Marcos 4:24-34

²⁴Noga nzhab Jesús: ―Wen kenza goo reta kuu nin. Leeka taxal ntsow goo lo re taben goo, tataka rid goo, ne asta masraa kuu rid goo.

²⁵Tak lee zha kuu nap kwaa, masraay kayaa zha, per lee zha kuu yent kuu nap, asta lut kuu nap zha teyiibe lo zha.

²⁶Noga nzhab Jesús: ―Nalor tan tedib kwent, tsa ne goo xomod nak leettsa nabee Diox leettsoo men, leey nak taxal thib bin kuu ngo zha lo yu.

²⁷Tegal nzhat zha o naxna zha, tse ne yaal lee bin nlen ne nzhen, per net zha naa xomod nzhene.

²⁸Leeka yezlyu nxeene. Ner nlen kottse, tsaraa nziib gatte, nla doy, nziib kwate ne nla yattse.

²⁹Ne bluz leettsa nzhatslay, tsa nthop zhay, tak mzina wiz dope. Tbaa nak kwent.

³⁰Noga nzhab Jesús: ―Nal tan tedib kwent lo goo, tsa ne goo xomod nak leettsa nabee Diox leettsoo men.

³¹Leey nak taxal thib mbiz mostaz, mbiz mostaz nak thib mbiz kuu mas lut lo re mbiz kuu nzhann men.

³²Leettsa nyelo nzhann mene, nlene nzhene ne nziib tyen zhite, ne ndaay xkal, ne asta ndyaad re min ndexkwaa lyaat loy. Tbaa nak kwent.

³³Kon tyen kwent nanzee mloo Jesús xkiiz Diox lo re men. Tata mni Jesús lo re men asta plotha kuu takta yen re mene.

³⁴Leettsa ni Jesús lo re men pur nanzee ni Jesús, per leettsa nyaan Jesús kon re zha kuu ngeteed lo Jesús, tsaraa nambi ni Jesús lo re zha.