Marcos 7:5-35

⁵E kjĩshko ga tjl̈ẽ l̈ok Jesús kong ga «¿Bop oppinggaga kjwe, bi tjl̈apgaga tek dënashko so sdëkwo bangkjre l̈ok l̇l̇ëm ega? Ië l̈okshko ga orkwo shkwë l̇l̇ëme» l̈e.

⁶Kuya ga tjl̈ẽ ba kong ga «¡Pjãy Sbö tjl̈õkwo söga jl̈õkoyo l̈ëmi, gueniyo pjãy wotjl̈ĩk owa bomi pjl̈úshko! L̇l̇ëye l̈ara Sbö tjl̈õkwo l̈aga tek dënashko so Isaíasdë bomi kjĩshko l̈i, e jl̈õe. Tjl̈ẽno beno eni: »“Nopga ëre, tja poshrëya ba kjamo go, gueniyo tja woyotjl̈ĩya pjang ba pjl̈úshko l̇l̇ëme.

⁷No pĩya kjok l̇l̇gwekkl̈o taga norë l̈i go eröe. E kjĩshko ga tja poshrëya l̈öng l̈i l̇l̇ëno l̇l̇ëme.”

⁸»Sbö kjok l̇l̇gwekkl̈o l̈i sömi ĩyado l̇l̇ëme. Pjãy ber l̈öng no sdëkwo shäryë döe.

⁹Sbö kjok l̇l̇gwekkl̈o l̈i kol̈ëmi l̇l̇ëm, bomi sdëkwo shäryëmi wl̈o.

¹⁰Moisés tjl̈ẽno tek dënashko ga “Bomi dataga, bomi mekëga, e bangkjrozĩ, iozĩ ber tjwl̈õ ara.” Tjl̈ẽno obi ga “Ëye ba data, ba mekë, e äyoshtono ga e zrökko.”

¹¹Gueniyo ga pjãy tjl̈ẽ ga ëye tjl̈ẽno ba data, ba mekë kong ga “Pjãy kjimtër ga äe. Bor l̇l̇ëbo uunkong ëre tworor tjeng Sbö kong pjire” l̈ara ba kong pjir ga

¹²ba data, ba mekë, e kjimte ame ga pjl̈úe l̈ëmi eni.

¹³Eni ga bomi sdëkwo pimi oba kong l̈i kjĩshko ga Sbö tjl̈õkwo l̈i ioromi beno tjwl̈õ l̇l̇ëme. Ga pjãy l̇l̇ëbo shäryë owa obl̈ë obl̈ë e kjoyo bakoe» l̈e.

¹⁴Eshko ga nopga rokara tek ba zl̈ong bäng obi, ga tjl̈ẽ ba kong ga «Tja kuzĩ uunkong, miydëmi wl̈o.

¹⁵Nopga äär ber owa Sbö bokso l̈aga dl̈i ue l̈irë l̇l̇ëme. Miga ber l̈öng äär ba bokshto wl̈o l̈aga ba wotjl̈ĩk wen ba pjl̈úshko l̈irë» l̈e.

¹⁷Tjl̈ẽno oba kong pjir ga opshino jek ey dwayo, ga opzrëno jek öötong shäng u jong kjwara eshko l̈i roshko. Eshko ga ba oppinggaga tjl̈ẽ l̈ok ba kong ga «Rokërwa bop kong sira ga l̇l̇ëye l̈ëp shäng oba uunkong kong yẽ, e l̇l̇ë l̈okl̈o l̈os borwa kong, miydërwa wl̈o» l̈e.

¹⁸Kuya ga tjl̈ẽ ba kong ga «¿L̇l̇ëye l̈ër shäng l̈i l̇l̇ë l̈okl̈o miydomirë l̇l̇ëm obire? Nopga äär ber owa Sbö bokso l̈aga dl̈i uara l̈irë l̇l̇ëme. Dl̈i uëy l̈i jer äär ber tjeng bi bö roshko. Pjir ga tur bi roy dwayo. E äär ber tjeng bi pjl̈úshko l̇l̇ëme. E kjĩshko ga shji äär ber pjl̈o bek Sbö bokso dl̈i kjĩshko l̇l̇ëme» l̈e. Tjl̈õkwo l̈ara Jesúsdë shäng l̈i, e dl̈i uunkong uëy ga pjl̈úe l̈okl̈o.

²⁰Pjir ga tjl̈ẽ obi ga «Nopga äär ber owa Sbö bokso l̈aga ba wotjl̈ĩk wen ba pjl̈úshko l̈irë.

