SAN MARCOS 7:14-33

¹⁴Acxni̱ la̱nchuná̱ huaniko̱lh fariseos, tasaniko̱lh chú̱ xli̱pacs li̱lhu̱hua̱ pi̱ catalacatzuhui̱ko̱lh, chu̱ chuná̱ huaniko̱lh: —Caquinkaxpatnítit mili̱pacscán, na̱ caakatá̱kstit tu̱ nacca̱huaniyá̱n.

¹⁵Huixín catzi̱yá̱tit hua̱ntu̱ huay cha̱tum, an hasta c-xpu̱lacni, chu̱ ni̱ lakla̱kalhi̱niy xli̱stacna, hua̱ntu̱ lakla̱kalhi̱niy xli̱stacna hua̱ntu̱ mina̱chá̱ c-xpu̱lacni xnacú̱.

¹⁶¡Lapi̱ huixín kalhi̱yá̱tit mintake̱ncán pus li̱huana̱ cakaxpáttit laqui̱mpi̱ naakata̱ksá̱tit hua̱ntu̱ cca̱ma̱akata̱ksni̱putuná̱n!

¹⁷A̱li̱sta̱lh acxni̱ Jesús tapa̱nu̱niko̱lh li̱lhu̱hua, na̱ ta̱tanu̱ko̱lh xli̱ma̱kalhtahuáka̱t c-xchic, xlacán tikalhasquinko̱lh xatú̱ xuaniputún yama̱ takalhchihuí̱n tu̱ xli̱xakatli̱ko̱ni̱t.

¹⁸Cha̱nchu̱ huaniko̱lh: —¿Tú̱huan ni̱ lay akata̱ksá̱tit huixín hua̱ntu̱ cca̱huaniputuná̱n? Huixín tla̱n catzi̱yá̱tit pi̱ xli̱pacs hua̱ntu̱ huay cha̱tum, ni̱ lay catima̱xcajua̱lí̱nilh xli̱stacna,

¹⁹sa̱mpi̱ ni̱ antá̱ cha̱n c-xnacú̱, hua̱mpi̱ ma̱n antá̱ c-xpa̱lu̱hua, chu̱ a̱li̱sta̱lh makampalay c-xcajuá̱lat. Jesús acxni̱ chuná̱ huá̱, xuamputún pi̱ catu̱hua̱ tu̱ huacán, pacs tla̱n huacán, chu̱ ni̱ catima̱xcajuá̱li̱lh xlatama̱tcán.

²⁰Cha̱nchu̱ chuná̱ huanipalako̱lh: —Hua̱mpi̱ ma̱xcajua̱li̱y xli̱stacna cha̱tum hua̱ntu̱ mina̱chá̱ xtapuhuá̱n c-xnacú̱.

²¹Sa̱mpi̱ antá̱ mina̱chá̱ c-xpu̱lacni, c-xnacu̱ cha̱tum, chuná̱ pala ni̱ lacuán tapuhuá̱n; antá̱ puhuán la̱ntla̱ nalakamaklhti̱y xpusca̱t achatum, la̱ntla̱ naxakatli̱y tanuj pusca̱t, usu chixcú, chu̱ la̱mákni̱t, la̱ntla̱ nakalha̱nán,

²²chu̱ la̱ntla̱ naaksani̱nán, usu nalakcatzán catu̱huá̱ tu̱ ni̱ xlá, naquiclhcatzaniy a̱chatum, usu nasitziniy, chu̱ catu̱huá̱ tu̱ ni̱ lacuan tapuhuá̱n.

²³Pacs hua̱ na̱ yumá̱ tu̱ ni̱tla̱n talacapa̱stacni̱ mina̱chá̱ c-xnacú, chu̱ ma̱xcajua̱li̱niy xli̱stacna c-xlacati̱n Dios.

²⁴Ni̱ li̱maka̱s, taca̱xta̱qui̱chá̱ antá, tíalh latapu̱li̱y lacatzú̱ ca̱chiquí̱n huanicán Tiro chu̱ Sidón. Maktum acxni̱ tánu̱lh c-chiqui̱ anta̱ni̱ namaktahuilay, ti̱ni̱ cacátzi̱lh tipuhua̱, hua̱mpi̱ ni̱ lay tátze̱kli.

