi-ged na ya kamat na tentu.

³³A sang neadayu bit ni Hesus ya lalaki en ta kaddun na tolay kiden petta ik-ikid la, a netulpat na ya guramay na ta duwa kiden bangbang na lalaki en, kapye na hapa naglutab. A sangaw netulpaw na hapa ya guramay na ta zila na lalaki en.

³⁴A tumangad i Hesus ta langit, a manalasigak hapa kapye na naguhohug ta lalaki en, “Efata,” kunna ta agsitang na Hudyo. “Maukadan kan,” kunna.

³⁵A nakadangag na ya lalaki en, yaga nalukay hapa ya zila na en, a mappya hapa ya pakauhohug na.