²¹No wotjl̈ĩk owa, pë no orkwosmono ba tjok l̇l̇ëm l̈i tjok, no zrök, pë wal̈ë ba boy l̇l̇ëm l̈i tjok, l̈ũrkë, wotjl̈ĩk dbur töng ba kong erö, l̇l̇ëbo shäryë obl̈ë kong owa, oba jyãpgwë, l̇l̇ëbo owa shäryë l̈öktkë l̇l̇ëm wl̈eniyo, wotjl̈ĩk owa obl̈ë tjok ba l̇l̇ëbo kjĩshko, obl̈ë l̈ãywë owa, opyë woydë ber tjwl̈õ ara obl̈ë kjinmo, l̇l̇ëbo shäryë wotjl̈ĩk l̇l̇ëm, e wen tëm ba pjl̈úshko dwayo uunkong.

²³Nopga äär ber owa Sbö bokso l̈aga l̇l̇ëbo tjeng kës ëre wen ba pjl̈úshko l̈irë» l̈e.

²⁴Jesús opshino to kjok eshko dwayo ga jek öötong shäng Tiro kjokyo. Eshko ga u wl̈ẽna jong kjwara ber sök eshko miydëba l̇l̇ëm wl̈o l̈ara. Gueniyo öötong sök eshko l̈i miydarabae.

²⁵Kjok eshko ga wal̈ë sök kjl̈ara, e judío l̇l̇ëm, e Fenicia so. Fenicia kjokyo, e Siria kjokyo obi. E wa sök kjl̈ara wal̈ë, kjwozirwa wl̈eniyo, goshko Ä sëya kjl̈ara. Jesús roy miydara wal̈ë l̈irëshko ga tekdo shrono shäng ba zl̈ong bäng ga kjök tono, tjl̈ẽ ba kong ga «Tja wa sök kjl̈ara ushko wal̈ë, goshko Ä sëya kjl̈ara. Rokër bop kong sira ga sëya l̈i ichëp to bor kong» l̈e.

²⁷Gueniyo kuya ga tjl̈ẽ ba kong ga «Woyde ga bi wapga ië bäm go. Bi wapga dl̈i l̈i döy, twëy shjiti kong wl̈o ga äe» l̈e.

²⁸Kuya ga tjl̈ẽ ba kong ga «Jl̈õe, Tjl̈apga. Gueniyo wapga l̈i iëshko ga ba dl̈i pjl̈oyo l̈on ter töshko ga ue shjitirë ga pjl̈úe» l̈e.

²⁹Kuya ga tjl̈ẽ ba kong ga «Tja dboryorop eni kjĩshko ga pja woydë ame. Pja nom iröng bop ushko. Ä sëya pjang bop wa go l̈i to tjän» l̈e.

³⁰Wal̈ë l̈i to ey dwayo. Öötong shäng ba ushko ga ba wa l̈i wl̈ẽna buk ba bukkl̈o kjing go. Ä sëya l̈i to tjän.

³¹E irgo ga Jesús opshino to Tiro kjokyo dwayo, jongya Galilea di bäng buk kësbang bukshko. Jek shäng l̈i jek jong Sidón kjokyo ga öötong shäng Decápolis kjokyo.

³²Eshko ga domer sök kjl̈ara kjok kugö l̇l̇ëm, tjl̈ẽ ma wl̈eniyo. Domer l̈i söraba Jesús zl̈ong bäng, ga tjl̈ẽ l̈ok ba kong ga «Rokërwa bop kong ga pja orkwo ios domer ëre kjing go sira, poptëp wl̈o» l̈e.

³³Kuya ga domer l̈i orkwo shara, ga söra jek nopga ara l̈öng l̈ishko dwayo pjola sira. Öötong l̈öng eshko ga Jesús sakkwo zrëno domer l̈i kwomgwo bäng kar kare. E irgo ga ba sakkwo shira iröng, ga pöra ba tröng go, ga domer l̈i kjyorkwo porwara ba sakkwo go.

³⁴Eshko ga kjok dogo ĩya jem drëng ga tjwl̈õ shrono rong, domer l̈i songe l̈e kjĩshko. Ga tjl̈ẽ domer l̈i kong ga «¡Efatá!» l̈e. (E «Kwom ro, pjãy roshwĩzong» l̈okl̈o.)

³⁵Jekdo eshko ga domer l̈i kwom ro tuk l̈i roshwino beno kjok kugö pjl̈úe. Ba kjyorkwo l̈i döktong beno tjl̈ẽ pjl̈ú bakoe.