²⁵Sa̱mpi̱ cha̱tum pusca̱t, ni̱ antá̱ xala c-Israel xuani̱t, xlá̱ xli̱chihui̱nán griego, xalacachín xuani̱t c-Sirofenicia, luhua xamakat tíyat. Xlá̱ xuí̱ cha̱tum xtzuma̱t hua̱nti̱ xma̱xcajua̱li̱nini̱t xtalacapa̱stacni cspiritu akskahuiní. Ma̱n huá̱ cátzi̱lh anta̱ni̱ xuí̱ Jesús, tuncán lákchilh, lakatatzokóstalh c-xlacatí̱n, huánilh pi̱ cama̱pácsalh, chu̱ catama̱xtúnilh cspiritu akskahuiní̱ hua̱ntu̱ xkalhi̱y xtzuma̱t.

²⁷Hua̱mpi̱ Jesús chuná̱ kálhti̱lh: —Caquima̱xqui̱ quilhtamacú̱ pu̱lh cacmakta̱yako̱lh xlakskata̱n Dios hua̱nti̱ yunú̱ xala c-Israel, sa̱mpi̱ ni̱ tla̱n maklhti̱ko̱cán xli̱huatcan camán laqui̱mpi̱ nama̱xqui̱ko̱cán lactzu̱ chichí̱n, hua̱nti̱ ni̱ napa̱xcatcatzi̱niko̱y.

²⁸Hua̱mpi̱ yama̱ pusca̱t akáta̱ksli̱ tu̱ xuaniputún, chu̱ chuná̱ kálhti̱lh: —Quimpuchiná, xli̱ca̱na̱ xlá̱ la̱ntla̱ huana, hua̱mpi̱ hasta lactzu̱ chichixni ni̱ma̱ tahuilako̱y c-xtampi̱n mesa sacuaqui̱ko̱y hua̱ntu̱ ni̱ huako̱y xli̱huatcan camán.

²⁹Jesús chuná̱ huánilh: —Luhua clakáti̱lh la̱ntla̱ chihui̱nani̱ta, tla̱n li̱pa̱xuhu napina̱ c-mínchic sa̱mpi̱ yama̱ cspiritu akskahuiní, aya makaxtakni̱t mintzuma̱t.

³⁰Puschí̱ yama̱ pusca̱t, lacapala̱ alh c-xchic, chu̱ acxni̱ cha̱lh, xli̱ca̱na̱ ma̱nóklhulh xtzuma̱t, nia̱lh xkalhi̱y cspiritu akskahuiní, lacastalanca xuani̱t, chu̱ clhtatama̱ c-xpu̱tama.

³¹Jesús acxni̱ taxtupá̱ c-xatiyat Tiro, antá̱ alh c-xatiyat Sidón, a̱li̱sta̱lh pacs lakatza̱lako̱lh makapitzi̱n lactzu̱ ca̱chiquí̱n hua̱ntu̱ xuí̱ c-Decápolis (hua̱ yuma̱ tachihuí̱n huamputún: “Akca̱hu Chuchutsipi̱”), chu hasta tícha̱lh c-xquilhtu̱n ta̱kaya̱huaná̱ c-xtapaksi̱n Galilea.

³²Antá̱ li̱minica̱ Jesús cha̱tum akata̱pa̱ko̱ko, squinica̱ li̱tlá̱n pi̱ nahuili̱niy xmacán c-xokspú̱n laqui̱mpi̱ napacsa.

³³Jesús lacatanu̱ tá̱alh yama̱ chixcú̱ anta̱ni̱ ni̱ luhua lhu̱hua̱ xlaya̱kó̱ chixcuhuí̱n laqui̱mpi̱ ni̱tí̱ naucxilhko̱y. Antá̱ akamá̱nu̱lh lactzu̱ xmacán c-xtaká̱n; a̱li̱sta̱lh chujli, chu̱ huilí̱nilh xchújut csi̱máka̱t.