Mak 7:5-35

⁵A kum Parisi ma a kum tene ususer tagun a Warkurai det ting o Iesu lena, “Ilai sur anum a kum nat na ususer ka det ser mur a kum etowo anun anundat a taro tagun numugu? Det ser wangon kut nama kum dur na lamandet.”

⁶Ra o Iesu i balu det lena, “A wasiso anun o Aisaia i lingmulus ut, ra i wasiso na poropet mugu taru un mot a kum tene torotoro. I tumusi un mot lena, ‘A taro ri det ru iau kut nama wandet, ikut a balandet i bakbak doko gusun iau.

⁷Det lotu oros kut torom iau, uni det ususer nama kum warkurai kut anun a taro.’

⁸Mot sa wan gusun a kum Warkurai anun o God, ma mot muri mukut a kum etowo anun a taro.”

⁹O Iesu i watungi tan a kum Parisi ma a kum tene ususer tagun a Warkurai lena, “A lingmulus ut, mot sa rosumur gusun a Warkurai anun o God, sur mot in muri kut a kum etowo anun anumot a taro tagun numugu.

¹⁰Uni o Moses i watungi lena, ‘Un ru o tamam ma o nam,’ ra i watungi kai lena, ‘Osi ra in wasiso laulau un o tamano ma o nano, din um doko i.’

¹¹Ikut mot, mot ususer a taro lena, i wakak kut, ra taio in watungi tan o tamano ma o nano lena, ‘Asau ra an warut mur nami, a sa tabor tar o God nami.’

¹²Mot turbati kut sur gong i warut o tamano ma o nano.

¹³Ra mot pami lenra, mot unatino pas a wasiso anun o God, ma mot muri kut a kum etowo ra mot los pasi tan anumot a taro tagun numugu. Ma a susut na utna kai lenri ra ke tokodos, mot ser pami.”

¹⁴O Iesu i kabo melet pas a kunur na taro toromi, ra i watungi tandet lena, “Mot rop mot in longoro iau, ma mot in tasman lele anung a wasiso.

¹⁵Tu utna ra taio in nan pasi ma in ruk unin balano, ken uduri umatan o God. Ikut, a kum utna ra in pirso gusun a nuknukino, i ra in uduri umatan o God.”

¹⁷O Iesu i wan gusun a kunur na taro, ma i ruk una rumu. Anun a kum nat na ususer det tingi una wasiso elelar ri.

¹⁸Ra i watungi tandet lena, “Pepetlai, mot kai, ka mot talapor utmakai? Pepetlai, ka mot tasmani lena a kum utna rop ra i ruk unin balan taio, ken uduri umatan o God?

¹⁹Uni ke ruk una nuknukino, i ruk pas kut unin balano ra i pirso melet.” Ra una nun a wasiso ra, i upuaso i lena, a kum utna na inangon rop i wakak.

²⁰I watungi kai lena, “A utna ra in pirso gusun a nuknukin a taro, i ra in udur det.

²¹Iri a kum utna ra i ser wanpat tagun a nuknukin a taro: a kum sakino nuknuk, a kum petutna na pamuk, a wolong, a petutna ra di um doko a taro, a petutna ra di pam a sakino nam tu ino anun taio o nam tu musano anun taio,

²²a nemnem sur a susut na utna, a kum sakino petutna, a kum torotoro, a kum sakino nemnem na pinindi, a nuknuk laulau sur tu utna anun taio, a petutna ra di mang laulau ara, a petutna ra taio i ulabo pasi ut, ma a kum tuptup na petutna.

²³A kum sakino utna rop ri, det wanpat tagun a nuknukin a taro, ma i udur det umatan o God.”

²⁴O Iesu i wan tagitiro, ra i wanpat milau a tamon Tair, ma i ruk un ara rumu. Ke nemi sur taio in tasmani ra kura i, ikut ke pet lar pasi sur gong det tasmani.

²⁵Ara ino, a nutunu a inolik, a laulau na nion kura uni. I longoro a wasiso un o Iesu, uniutra i wan ra i kis butkeke nisan a kikino.

²⁶A ino ra, a ino Ponisia tagun a papor Siria, i awu sur a ino Juda. I saring o Iesu sur in lakro ru a laulau na nion gusun o nutunulik.

²⁷Ra o Iesu i watungi tano lena, “Din tabor masur mugu tar a kum nat. Ke tokodos sur din los a utna ana kum nat, ma din woro i tan a kum pap.”

²⁸Ra a ino i balu i lena, “Labino, a lingmulus ut ra. Ikut, a kum pap kai det ser wan a kum mumumut na utna nago utuntudu ina kabulu na inangon ana kum nat.”

²⁹Ra o Iesu i watungi tan a ino ra lena, “Una num a wakak na minabalu, un nan kut. A laulau na nion i sa pirso gusun o nutumlik.”

³⁰A ino i milet melet, ra i tama o nutunu kura i inep taru una bano. A laulau na nion i sa pirso taru gusuni.

³¹O Iesu i wan gusun a tamon Tair ma i wan sakit o Saidon sur a du tasi Galili, ra i wanpat una papor Dekapolis.

³²Ara taro det ben ara musano i kutkut ma i ngat torom o Iesu, ma det saringi sur in ubek aru lamano netes uni.

³³O Iesu i ben gisen pasi kut gusun a kunur na taro, ra i ubek arin kaskas na lamano una arin talngan a musano ra. I ibis taru ra i pam in karmen a musano.

³⁴I tatado usapat una langit, i los wuwu pas, ra i watungi tano lena, “Epata!” a kukuraino lena: “Un papos!”

³⁵Uniutra, in talngano i talapor, ma in karmene i tapalos ra i wasiso pat.