Mareko 7:14-33

¹⁴MRK 7.14-23 Iesude ko lera kub darabgerda tababim a eudige yabi daratagerda, “Wa gair legize karim irispilare a wage mirem mamor wabi idonige ikedrare nalu yaka dataute.

¹⁵Nole ko lu ikeredi e le waikai seksek obai nade able lu obakiamu abi gemge obau. Nolekar. Able le pe akaidari seksek baidari pe nalu abialam adem eosmeda.

¹⁶Wa gair legize able mir erpeirare a wabidoge ikedrare!”

¹⁷Keubu Iesude lera kub darakaireta a bakiamuda metage badari, abi memeglegize abi itmerda able mir abisir mirlam.

¹⁸Iesude yabi daratagerda, “Aise! Nako wako uridli able mir nole wabidoge ikeredi? Lu adlam bakiauda le gemge barti nole yabi nakerda seksek berda,

¹⁹ableglam able lu nole barti bakiauda yabi idonige. Wi bakiauda kemge a mena bakiauda adem kemlam bausi.” (Nade Iesude able mir detauti, e yabi natomeretlare able gair lewer pe nagriweretlare legize umele wairolare).

²⁰Iesude ga ko detauti, “Nalu lu pe lelam adem eosmeli abi ikeli seksek beli

²¹ableglam muilam, le nerkeplam a idonilam pe eosmeli adud akepwar, a kogem, a erwamem, a le apit, erwamem nerut lera koskir a kimiar,

²²gair lu no mara wanagriwertawem, seksek idoni mara waikereder wader leem, besmir, adud mir, debelulag, besmir wader le daratautlare, baospirer, a paimpaim tonar.

²³Gair able au adud lu pe teosmeli le muilam yabi nakereda seksek beli.”

²⁴MRK 7.24-30 Ege Iesude able uteb dikairti a bakiamuda able utebem ge maike au utebge irdireder abra nei dikereder Taia. E bakiamuda metage badari a e nole lagkak dawer le umele oberda e ge dawer: e umerkak wadali wespili.

²⁵Koskir ge able utebge dawer Girisle: e ge eosmeda au utebge abra nei dikereder Ponesia pe Siriage irdiredi. E tabakiamuda Iesuim a abi opem kokmamu emrida e Iesuim bagwi ko dimoni adem waismeda abi neurlam.

²⁷Ege Iesude abi ikaidari, “Ka omaskir kikem darasisiare. E seksek ikeredi ka omaskirira lewer adem takalu kai kei ka omaiem nabataweredlu.”

²⁸Ege able koskiride abi ikaidari, “Ople, able omai pe erdedi wi umele omaskira puipi lewer wairware.”

²⁹Iesude able koskir detagri, “Ma barkak detautli; ma bakiamu gedim mara neur terdar ableglam dimoni emetu abialam eosmeda.”

³⁰Nadege able koskir bakiamuda gedge ege tabara neur terdari mapodan sikge ipereder dimoni ge emetu eosmeda.

³¹MRK 7.31-37 Ege Iesu adem bakiamuda able gedlam ge maike Taiage naridweretlare. E nerut au uteb gabem bakiamuda abra nei dikereder Saidon a no bakiamuda able ged gabem abra nei dikereder 10 Uteb mena Galilaia Nikeperge.

³²Ege kimiar ge dawer nole asorkak e umele no kebikebi mir waditauti. Kepkep legize able kimiar tigareda Iesuim a abim bagoda e tabara tag abidoge wadikmerikda.

³³Iesude able kimiar erpeida ege abi adem datkimwarda yabialam ge le nikidetreder. Ge, ege tabara tagpim nakaidari ge able kimiar geripge namarikda. Ege eudige mos ikeida, a able kimiarira werut itutida.