Marcos 7:5-35

⁵Bapoxonae fariseomonae, irʉ pomonae jiwi pecuidubiwi Moisés pia peitorobi coyene tatsi, jeye Jesustha: —¿Eta xua metha jinya jiwimonae jopa exanaeyo xua pocotsiwa wamo susato jiwi pia peitorobi cui coyenewatha itoroba xua penajʉntʉ coyene taxobiyainwa? Jinyamonae barapo cui jopa exanaeyo xua jopa matha tsiwanaya nacobe quiateibiyo poxonae beya xaiba. Daxota jinyamonae pomonae peantʉcuiruyapube jiwi xua penajʉntʉ coyene taxobixae, jei barapomonae.

⁶Jesús jume nota barapomonae, jeye: —Bara Isaías pon Nacom peitorobi jume pepaebin beta xaniwaicha paca yabara paeba xua paxam pomonae itara mexeya xanepanaeya pepaebi jiwi pam, daichitha apara abeya peexanae jiwi pam. Bapon paca yabara tinaeya jeye, xua Nacom paeba: ‘Barapomonae neyabara barʉ cui itura jina poxonae cueicueijei tsaibi, ichitha pejʉntʉ coyenewantha jopa neantobeyo.

⁷Pocotsiwa poxonae barapomonae wʉnae nejainta saya pejume pawi. Po pecuidubiwa xua barapomonae cuiduba jiwitha saya apara jiwi pia peitorobi coyenewa tatsi’, jei Nacom xua Isaías tatina Nacom, jei Jesús.

⁸Equeicha Jesús jeye barapo fariseomonaetha irʉ pomonaetha pomonae pecuidubiwi Moisés pia peitorobi coyene tatsi: —Saya paxam panaitematame pocotsiwa Nacom pia peitorobi coyenewa tatsi painya exanaenexa po peitorobi coyenewa painya amo susato jiwi copiya canamata forota. Paxam baxua paexaname poxonae jiwi paitorobame xua jiwi matha penacobe quiateibinexa poxonae xaiba penajʉntʉ coyene taxobiyainwa, jei Jesús.

⁹Equeicha Jesús barapomonaetha jeye: —Itapetsiya painya neexanaenexa pocotsiwa painya amo susato jiwi pia peitorobi coyenewatha itoroba, daxota bichoina pajume itawetame Nacom pia peitorobi coyenewa tatsi.

¹⁰Bayatha Moisés pia peitorobi coyenewatha itoroba, jeye: ‘Axa barʉ cui itura jinare, irʉ ena barʉ cui itura jinare’, jei. Equeicha bapon Moisés jeye: ‘Pon abe yabara paeba paxa, xua jopa peyawenaewa paxa ichacuitha tsipae xua penatha, bara bapon bewa tʉpaena’, jei Moisés.

¹¹Ichitha paxam papaebame, xua pinae pebin bara itacʉpatsi xua paxatha tsipaeba, ichacuitha xua penatha xua jeye: ‘Jopa neitacʉpaeyo xua tapaca cayawenaewatsi, tsipei daxita pocotsiwa xeinan xua bequein pocotsiwatha tapaca cayawenaewatsi tsainchi baxuan daxita Nacomtha catan’, xua jei pebin.

¹²Poxonae pebʉrʉya payabara nanta xeiname xua bapon baxua paeba, bapoxonae bara pacopatame xua barapo pebin jopa penantawenonaewa xua peyawenaewa paxatha, irʉrʉ xua penatha.

¹³Poxonae paexanaponame pocotsiwa painya amo susato jiwi pia peitorobi coyenewatha itoroba, xuano xua ichamonae pacana exaname xua baxua irʉ exana bapoxonae paxam Nacom pia peitorobi jume pecui pawi jume pacana exaname. Barichi ichawanno xua be jʉpa xua peabe coyenein paexanameno, jei Jesús.

¹⁴Equeicha Jesús waba barapo bicheito pia xainya berena, jeye: —Daxita paxam pana nejume taema yawa pana nejume copi yaputaema pocotsiwa paca tsipaebinchi.

¹⁵Pocotsiwa ba pebin pecoiboto deca tsijain jojonecatsi pexaewan, barapo coyene apara ba jopa bapana pebin antʉcuiruyapube exanaetsi xua poxonae pocotsiwa peexanaexae. Jame pocotsiwa ba pebin nanta xeina xua pecoibototha caunuta xua peabe jume, barapo jume coyenewatha jame pebin antʉcuiruyapube exanatsi xua poxonae pecueicueijeixae baxua.

¹⁶Icha pamuxu dubename, moya pana nejume naitaeware pocotsiwa tapaca tsipaebiwatsi, jei Jesús.

¹⁷Poxonae Jesús jiwi cuenta pona yawa bo bejoniya, bapoxonae Jesús pijimonae yabara yainyabatsi barapo pecayabara jʉta pepaebi diwesiyo.

¹⁸Jesús jume nota pijimonae jeye: —¡Paxam bara paichim icha fariseomonae ichi! Jopa payabara yaputaem barapo pecayabara jʉta pepaebi diwesiyo xua pexaewa yabara. Bayatha paxam payaputaneme pocotsiwa pebin tsijain jojonecatsi pexaewa pecoiboto deca, barapo pexaewa jopa abe cana exanaeyo pebin pia jʉntʉ coyenewa. Barapo pexaewa pebin jopa antʉcuiruyapube exanaetsi. Barapo pexaewa jopa ponaeyo pia jʉntʉ coyenewatha. Jame barapo pexaewa pecotsorotha pona. Bapoxonae pexaewa aichurucuae nawexacaeca, jei Jesús. Poxonae Jesús baxua paeba jiwi yaputane xua daxita pexaewan bara wʉnae pexaenexa. Jopa jiwi antʉcuiruyapube exanaetsi.

