Marcos 4:24-34

²⁴Minikagi heman si Jesus, “Keilangan toloen niyo se dinineg niyo.

²⁵Se otaw kominawà te kebenalan, yan se dogangan te kebenalan. Meneng se otaw eked kinawà te kebenalan, yan se pegwedadan te kebenalan.”

²⁶Minikagi heman si Jesus, “Iling kani se peglowan te Timanem. Aw menanem se otaw te benì doton te pawà din,

²⁷penga niyan, wedad ketetana din tepad te pegtilles niyan pengkey aldaw aw delem, so gayed tomobò aw tomilles se itanem din pengkey wedà din ketegahi se pegtobò niyan.

²⁸Gayed tomilles se itanem kidoen te tanà, so onà tomobò, aw penga niyan domawen, aw penga niyan mongo iyan.

²⁹Aw metesan se pongo, geniyen iyan te otaw, so dimateng den se aldaw te peglegani.”

³⁰Minikagi heman si Jesus, “Meg-indan a den kenyo tepad te peglowan te Timanem pineokit te tegdeyanan seini.

³¹Doen benì ontò deitek intanem te otaw doton te pawà din. Pengkey wedad ekon palos benì labi pa deitek kenyan,

³²meneng penga te pegtanem din, timilles iyan, aw labi pa iyan dakel diyà te kedita te doma intanem din. Dakel se menge panga niyan, aw migsalag se menge manok kidoen.”

³³Migtoladà si Jesus kandan pineokit te medita tegdeyanan iling kenyan taman te egkelebetan dan.

³⁴Impeokit din te tegdeyanan se kedita te intoladà din kandan. Meneng gayed din ipeg-indan te menge tinoledaan din dalem te wedad doma dan aw eden se kedegdagan te kedita te tegdeyanan.