MARCOS 4:24-34

²⁴No re ke Ne lo men yra men: ―Gukagyedyag neree ne ron de. Zegne rukas de xdiiz Dëdyuzh, zenga ke tsukas Ne de no ntozdee tsukas Ne de.

²⁵Men ne che rukas xdiiz Dëdyuzh, laa Ne ylaa ne mazre tsukas meno; per le men ne rukasdeto, axtegue ne chendxee rukas men, tsukasdetre meno.

²⁶No re ke Jesus: ―Ne rkyeen Dëdyuzh nak zegnak chene rguu te mén zhobxtil lenlyu.

²⁷Lex rya men raguees men; rluzh nga raxee men. Zenga za dxe, za gyëël. Lex rleno, rroo we, per nandet men pezee rleno no pezee rroo we.

²⁸Laa lyu nak ne rguu gyelembán lextoo we. Primer rlen xgyizho, zhich guin rlen do we, zhich guin ruleedxo.

²⁹No chene le we che wal, rtop meno porke che wdxiin tyemp ne ydopo.

³⁰No re ke Jesus: ―¿Pagox rzaglo ne rkyeen Dëdyuzh, u pagox ynesaglo bo?

³¹Rzaglo we te medx lyagwlizh ne rlabni mén lyu. Laa we nak ne mazre windee ke lo yrandxee medx ne nuu gyëzlyu.

³²Per chene le we che wakbni, rroo we, laa we nak ne mazre raknzhoodee ke lo yrandxee gyizh; kesentyent rroo zhuuko, axtegue mgyin ra rzhexkwaa xeftxëës zhuuko.

³³Zeree wzëët Jesus xdiiz Dëdyuzh, teblose zegnak kwent wzëët No, chen ydee mén kwento.

³⁴Bet nzëëdet Ne lo mén belne nzëëdet No zegnak kwent; per le lo yra xpén Ne, waandxee wzëët Ne gan pe rna we.