Mak 4:24-34

²⁴Eme Jises tiye i tiri, “Ndranyem kirih ki ta sahou ou anuhun! Saba maha-an ou amekes i tiri, kameh i le buku maha-an ou akohok. Eme kameh, ou akohok maha-an solo-an labai ja i hawen.

²⁵Are ndramak tanan tan mwasin udu aliy, iy kameh akohok tanan mwasin labai ja i la-un. Ya ndramak tanan tan sese le, tanan tan sese le doh kameh kuhiy mari iu.”

²⁶Eme Jises asehek ili le, “Ya tondrok ta Kindrei i buku none ndramak sabara buwa kei ili bolo bilin.

²⁷Iy amadin na ben ma amak na len, eme buwa kei ateh, arile iy bala tanan bwe, i buku sah handru ateh.

²⁸Munyak le anyohan buwa kei ateh ma edeu salin. Ma mwena handru iy i tinan ano, nyandren asahan ano ja, buwan asahan.

²⁹Len ta buwa kei uni badeh, ndramak andrei samen ili isan, tasah len ta akohok badeh, ndrano.”

³⁰Eme Jises ndremenya, “Taha kasehek tondrok ta Kindrei kameh ki buku sah handru? Saba sahou sokek taha kasehek kaleu?

³¹Tondrok ta Kindrei i buku none buwa kei ari iri aloh mastet. Badun badeh, nadu bwisik labai udu bolo munyak idah. Ndramak andrei, iy ili tahiy i bolo munyak.

³²Ano, ateh eme loke ma i tinan sakalawi ja iri buwa kei badu bolo bilin. Iy asahan buku ra-ei kei ma edeu andran. Eme iri sirih winiyan ame amekes ndrahu iri ta aton.”

³³Ya eme Jises asehek sahou i tiri lau na sahou sokek solo-an i buku le doh, iy tiye san solo-an handru winiya iri akohok amwenen.

³⁴Iy asehek i tiri na sahou sokek le, arile iy le ma hawe oro lau tan le ja, iy asehek moso sahou marakon i toro.