²⁰Equeicha Jesús namchi, jeye: —Pocotsiwa pebin pecoibototha caunuta xua peabe jume, barapo jume coyenewatha jame pebin antʉcuiruyapube exanatsi.

²¹Tsipei pejʉntʉ coyenewatha pebin nanta xeina, xua meje bapocotsiwanje: Abe penanta xeinae coyenewa, irʉ peita coxanae coyenewatsi coyenewa xua poxonae penayaputae jiwi naperʉ nacoyaba, irʉ ichʉn piawa tatsi pecaibi coyenewa, irʉ ichʉn anaya pebexotsi coyenewa, irʉ ichʉn piseuri tatsi pepichi coyenewa, irʉ ichʉn piawa tatsi peichichipae coyenewa, irʉ abe peexanae coyenewa, irʉ ichʉn pemuxuitorobiwatsi coyenewa, irʉ peyʉyʉjei coyenewa, irʉ peuwi coyenewa, irʉ ichʉn peyabara naerabiwatsi coyenewa, irʉ ichamonae peaebi coyenewatsi, irʉ jopa xainyeya peexanae coyenewa poxonae bequein yaputaetha xua jopa bewa exanae.

²³Daxita barapo coyenein pejʉntʉ coyene weya jume pichapa. Barapo jume coyeneintha pebin antʉcuiruyapube exanatsi, jei Jesús.

²⁴Bapoxonae Jesús bara weya pona. Tiro tomara beya pona. Sidón tomara beya ponano. Jesús botha joniya. Bequein Jesús aichaxaibi xua jiwi yaputane ichaxota bapon eca, ichitha Jesús jopa itacʉpaetsi xua nameicha eca.

²⁵Barapoxonae caena nainya petsiriwa jume tane xua Jesús botha eca. Barapowa pexantiyo tatsi cauri xeina. Daxota barapo petsiriwa patopa Jesustha. Yawa pentabocototha uncua Jesús peitabaratha tatsi xua bapowa petsita ainya cuixaetsi.

²⁶Barapowa penanapaincha poponaewayo pecueicueijeixae griegojume. Jopa judiomonae jitowayiyo. Bapowa sirofeniciamonaewayo naexana penaexanaexae Fenicia tomaratha xua Siria nacuatha. Barapowa Jesús wʉcatsi jeye: —Taxantiyo inta taitawere cauri, jei barapowa.

²⁷Ichitha Jesús jume nota barapowatha pecayabara jʉta pepaebi diwesiyotha, jeye: —Jopa bewa ba auri apatsi pexaewa pocotsiwa pexui pia pexaewa tatsi. Baxua caunutsiya apara yabara paeban xua jopa bewa catsin tsane pomonaetha pomonae penanapaincha jinompaewi pomonae jopa judiomonae naexanaeyo xua pocotsiwa barompaya judiomonae piawa tatsi. Daxota jopa wʉnaeyo xua cayawenatsi, jei Jesús.

²⁸Barapowa jume nota Jesustha pecayabara jʉta pepaebi diwesiyotha, jeye: —Aa, bara barichi xuaunxuae netsipaebame ponxaem Tanecanamataxeinaem. Xainyei paebame. Jopa ba bewa auri catsibi pexui pia pexaewa tatsi. Daichitha auri ba xane pocotsiwa pexui sorobaba barapo pepʉrʉwixi pocotsiwa pexaethopaewa pebʉxʉpana tsica othopeica. Bara jʉtiya ichiya necana ichinde, daichitha neyawende, jei bapowa.

²⁹Barapoxonae Jesús barai barapowatha, jeye: —Bara xaniwaicha paebame daxota cayawenatsi. Moya bara bara beya ponare. Bara bayatha nexantiyo wepu poinchi cauri, jei Jesús.

³⁰Poxonae barapowa patopa pia botha, pexantiyo taebota xua camatha jʉntema boca. Mataʉtano tane xua bapowayo bayatha wepu poinchi cauri.

³¹Bapoxonae Jesús Tiro tomara weya pona, xua caibeya pona, ichaxota Sidón tomara iya pona. Mataʉtano ichaxota diez po tomaranbe iya pona po tomaran pewʉn Decápolis. Bapoxonae Galilea pucuatha patopa.

³²Baraxotiya Jesús pia xainya berena tacapoinchi pebin pon muxusipana, mataʉtano xua jopa itacʉpaetsi xua pecueicueijeiwa. Pomonae pecarendenaexae bapon, barapomonae Jesús wʉcatsi, xua Jesús penta jayabiwa tsane xua bapon axaibi peexanaenexa tsainchi.

³³Barapo pebin Jesús aisowa bebarʉ poinya pin bicheito pia xainya weya tatsi. Jesús pecobesitobetha nantiyabe muxu yauxatata. Poxonae naone sutaba peone pecobetha bapoxonae barapo cobetha ebato jayaba bapontha.

³⁴Bapoxonae Jesús peitaboco benecoicha, yawa najumei cajujuina, yawano jeino bapontha: “¡Efata!” jeichichi, (xua jeichichi: “¡Muxu nasabare!” jeichichi.)

³⁵Bapoxonae caena nainya bapon muxu nasaba nantiyabe. Mataʉtano bara ebato xanepana. Mataʉtano bara itacʉpatsi xua pecueicueijeiwa beta.